ឡូយបាត់! កែវ រំចង់ មិនដឹងសម្ងំថតរឿងតាំងពីពេលណា ឥឡូវស្រាប់តែចេញ Trailer បាត់

2019-08-23 09:36:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម បាដិហារ្យភាពយន្តបានបញ្ចេញស្នាដៃថ្មីមួយទៀតហើយគឺរឿង "បំណុលឈាមអ្នកប្រយុទ្ធ” ដោយនៅក្នុងនោះ ស្រាប់តែមានមុខកីឡាករប្រដាល់ក្បាច់គុនបូរាណខ្មែរ កែវ រំចង់ គួរឲ្យភ្ញាក់ផ្អើល។

រឿង”បំណុលឈាមអ្នកប្រយុទ្ធ” គឺជាសាច់រឿងបែបវាយតប់ថ្មីរបស់ផលិតកម្មខាងលើ។ បើតាមលោក ស៊ុម ភារិន ផលិតករ និងជាចាងហ្វាង បាដិហារ្យភាពយន្ត និយាយថា ដោយសារតែលោកចង់ផ្លាស់ប្ដូររសជាតិសម្រាប់ទស្សនិកជន ដោយភាគច្រើនមានតែរឿងកំប្លែង ខ្មោច និងស្នេហាជាដើម ទើបលោកសម្រេចចិត្តផលិតស្នាដៃនេះឡើងមក។

"ដោយសារកត្តារសជាតិនៃសាច់រឿងនេះហើយទើបខ្ញុំ ចំណាយពេលច្រើនមកផលិតស្នាដៃមួយនេះ ដើម្បីកុំឱ្យទស្សនិកជនខ្មែរគាត់គិតថា កុនខ្មែរគ្មានរសជាតិអ្វីក្រៅតែពី ខ្មោច និងកំប្លែង”។ ស៊ុម ភារិន ថ្លែង។ ក្រៅតែបន្ថែមរសជាតិទៅក្នុងឧស្សាហកម្មភាពយន្តខ្មែរ ផលិតករបញ្ជាក់បន្ថែមថា តាមរយៈរឿងនេះ លោកក៏ចង់ជួយលើកកម្ពស់ ក្បាច់គុនល្បុក្កតោ ក្បាច់គុនប្រដាល់បូរាណខ្មែរផងដែរ ទើបលោកទាយ កែវ រំចង់ ដែលជាកីឡាករប្រដាល់ល្បីឈ្មោះ និងតួអង្គម្នាក់ជាគ្រូល្បុក្កតោគឺលោក ឆន ចាន់វីរៈ។

រូបភាពផ្ដល់ឲ្យដោយលោក ភារិន

ភាពយន្តរឿង”បំណុលឈាមអ្នកប្រយុទ្ធ” គឺជាស្នាដៃទី៧ហើយរបស់ផលិតកម្ម បាដិហារ្យភាពយន្ត។ ស្នាដៃនេះនឹងដាក់បញ្ចាំងផ្លូវការតាមរោងភាពយន្តនានាចាប់ពីថ្ងៃទី ២៩ ខែ សីហា ឆ្នាំ២០១៩ ខាងមុខនេះតទៅហើយ៕

តោះ...ទស្សនាវីដេអូ Trailer ភាពយន្តរបស់កីឡាករ កែវ រំចង់ ទាំងអស់គ្នា!!!