មោទកភាពហួស លីហ្សា ត្រូវបានជ្រើសរើសតំណាងកម្ពុជាទៅចូលរួមគូរគំនូរលើរថយន្ត កម្រិតអន្តរជាតិ

2020-02-25 03:43:15
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ម៉ម លីហ្សា ដែលជាវិចិត្រការិនីគំនូរច្នៃប្រឌិតបែបសម័យ (modern contemporary art) នៅថ្មីៗនេះ បានទម្លាយរឿងមួយធ្វើឲ្យនាងមានមោទកភាពបំផុត ដែលនោះ គឺនាងត្រូវបានជ្រើសរើសតំណាងកម្ពុជាទៅចូលរួមព្រឹត្តិការណ៍គូរគំនូរលើរថយន្តកម្រិតអន្តរជាតិហៅថា "Bimmermeet4 tribute to BMW art car"។

លីហ្សា បានបញ្ចេញរឿងនេះនៅលើបណ្ដាញសង្គមរបស់នាង ជាហេតុនាំឲ្យអ្នកគាំទ្រនាងជាច្រើនបានចូលរួមសាទរ។ "អស្ចារ្យណាស់!! ព្រឹត្តិការណ៍ រចនាសិល្បៈ លើរថយន្តម៉ាក BMW !! ខ្ញុំមាន មោទកភាព និង សប្បាយរីករាយណាស់ដែលត្រូវបានជ្រើសរើសជា សិល្បការិនីតំណាងអោយប្រទេសកម្ពុជា"។ សិល្បការិនីថ្លែង។

វិចិត្រការិនីថ្មីវ័យក្មេង បានបញ្ជាក់ថា ព្រឹត្តិការណ៍ធ្វើឡើងនៅប្រទេសថៃ ដោយក្នុងនោះ មានវិចិត្រករដូចគ្នា មកពីប្រទេសចំនួន ១៣ឯណោះ នឹងត្រូវចូលរួមក្នុងព្រឹត្តិការណ៍តែមួយនេះ។ ម៉ម លីហ្សា ថាអ្វីដែលនាងទទួលបាននាពេលនេះ គឺជាសុបិនបានក្លាយជាការពិតអីចឹង។ ដូច្នេះហើយ ទើបធ្វើឲ្យមានរីករាយយ៉ាងខ្លាំងចំពោះការទទួលបាននេះ។

តាមព័ត៌មាន មិនមែនមានតែ លីហ្សា ម្នាក់ទេ ដែលត្រូវបានជ្រើសរើសតំណាងកម្ពុជាទៅចូលរួមក្នុងព្រឹត្តិការណ៍រចនាសិល្បៈលើរថយន្តខាងលើ ប៉ុន្តែគឺមានសិល្បករម្នាក់ទៀតឈ្មោះ Peap Tarr ក៏នឹងត្រូវរួមដំណើរជាមួយគ្នាទៅកាន់ឆាកអន្តរជាតិដែរ។

នេះមិនមែនជាលើកទី១ដែលវិចិត្រការិនីខ្មែរ ម៉ម លីហ្សា ត្រូវបានក្រុមហ៊ុនធំលំដាប់អន្តរជាតិជ្រើសរើសយកនាង ទៅរំលេចស្នាដៃសិល្បៈលើផលិតផលរបស់គេ ប៉ុន្តែតាមព័ត៌មាននៅលើទំព័របណ្ដាញសង្គមរបស់នាង កន្លងមក លីហ្សា ក៏ធ្លាប់ត្រូវក្រុមហ៊ុនអាកាសចរណ៍អន្តរជាតិដ៏ធំមួយ គឺក្រុមហ៊ុនអាកាសចរណ៍ Air Asia អញ្ជើញនាងទៅគូសរូបសិល្បៈសម្រាប់ក្រុមហ៊ុនគេដែរ។

ព្រឹត្តិការណ៍ក្នុងអតីតកាល លីហ្សា បញ្ជាក់ថា មានវិចិត្រករចំនួន ៦ប្រទេសត្រូវបានជ្រើសរើស។ ដូចគ្នានឹងពេលនេះដែរ លីហ្សា ប្រាប់ថា គ្រានោះនាងក៏មានមោទកភាព និងសប្បាយរីករាយខ្លាំងដូចគ្នាដែរ។ លីហ្សា បានចាកចេញពីកម្ពុជាឆ្ពោះទៅប្រទេសថៃសម្រាប់ព្រឹត្តិការណ៍ខាងលើតាំងពីថ្ងៃទី ១៦ កុម្ភៈ ហើយតាមគម្រោងនាង និងមកដល់កម្ពុជាវិញនៅថ្ងៃនេះ៕