ឡូយណាស់ ២០២០ នេះ ភីអិនអិននៅតែផ្ដោតលើភាពយន្តផលិតក្នុងស្រុក មិនទិញសិទ្ធិពីបរទេសឡើយ

2019-10-25 09:40:30
ចំនួនមតិ 0 | ចំនួនចែករំលែក 0

ចន្លោះមិនឃើញ

អស់រយៈពេលជាងបីឆ្នាំកន្លងមកហើយដែលស្ថានីយទូរទស្សន៍ភីអិនអិនបានដាក់ដំណើរការផ្សាយរឿងភាគខ្មែររហូតមកដល់បច្ចុប្បន្ន ដោយទទួលលបានជោគជ័យយ៉ាងខ្លាំងផងដែរ តាមរយៈស្នាដៃនិពន្ធរបស់អ្នកនិពន្ធល្បីៗ តួសម្តែងដែលមានទេពកោសល្យ បូករួមទាំងបច្ចេកទេសក្នុងការថតជាដើម ដែលធ្វើអោយគុណភាពរឿងភាគខ្មែរកាន់តែប្រសើរឡើងពីមួយឆ្នាំទៅមួយឆ្នាំ។

បើទោះបីជាមានការគាំទ្រយ៉ាងណាក្តី ស្ថានីយទូរទស្សន៍ភីអិន នៅតែព្យាយាមរកយុទ្ធសាស្ត្រថ្មីៗ ដើម្បីពង្រឹងរឿងភាគខ្មែរអោយកាន់តែខ្លាំងបន្ថែមទៀតក្នុងឆ្នាំ២០២០ខាងមុខ ដោយនឹងជ្រើសរើសប្រភេទសាច់រឿងល្អៗ ដែលលេចចេញពីស្នាដៃអ្នកនិពន្ធល្បីៗនៅកម្ពុជាដោយមិនចម្លង ឬទិញសិទ្ធពីបរទេសមកផលិតឡើយ។

ក្រៅពីការតែងនិពន្ធ ក្នុងនោះស្ថានីយទូរទស្សន៍ភីអិនអិន ក៏មានការសម្រឹតសម្រាំងតួសម្តែងដែលមានទេពកោសល្យ និងអាចបញ្ចូលអារម្មណ៍ជាមួយការនិយាយផ្ទាល់ដោយមិនបញ្ចូលសំឡេងឡើយ។ បន្ថែមពីលើនេះ PNN ក៏នឹងបន្ថែមបច្ចេកទេសថ្មី ជាពិសេសគឺការបន្ថែមម៉ោងចាក់ផ្សាយនៅក្នុងម៉ោងមាសរហូតដល់ ៦០០ម៉ោងក្នុងមួយឆ្នាំ និងការបោះទុនបន្ថែមក្នុងការផលិតរឿងភាគខ្មែរ ដែលឆ្នាំមុនៗភីអិនអិនបានផលិតរឿងភាគខ្មែរប្រហែលជា៤០០ម៉ោងប៉ុណ្ណោះក្នុងមួយឆ្នាំ។ នេះបើតាមការលើកឡើងរបស់ កញ្ញាទូច បុប្ផា ប្រធានផ្នែកកម្មវិធីផ្សាយរបស់ស្ថានីយទូរទស្សន៍ភីអិនអិន។

រឿងភាគខ្មែរល្បីៗដែលត្រៀមនឹងចាក់ផ្សាយសម្រាប់ឆ្នាំ២០២០នេះមានដូចជារឿង "ឥទ្ធិពលស្នេហ៍ក្នុងភ្លើងបណ្តាសារ" "អ្នកម៉ាក់វ័យក្មេង" "សង្គ្រាមមរតក" "សព្វសិទ្ធ" និង "អ្នកទីបី" រួមនឹងរឿងភាគខ្មែរជាច្រើនទៀតដែលស្ថិតនៅក្នុងគម្រោងផលិតនិងចាក់ផ្សាយរបស់ស្ថានីយទូរទស្សន៍ភីអិនអិន។

ដោយឡែកសម្រាប់អ្នកនិពន្ធល្បីៗដែលនឹងមកសហការផលិតជាមួយស្ថានីយទូរទស្សន៍ភីអិនអិនមានដូចជា អ្នកស្រី ពាន់ ភួងបុប្ផា អ្នកស្រី ម៉ី សនសុធារី អ្នកស្រី សុម៉ាលី រួមនិងអ្នកនិពន្ធដែលមានស្នាដៃជាច្រើនរូបទៀត។

ស្ថានីយទូរទស្សន៍ភីអិនអិន រំពឹងថាសម្រាប់ឆ្នាំ២០២០ខាងមុខ នឹងរឹតតែធ្វើអោយទស្សនិកជនមានការគាំទ្រកាន់តែខ្លាំង ដោយមានការរួមសហការពីគ្រប់ភាគីពាក់ព័ន្ធទាំងអស់ដើម្បីអោយរឿងភាគខ្មែរកាន់តែមានគុណភាពជាងឆ្នាំកន្លងទៅ៕