បេតិកភណ្ឌឯកសាររបស់កម្ពុជា២ដែលបានចុះក្នុងបញ្ជីស្មារតីចងចាំនៃពិភពលោក

2019-08-01 09:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បេតិកភណ្ឌឯកសាររបស់កម្ពុជា២ដែលបានចុះក្នុងបញ្ជីស្មារតីចងចាំនៃពិភពលោកទី១គឺ បណ្ណសារសារមន្ទីរឩក្រិដ្ឋកម្មប្រល័យពូជសាសន៍ទួលស្លែង និងទី២ ខ្សែអាត់សម្លេងរឿងរាមកេរ្តិ៍តាគ្រុឌបើយោងតាមបញ្ជីកម្រងបេតិកភណ្ឌឯកសារស្មារតីចងចាំនៃពិភពលោកដែលដាក់តាំងនៅសារមន្ទីរឩក្រិដ្ឋកម្មប្រល័យពូជសាសន៍ទួលស្លែង។

រូបតារាងបញ្ជីបេតិកភណ្ឌឯកសាររបស់កម្ពុជានិងប្រទេសនានាដែលបានចុះបញ្ជី

នៅសាលតាំងពិពរណ៌មិនអចិន្ត្រៃយ៍របស់សារមន្ទីរឩក្រិដ្ឋកម្មប្រល័យពូជសាសន៍ទួលស្លែងដែលតាំងបង្ហាញក្នុងថ្ងៃ១០ឆ្នាំនៃការដាក់បញ្ចូលបណ្ណសារសារមន្ទីរឩក្រិដ្ឋកម្មប្រល័យពូជសាសន៍ទួលស្លែងក្នុងបញ្ជីស្មារតីចងចាំនៃពិភពលោកបានបញ្ជាក់ថា បេតិកភណ្ឌឯកសារទាំងពីររបស់កម្ពុជា ទី១ បណ្ណសារសារមន្ទីរឩក្រិដ្ឋកម្មប្រល័យពូជសាសន៍ទួលស្លែងបានចុះក្នុងបញ្ជីស្មារតីចងចាំនៃពិភពលោកថ្នាក់តំបន់អាស៊ីប៉ាស៊ីហ្វិកនៅឆ្នាំ២០០៨ និងចុះក្នុងបញ្ជីស្មារតីចងចាំនៃពិភពលោកនៅឆ្នាំ២០០៩ និងទី២ ខ្សែអាត់សម្លេងរឿងរាមកេរ្តិ៍និទានដោយតាគ្រុឌដែលល្បីល្បាញនាទសវត្សន៍ឆ្នាំ១៩៦០ដែលជាឯកសារសម្លេងបែបប្រពៃណីខ្មែរដំបូងបង្អស់បានចុះក្នុងបញ្ជីស្មារតីចងចាំនៃពិភពលោកថ្នាក់តំបន់អាស៊ីប៉ាស៊ីហ្វិក នៅឆ្នាំ២០១៤។

រូបភាពឯកសារដែលបង្ហាញពីប្រវត្តិនៃបេតិកភណ្ឌឯកសាររបស់កម្ពុជា២ដែលបានចុះបញ្ជី

នៅក្នុងបណ្ណសារសារមន្ទីរឩក្រិដ្ឋកម្មប្រល័យពូជសាសន៍ទួលស្លែងមាន រូបថត និងឯកសារអ្នកទោសចំនួនជាង ៦០០០ច្បាប់ត្រូវបានរក្សាទុក។ បណ្ណសារទាំងអស់នេះជាឯកសារសំខាន់សម្រាប់មនុស្សជាតិក្បិតបានបញ្ជាក់ពីអំពើឃោឃៅ និងការសម្លាប់មនុស្សជិ១ភាគ៣នៃប្រជាជនខ្មែរនាសម័យខ្មែរក្រហម។ លើសពីនោះឯកសារទាំងនេះគឺជាសារដាស់តឿន និងផ្សព្វផ្សាយពីគំរូមិនល្អរបស់ខ្មែរក្រហមដល់ពិភពលោកសម្រាប់ការឈ្វេងយល់។

ភ្ញៀវទេសចរបរទេសកំពុងទស្សនាក្នុងសាលពិពរណ៌

បច្ចុប្បន្នសារមន្ទីរទួលស្លែងកំពុងអនុវត្តគម្រោងអភិរក្ស និងថតចម្លងឯកសារឌីជីថលជិត ៥០ម៉ឺនទំព័រក្រោមជំនួយរបស់ទីភ្នាក់ងារសហប្រតិបត្តិការអន្តរជាតិកូរ៉េ (KOICA) តាមរយៈអង្គការយូណេស្កូហើយគ្រោងនេះនឹងរៀបចំបញ្ចូលឯកសារទាំងអស់ទៅក្នុងប្រព័ន្ធកុំព្យូទ័រសម្រាប់ដាក់ឲ្យប្រើប្រាស់ជាសាធារណៈនៅដើមឆ្នាំ២០២០ខាងមុខ។

ភ្ញៀវទេសចរបរទេសកំពុងទស្សនានៅសារមន្ទីរឩក្រិដ្ឋកម្មប្រល័យពូជសាសន៍ទួលស្លែង

ខ្សែអាត់សម្លេងរឿងរាមកេរ្តិ៍និទានដោយតាគ្រុឌជាប្រភេទឯកសារសម្លេងដំបូងបង្អស់បែបប្រពៃណីខ្មែរ។ ឯកសារសម្លេងនេះជាបណ្តុំខ្សែរឿងនិទានបុរាណដែលមានខ្លឹមសារតាំងដើមរហូតដល់ចប់។ សិល្បៈបុរាណនៃការនិទានរឿងស្ទើរបាត់បង់ទាំងស្រុងក្នុងសម័យខ្មែរក្រហម ប៉ុន្តែសំណាងល្អដែរខ្សែអាត់រឿងនេះនៅសល់រហូតដល់បច្ចុប្បន្នដោយសារអ្នកស្រាវជ្រាវ២រូបគឺលោក អាឡាំងដានីញែល និងហ្សាក់ បូណេត បានយកច្បាប់សម្លងទៅសិក្សា និងវិភាគនៅប្រទេសបារាំង។ ខ្សែអាត់សម្លេងដើម និងខ្សែអាត់ចម្លងមានរយៈពេលប្រមាណ១០ម៉ោង។ បច្ចុប្បន្នឯកសារឌីជីថលនេះបានក្លាយជាឯកសារថតចម្លងដែលមានតម្លៃសម្រាប់ការអភិរក្សផងដែរ៕

អត្ថបទ៖ លន ហ្សាឌីណា