ទូរសព្ទ 5G តម្លៃធូរបង្ហាញមុខជាផ្លូវការ
- 2020-03-30 02:53:51
- ចំនួនមតិ 0 | ចំនួនចែករំលែក 0
ទូរសព្ទ 5G តម្លៃធូរបង្ហាញមុខជាផ្លូវការ
ចន្លោះមិនឃើញ
កន្លងមកគេតែងតែឮថានៅឆ្នាំ ២០២០ នឹងមានស្មាតហ្វូន 5G តម្លៃធូរបង្ហាញមុខលើទីផ្សារ។ នាពេលនេះ Xiaomi ចាប់ផ្ដើមបញ្ចេញស្មាតហ្វូន 5G តម្លៃធូរមុនគេ គឺម៉ូដែល Mi 10 Lite ដែលមានតម្លៃ ៣៥០អឺរ៉ូ នៅអឺរ៉ុប ស្មើប្រមាណ ៣៨៨ដុល្លារ។
Mi 10 Lite មានបំពាក់ដោយបន្ទះឈីប Snapdragon 765G ដែលក្នុងនោះមានបំពាក់មកស្រាប់នូវ Modem 5G ហើយវាមានប្រព័ន្ធបញ្ចុះកម្ដៅ LiquidCool ជួយឲ្យកាត់បន្ថយកម្ដៅទូរសព្ទបានយ៉ាងល្អ។
វាមានបំពាក់ដោយអេក្រង់ AMOLED ទំហំ ៦,៥៧ អ៊ីញ ដែលអេក្រង់នេះមានប្រើប្រាស់រចនាបថដំណក់ទឹកសម្រាប់បំពាក់កាមេរ៉ា Selfie ទំហំ ១៦MP និងផលិតបានស្មាតហ្វូនមានអេក្រង់លាតសន្ធឹងពេញទី។
កាមេរ៉ាបួនគ្រាប់នៅផ្នែកខាងក្រោយគឺមានកាមេរ៉ាមេទំហំ ៤៨MP ចំណែកកាមេរ៉ាបីគ្រាប់ទៀតមិនទាន់បង្ហាញលក្ខណៈសម្បត្តិនៅឡើយទេ។ យ៉ាងណាក្ដី Xiaomi បានបង្ហើបអំពីចំណុចពិសេសៗមួយចំនួននៃកាមេរ៉ាមានដូចជាការថត Pro Mode, Shoot Steady និងមុខងារ AI ដ៏វៃឆ្លាតផងដែរ។
Mi 10 Lite មានបំពាក់ដោយថ្មទំហំ ៤១៦០ mAh ជាមួយល្បឿនសាក ២០ វ៉ាត់, វានឹងមានជម្រើសពណ៌ស ប្រផេះ និងពណ៌បៃតង, វាមានជម្រើសអង្គផ្ទុកទំហំ ៦៤GB និង ១២៨GB ដែលនឹងចេញលក់ចាប់ពីដើមខែឧសភា៕