សប្បាយកប់ហើយ! Klapyahandz Records នឹងទៅប្រគំតន្ត្រីធំផ្សាយផ្ទាល់ពីប៉ារីសតែម្ដងឆាប់ៗនេះ!

2020-02-19 03:45:28
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីមិនសូវចេញសកម្មភាពច្រើននាឆ្នាំកន្លងមក នៅដើមឆ្នាំនេះ Klapyahandz Records ដែលជាផលិតកម្មប្រមូលផ្ដុំដោយតារាចម្រៀងរ៉េបជាច្រើននោះ បានបញ្ចេញឲ្យដឹងពីផែនការទៅធ្វើការប្រគំតន្ត្រីដ៏ធំផ្សាយផ្ទាល់ពីទីក្រុងប៉ារីសប្រទេសបារាំង។ នេះបើតាមការបញ្ចេញឲ្យដឹងពីសាមីផលិតកម្ម។

នេះគឺជាសកម្មភាពលើកទី១សម្រាប់ផលិតកម្មចម្រៀងរ៉េបរបស់កម្ពុជានៅលើទឹកដីអឺរ៉ុប ក្នុងនោះបើតាមព័ត៌មានការប្រគំតន្ត្រីដ៏ធំនេះ ប្រព្រឹត្តទៅនៅថ្ងៃទី ២៨ កុម្ភៈ ឆ្នាំ២០២០ វេលាម៉ោង ៨ ល្ងាច ដល់ ១ ភ្លឺ (ទីតាំង Paris 13ème) រៀបចំដោយ Sabay Events។ តារាចម្រៀងខ្មែរជំនាន់ថ្មីបីរូបគឺលោក វុទ្ធា, លោកAGO និងកញ្ញា ស្រីល័ក្ខ នឹងមានវត្តមានក្នុងកម្មវិធីដ៏ធំនេះ។

លោក លោក សុខ វិសាល ដែលមានសញ្ជាតិបារាំងខ្មែរ លើកឡើងថា នេះជាការរួមបញ្ចូលគ្នារវាងតន្ត្រីបុរាណ និងសម័យ ដែលផលិតកម្ម Klapyahandz Records បានបង្កើតសិល្បៈតន្ត្រីមួយដែលផ្សារភ្ជាប់ជនរួមជាតិខ្មែរគ្រប់ជំនាន់ ដែលរស់នៅក្នុងប្រទេសផ្សេងៗលើពិភពលោក។

លោកបន្តថា លោកមានមោទកភាពណាស់ជាមួយព្រឹត្តិការណ៍នេះ ហើយថា ពិតជាពិសេសណាស់ ដែលសមាគម Samaki Kohn Khmer និង Sabay Events បានសហការគ្នានាំមកជូនប្រិយមិត្តនូវកម្មវិធីប្រគំតន្ត្រីខ្មែរបន្តផ្ទាល់ដំបូងបង្អស់នៅទីក្រុងប៉ារីសនាពេលនេះ។ ព្រោះថា កម្មវិធីតន្ត្រីដ៏ធំនេះ ធ្វើឡើងក្នុងគោលបំណងបង្កើតចំណងទាក់ទងរវាងប្រជាជនកម្ពុជា ដែលរស់នៅក្នុងប្រទេសបារាំង និងរស់នៅក្នុងប្រទេសកម្ពុជាតាមរយៈសិល្បករជំនាន់ថ្មីនេះ។

តាមផែនការដែលបានគ្រោង ការប្រគំតន្ត្រីដ៏ធំខាងលើ នឹងធ្វើឡើងនៅសាលាតន្ត្រី Galerie VII, ដំបូងមានឈ្មោះថា 7 Spirits, ដែលស្ថិតនៅ 7 rue Sainte Hélène 75013 Paris ក្នុងថ្ងៃទី ២៨ កុម្ភៈ ឆ្នាំ២០២០ ចាប់ពីវេលាម៉ោង ៨ ល្ងាចតទៅ។

ប្រិយមិត្ត អាចរកទិញសំបុត្រសម្រាប់ចូលរួមបានតាមរយៈគេហទំព័រនេះ www.weezevent.com ឬក៏អាចទិញនៅសាលតន្ត្រីផ្ទាល់តម្លៃ 30.99€។

ផលិតកម្ម Klapyahandz Records ត្រូវបានផ្ដួចផ្ដើមបង្កើតដោយលោក សុខ វិសាល។ ត្រឡប់ទៅអតីតកាល គឺបន្ទាប់ពីវិលត្រឡប់ទៅប្រទេសកម្ពុជាវិញនៅឆ្នាំ១៩៩៣ លោក សុខ វិសាល ដែលមានសញ្ជាតិបារាំងខ្មែរ គឺជាបុគ្គលមួយរូបក្នុងចំណោមបុគ្គលដែលបានផ្តួចផ្តើមចលនា HipHop ។ បន្ទាប់មកលោកបានបន្តបេសកកម្មនេះ រហូតបង្កើតបានផលិតកម្មតន្ត្រីផ្ទាល់ខ្លួនដែលមានឈ្មោះថា Klapyahandz Records នៅឆ្នាំ២០០៥។

មកដល់បច្ចុប្បន្ន Klapyahandz Records មានបទទទួលបានការពេញនិយមជាច្រើន ដូចជាបទ "ស្នេហាក្នុងពេលរាត្រី" និងបទ "ស្ដាយស្នេហ៍អភ័ព្វ" ជាដើម។ ដោយឡែក Channel ផលិតកម្មនៅលើ youtube គឺមានចំនួនអ្នក subscribe ជាង 390,000 នាក់រួមជាមួយនឹងចំនួននៃការទស្សនាជាង 90 លានដងពីទូទាំងពិភពលោក៕