ណែនាំឲ្យស្គាល់ ខ្សែប្រយុទ្ធវ័យក្មេងម្នាក់គេឲ្យរហស្សនាមថា Robben ថ្មី

2019-09-05 07:40:45
ចំនួនមតិ 0 | ចំនួនចែករំលែក 0

ចន្លោះមិនឃើញ

វ័យទើបតែ២០ឆ្នាំនិងកំពុងលេងនៅក្លឹប Villarreal ខ្សែបម្រើប្រយុទ្ធ Samuel Chukwueze បានក្លាយជាយុវជនមានទេពកោសល្យលេចធ្លោម្នាក់ក្នុងទ្វីបអឺរ៉ុបនាពេលបច្ចុប្បន្ន។

ក្លឹបធំៗជាច្រើនបានដាក់ការចាប់អារម្មណ៍មកលើ Chukwueze និងត្រូវគេរំពឹងថានឹងក្លាយជាតារាឆ្នើមប្រចាំជម្រើសជាតិនីហ្សេរីយ៉ានាពេលខាងមុខ។ Chukwueze ចាប់ផ្ដើមហាត់បាល់ដំបូងជាមួយក្រុមយុវជន Diamond Football Academy មុនពេលផ្លាស់មកហាត់ជាមួយយុវជន Villarreal ក្នុងឆ្នាំ២០១៧។

ក្នុងឆ្នាំ២០១៨ ជាឱកាសមាសរបស់គេឡើងមកលេងឈុត Villarreal B ដោយឃើញសមត្ថភាពល្អក្លឹបក៏បានទាញគេឡើងមក Villarreal ឈុតធំតែម្ដង។ ដំណើរជីវិតរបស់ Chukwueze មុននឹងក្លាយជាកីឡាករអាជីពសព្វថ្ងៃក៏មិនងាយស្រួលដែរ ពោលគ្រួសារបានរារាំងគេមិនឲ្យលេងបាល់ឡើយ ព្រោះចង់ឲ្យផ្ដោតលើការសិក្សា។ ដោយសារមិនស្ដាប់បង្គាប់ គ្រាមួយពូរបស់គេបានលួចយកស្បែកជើង និងសម្ភារៈទាត់បាល់របស់គេយកទៅដុតចោល។

ព្រោះចិត្តកូនស្រឡាញ់ខ្លាំងទៅហើយ ម្ដាយរបស់ Chukwueze ក៏ព្រមឲ្យកូនចូលហាត់បាល់តាមបំណងប្រាថ្នា។ ការខិតខំរបស់ Chukwueze ពិតជាមិនខកបំណង រហូតក្លាយជាយុវជនឆ្នើមម្នាក់។ ក្នុងវ័យ១៨ឆ្នាំមានក្លឹបធំៗនៅអឺរ៉ុបជាច្រើនចង់បានគេយកមកលេងក្នុងនោះមាន Porto, Sporting និង Arsenal ជាដើម ប៉ុន្តែចុងក្រោយគេសម្រេចចិត្តមក Villarreal។

ចំពោះតារាក្នុងចិត្តរបស់ Chukwueze គឹកីឡាករហូឡង់ Arjen Robben។ កីឡាករទាំងពីររូបនេះជំនាញជើងឆ្វេងដូចគ្នា ចំពោះការរត់និងស្ទីលលេងក៏ស្រដៀងគ្នា ទើបធ្វើឲ្យគេដាក់រហស្សនាម Chukwueze ថាជា Robben ថ្មី៕