ក្រោយ​ពី​បាន​កំណត់​ថ្ងៃ​ចូល​រោង ឥឡូវ នីឡា សម្រេច​លើកពេលទៀតហើយ!

  • 2020-03-18 02:47:42
  • ចំនួនមតិ 0 | ចំនួនចែករំលែក 0

ចន្លោះមិនឃើញ

តាម​ព័ត៌មាន​ដែល​ទទួល​បាន កាល​បរិច្ឆេទ នៃ​ថ្ងៃ​ចូល​រោងការ​ពិតប្រាកដ​របស់​តារា​សម្ដែង​វ័យ​ក្មេង​ក្នុង​ក្រុម​នាយ ពែកមី គឺ​កញ្ញា វ៉ាន់ នីឡា ជាមួយ​នឹង​គូ​ស្នេហ៍​ថ្មី ត្រូវ​បាន​​លើក​ពេល​រៀបការ​ទៀត​ហើយ​។

ថ្មីៗ​នេះ កញ្ញា​នីឡា និង​គ្រួសារ បាន​បង្ហើប​ពី​គម្រោង​រៀបការ​នៅ​អំឡុង​ខែ​ឧសភា ឆ្នាំ​២០២០។ ប៉ុន្តែ​នៅ​ក្នុង​ឱកាស​ដែល​កញ្ញា វ៉ាន់ នីឡា ចូល​រួម​ពិធី​មង្គលការ​របស់​តារា​សម្ដែង ម៉ាក សែនសូនីតា យប់​មិញ នាង​ប្រាប់​សារព័ត៌មាន​ថា មង្គល​ការ​របស់​កញ្ញា​នឹង​លើក​ទៅ​ខែ​វិច្ឆិកា ឆ្នាំ​២០២០ វិញ ដោយ​កញ្ញា​លើក​ហេតុផល​ថា​ជាប់​រវល់​ការងារ​សិល្បៈ និង​មិន​ទាន់​ត្រៀម​ខ្លួន​រួច​រាល់ ហើយ​ម្យ៉ាង​ក៏​គិត​ពី​បញ្ហា​កូវីដ​១៩ ដែរ ព្រោះ​បើ​គិតគូរ​ស្របពេល​ដែល​មនុស្ស​ទូទៅ​កំពុង​ភ័យ​ខ្លាច​ក៏​មិន​សូវល្អ​ដែរ។

កញ្ញា វ៉ាន់ នីឡា៖" សូម​ប្រាកដ​ខែ គឺ​ខែ​១១ តែ​មិន​ទាន់​ប្រាកដ​ថ្ងៃ។ នៅម្ដុំ​ខែ​៧ ឬ​ខែ​៨ នឹង​ទៅ​ប្រាកដ​ថ្ងៃ​ម្ដង​ទៀត ហើយ​បើ​ដឹង​ច្បាស់​ពេល​ណា​ខ្ញុំ​នឹង​បង្ហោះ​តាម​ហ្វេសប៊ុក។ ខ្ញុំ​ក៏​ចង់​ឲ្យ​រួច​ការងារ​សិន​ដែរ ព្រោះ​សព្វថ្ងៃនេះរវល់​ថត​ក្នុង​កម្មវិធី​របស់​ប៉ា​ផង និង​ថត​ស្ពត​ផង"។

តារា​សម្ដែង​វ័យក្មេង​សម្ដី​បាន​កញ្ញា វ៉ាន់ នីឡា មាន​វ័យ​២០​ឆ្នាំ ត្រូវ​ជា​កូន​បង្កើត​របស់​អ្នក​និពន្ធ និង​ដឹកនាំ​ក្រុម​កំប្លែង​ល្បី​មួយ​ប្រចាំ​នៅ​ស្ថានីយ​ទូរទស្សន៍ ស៊ី ធី អិន គឺ​លោក សុវណ្ណ រិទ្ធី ហៅ​លោក​តា វ៉ិច ទ័រ។ នីឡា នឹង​ចូល​រោងការ​ជាមួយ​សង្សារ​ថ្មី គឺ​លោក ស៊ុត សក្ការៈ មាន​វ័យ​ប្រហាក់​ប្រហែល​នឹង​នាង​ដែរ ពោល​គឺ​មាន​អាយុ​២១​ឆ្នាំ ប៉ុន្ដែនីឡាសុំលាក់មុខរបររបស់កូនកម្លោះក្នុងថ្ងៃមង្គលរបស់នាងសិន។

កញ្ញា វ៉ាន់ នីឡា ធ្លាប់​ភ្ជាប់​ពាក្យ​ជាមួយ​កូន​ប្រុស​ថៅកែ​ល្ខោន​ល្បី​ឈ្មោះ​មួយ​នៅ​ខេត្ត​តាកែវ​កាល​ពី​ថ្ងៃ​ទី១៩ ខែ​ឧសភា ឆ្នាំ​២០១៦។ ប៉ុន្ដែ​វ៉ាន់ នីឡា និង​កូន​ថៅកែ​ល្ខោន ភី សុគន្ធី ឈ្មោះ ផន រង្សី បាន​ផ្ដាច់​ពាក្យ​គ្នា​ទៅ​វិញ​ ដែល​តាម​ព័ត៌មាន សាមី​ខ្លួន​មាន​ចិត្ដ​គំនិត​មិន​ចុះសម្រុង​នឹង​គ្នា៕

អត្ថបទ៖ ជិន សុភ័ក្រ្ត

អត្ថបទថ្មី