ប៉ូលិសហុងកុងប្រើធម៌ក្ដៅ បាញ់គ្រាប់កាំភ្លើងជ័រលើបាតុករបណ្ដាលឲ្យរបួស ៧២នាក់

2019-06-13 02:08:35
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងហោចណាស់ មនុស្ស ៧២នាក់ បានរងរបួសក្រោយពេលដែលប៉ូលិសនៅហុងកុង បានបាញ់គ្រាប់កាំភ្លើងជ័រ និងគ្រាប់បែកឧស្ម័នបង្ហូរទឹកភ្នែកកាលពីថ្ងៃពុធទៅលើអ្នកតវ៉ារាប់ពាន់នាក់ដែលឡោមព័ទ្ធការិយាល័យកណ្ដាលរដ្ឋាភិបាល និងផ្លូវនៅជុំវិញនោះ។

យោងតាមស្នងការប៉ូលិសហុងកុង Steven Lo Wai-chung ឲ្យដឹងថាប៉ូលិសរហូតដល់ ៥ ០០០នាក់ប្រដាប់ដោយអាវុធបង្ក្រាបបាតុកម្ម ត្រូវបានបញ្ជូនទៅទប់ទល់ជាមួយបាតុករ។ លោកបន្ថែមថា ប៉ូលិសគ្មានជម្រើសណាផ្សេង ក្រៅពីប្រើប្រាស់កម្លាំងដើម្បីបំបែកក្រុមបាតុករនោះទេ ដោយសារពួកគេបានគប់ឆ័ត្រ និងដុំឥដ្ឋមកលើប៉ូលិស។ ចំណែកខាងអាជ្ញាធរមន្ទីរពេទ្យ ឲ្យដឹងកាលពីវេលាម៉ោង ១០យប់ថ្ងៃពុធថា យ៉ាងហោចណាស់មនុស្ស ៧២នាក់រងរបួសក្រោយការប៉ះទង្គិចគ្នាកាលពីរសៀលថ្ងៃដដែល។

ក្នុងចំណោមអ្នករងរបួសទាំងអស់ ក្នុងនោះ២នាក់កំពុងស្ថិតក្នុងស្ថានភាពធ្ងន់ធ្ងរ, ១៩នាក់ទៀតរងរបួសស្រាល ខណៈ ១០នាក់មិនទាន់ដឹងពីស្ថានភាពហើយ ៤១នាក់ផ្សេងទៀត ត្រូវបានព្យាបាលនិងអនុញ្ញាតឲ្យចេញពីមន្ទីរពេទ្យ។ ក្នុងចំនោមអ្នកដែលត្រូវបានរាប់បញ្ចូលមាន ៥០នាក់ជាបុរសនិង ២២ នាក់ជាស្ត្រីដែលមានអាយុពី ១៥ ទៅ ៦៦ ឆ្នាំ។

គួរឲ្យដឹងថា ការតវ៉ានេះ ត្រូវបានធ្វើឡើងក្រោយពេលដែលមានការស្នើសុំបង្កើតច្បាប់បត្យាប័នថ្មីដែលអនុញ្ញាតឲ្យជនល្មើសត្រូវបញ្ជូនទៅកាន់ចិនដីគោកដើម្បីកាត់ក្ដី និងដោយសារពួកគេមិនទុកចិត្តលើការគោរពសិទ្ធិមនុស្ស និងប្រព័ន្ធច្បាប់របស់ចិនដីគោក៕