មេធំ Instagram លើកហេតុផលហួសចិត្តមួយ ដែល IG គ្មាន App ពេញអេក្រង់នៅលើ iPad

2020-02-19 01:26:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រលូកក្នុងការប្រកួតប្រជែងលើកម្មវិធីបណ្តាញសង្គម មកទល់ឆ្នាំ ២០២០ នេះ Instagrm មានអាយុកាល ១០ ឆ្នាំហើយ ប៉ុន្តែបែរជាមិនទាន់មាន App ពេញលេញឬពេញអេក្រង់សម្រាប់ថេបប្លែត iPad របស់ Apple ដដែល។

បើយើងក្រឡេកទៅមើលប្រភេទថេបប្លែតរបស់ Android គឺអាចប្រើជាលក្ខណៈពេញលេញដូចទូរសព្ទជាធម្មតា លំបាកអ្វីតែ iPad មួយ បែរជាតម្រូវឲ្យប្រើប្រាស់កម្មវិធីបែប iPhone Version ទៅវិញ។

ពន្យល់ដោយនាយកប្រតិបត្តិរបស់ Instagram ដែលជាក្រុមហ៊ុនសម្ព័ន្ធស្ថិតក្រោមទ្រនំមេ Facebook បានប្រាប់ The Verge ជាមួយហេតុផលដ៏ហួសចិត្តបំផុត។ លោក Adam Mosseri បានប្រាប់ហេតុផលថាដោយសារតែខ្វះខាតកម្លាំង មិនមានធនធានគ្រប់គ្រាន់ក្នុងការអភិវឌ្ឍសម្រាប់កម្មវិធីជំនាន់ iPad។

លោក Mosseri និយាយ៖ "យើងក៏ចង់បង្កើតកម្មវិធីនៅលើ iPad តែចំនួនមនុស្សរបស់យើងមានកំណត់ ហើយមានការងារជាច្រើនដែលត្រូវធ្វើ ណាមួយវាក៏មិនមែនជារឿងដែលចាំបាច់ល្អបំផុតក្នុងការត្រូវធ្វើបន្ទាប់នោះដែរ"។

វាជាចម្លើយហួសចិត្តដែល Instagram ថាមិនអាចបង្កើត iPad Version ដោយសារតែកង្វះខាតធនធាន ព្រោះបើយើងសម្លឹងមើលចំណូលដែលក្រុមហ៊ុនមេ Facebook រកបានគឺដល់ទៅ ២១,១ ពាន់លានដុល្លារក្នុងត្រីមាសទី ៤ ឆ្នាំ ២០១៩ ហើយបច្ចុប្បន្នមានបុគ្គលិកបម្រើការជិត ៥០ ០០០ នាក់ឯណោះ ហើយក៏សុទ្ធសឹងជាអ្នកជំនាញខាងបង្កើតឬអភិវឌ្ឍកម្មវិធីកំពូលៗថែមទៀត៕

អានអត្ថបទ:

ប្រភព៖ pcmag ប្រែសម្រួល៖ កៅ រក្សា