Assist ១គ្រាប់យប់មិញ Saka ត្រូវ Van Persie ប្រដូចទៅនឹង Giggs, Bergkamp និង Scholes

2020-02-21 06:58:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ការបញ្ជូនបាល់ (Assist) ១គ្រាប់ឱ្យ Lacazette របស់ Bukayo Saka កាលពីយប់មិញ ត្រូវបាន Robin Van Persie ប្រដូចកីឡាករអង់គ្លេសរូបនេះ ទៅនឹងខ្សែប្រយុទ្ធល្បីៗតួយ៉ាង Ryan Giggs, Dennis Bergkamp និង Paul Scholes។

ការបញ្ជូនបាល់ដ៏ល្អ ធ្វើឱ្យ Van Persie អត់សរសើរមិនបាន ហើយត្រូវបានអតីតខ្សែប្រយុទ្ធក្លឹបកាំភ្លើងធំ Arsenal និង Man Utd រូបនេះ ចាត់ទុកជាការបញ្ជូនបាល់ល្អលំដាប់ពិភពលោក។

អតីតខ្សែប្រយុទ្ធហូឡង់ Van Persie បានប្រាប់ BT Sportថា ៖«ប្រភេទនៃការបញ្ជូនបាល់នេះដូច Ryan Giggs, Dennis Bergkamp, Paul Scholes អ៊ីចឹង គឺបញ្ជាឱ្យខ្សែប្រយុទ្ធ ចូលទៅតំបន់គ្រោះថ្នាក់។ វាជាការបញ្ជូនបែប World class»។

អតីតខ្សែប្រយុទ្ធ Arsenal ៨រដូវកាលបន្តថា នេះមិនមែនជារឿងងាយស្រួលទេ ប៉ុន្តែ Saka ធ្វើបានយ៉ាងស្រួល។ មានតែកីឡាករល្អៗប៉ុណ្ណោះ ទើបអាចធ្វើបាន។ នេះជាការបញ្ជូនដោយប្រើគំនិត ដែលគ្រូបង្វឹកចង់បានពីកីឡាករ។

ការប្រកួតជើងទី១ វគ្គ៣២ក្រុមចុងក្រោយ នៃពានរង្វាន់ទ្វីបអឺរ៉ុប UEFA Europa League កីឡាការលេងស្លាប Bukayo Saka បានបញ្ជូនបាល់យ៉ាងស្អាត ឱ្យខ្សែប្រយុទ្ធ Lacazette ស៊ុតបញ្ចូលទី ខណៈការប្រកួតនៅសល់តែ៩នាទីប៉ុណ្ណោះ ជួយឱ្យក្រុមរបស់លោក Mikel Arteta ឈ្នះ Olympiakos ១-០៕

ប្រភព៖ Goal ប្រែសម្រួល៖ អ៊ុំ សុភក្តិ