តើវិទ្យាល័យរដ្ឋណាខ្លះនៅភ្នំពេញ មានជើងខ្លាំងជាប់និទ្ទេស A ច្រើនជាងគេ?

2019-09-17 06:01:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងអប់រំយុវជន និងកីឡាបានប្រកាសលទ្ធផលប្រឡងសញ្ញាប័ត្រមធ្យមសិក្សាទុតិយភូមិ(បាក់ឌុប)កាលពីសប្ដាហ៍មុននេះ ដោយមានបេក្ខជនចំនួន ៧៩ ០៥២នាក់បានប្រឡងជាប់បាក់ឌុប ហើយក្នុងនោះបេក្ខជនបាននិទ្ទេសAមានចំនួន៤៤៣នាក់។ ដោយឡែកនៅភ្នំពេញមានបេក្ខជនជាប់និទ្ទេស A ច្រើនជាងគេចំនួន ៤៤១បានប្រឡងជាប់និទ្ទេស A ។ ប៉ុន្តែប្រិយមិត្តប្រហែលមិនទាន់ដឹងនៅឡើយថា សាលាណាមួយនៅភ្នំពេញមានបេក្ខជនប្រឡងជាប់និទ្ទេស A ច្រើនជាងគេ?

យោងតាមរបាយការណ៍នាយកដ្ឋានកិច្ចការប្រលងនៃក្រសួងអប់រំយុវជន និងកីឡាបានឱ្យដឹងថា វិទ្យាល័យព្រះស៊ីសុវត្ថិ មានបេក្ខជនប្រឡងជាប់និទ្ទេស A ច្រើនជាងគេចំនួន ១៨ នាក់ ក្នុងនោះមានស្រី ៨ នាក់។ ១០ នាក់មកពីសាលាជំនាន់ថ្មីនៃវិទ្យាល័យព្រះស៊ីសុវត្ថិ ខណៈ៨ នាក់មកពីវិទ្យាល័យព្រះស៊ីសុវត្ថិ។ បន្ទាប់មកទៀតមានវិទ្យាល័យព្រះមុនីវង្សមានបេក្ខជនបាននិទ្ទេស A នាក់ ស្រី៤ នាក់ វិទ្យាល័យទទួលទំពូងមានបេក្ខជនជាប់និទ្ទេស ១០ នាក់ ស្រី ៦នាក់ វិទ្យាល័យ១០ មករា ១៩៧៩ បាននិទ្ទេស A ១០ នាក់ ស្រី៣នាក់ ។

វិទ្យាល័យ ហ៊ុន សែន សេរីភាពមានបេក្ខជនជាប់និទ្ទេស ៩ នាក់ ស្រី ៤ នាក់។ ដោយឡែកសាលាឯកជន ដែលមានបេក្ខជនបាននិទ្ទេស A ច្រើនជាងគេ គឺបានលើសាលាប៊ែលធីអន្តរជាតិ មានចំនួន ១៨ នាក់ សាលាអន្តរទ្វីបអាមេរិកកាំងមានចំនួន ១១នាក់។

ក្នុងការប្រឡងបាក់ឌុបកន្លងមកមានបេក្ខជនចុះឈ្មោះប្រឡងសរុបចំនួន ១១៧ ០៤៣នាក់ អវត្តមានចំនួន ១៨៣៨នាក់ ហើយក្នុងនោះក៏មានសិស្សចំនួន ២នាក់ត្រូវរងពិន័យឱ្យធ្លាក់ដោយស្វ័យប្រវត្តិផងដែរ ដោយបេក្ខជនទាំងពីរនាក់នោះ ប្រព្រឹត្តិខុស ដោយយកសំណៅឯកសារ និងទូរស័ព្ទដៃចូលបន្ទប់ប្រឡង។

បេក្ខជនប្រឡង ជាប់មានចំនួន ៦៨,៦២ភាគរយ ក្នុង នោះសិស្ស បាននិទ្ទេស A មានចំនួន ៤៤៣នាក់ ខណៈកាលឆ្នាំ២០១៨ សិស្សនិទ្ទេស Aមានចំនួន ៤០៨ នាក់៕

អត្ថបទ៖ សុផល