ទំនងជាដល់ពេលហើយ! សាយ សៀរ៉ា ប្រកាសផ្អាកពីសិល្បៈទៅរៀបការហើយ
- 2020-04-01 03:39:16
- ចំនួនមតិ 0 | ចំនួនចែករំលែក 0
ទំនងជាដល់ពេលហើយ! សាយ សៀរ៉ា ប្រកាសផ្អាកពីសិល្បៈទៅរៀបការហើយ
ចន្លោះមិនឃើញ
តារាសម្ដែងវ័យកណ្ដាលរូបសង្ហា លោក សាយ សៀរ៉ា ប្រកាសថា រូបលោកនឹងឃ្លាតឆ្ងាយពីសិល្បៈមួយរយៈចាប់ពីឆ្នាំ២០២១ ពោលគឺនៅពេលដែលលោកមានវ័យ៤០ឆ្នាំ។ មូលហេតុ នៃការដើរចេញពីពិភពសិល្បៈមួយរយៈនេះ ត្រូវបានលោកបញ្ជាក់ថា លោកនឹងជ្រើសរើសយកនារីម្នាក់ជាគូគាប់ ហើយរៀបការបង្កើតជាគ្រួសារតូចមួយ។
សាយ សៀរ៉ា ដែលឆ្នាំនេះមានវ័យ៣៩ឆ្នាំទៅហើយនោះ បានប្រាប់ Sabay ថា កន្លងទៅលោកធ្លាប់លួចស្រឡាញ់នារីពីរ បីនាក់ដែរ តែដោយចិត្ដស្រឡាញ់សិល្បៈ ទើបលោកពន្យារពេលគិតគូររឿងជីវិតផ្ទាល់ខ្លួនរហូតដល់វ័យនេះ។
ឥឡូវលោកគិតច្បាស់ហើយថា នឹងរៀបការជាមួយនារីអ្នកជំនួញណាម្នាក់នៅឆ្នាំ២០២១ ប៉ុន្ដែពេលនេះលោកមិនទាន់មើលឃើញនារីណាម្នាក់នៅឡើយទេ។
នៅក្នុងពិធីមង្គលការរបស់តារាសម្ដែងម៉ាក់ សែនសូនីតា កាលពីដើមខែមីនា កន្លងទៅ គេឃើញលោក សាយ សៀរ៉ា បណ្ដើរ និងរួមតុអាហារជាមួយស្ត្រីវ័យចំណាស់ម្នាក់ដែលគេស្គាល់ថាជាម្ដាយរបស់លោកទាំងទឹកមុខស្រគត់ស្រគំ និងឯកា ខណៈដែលតារាផ្សេងៗមានគូត្រសង។
តារាសម្ដែងរូបនេះ បានប្រឡូកក្នុងវិស័យសិល្បៈតាមរយៈការសម្ដែងតួអង្គក្នុងបទចម្រៀងខារ៉ាអូខេ និងភាពយន្តតាំងពីឆ្នាំ២០០៥។ សៀរ៉ា នឹងឃ្លាតឆ្ងាយពីសិល្បៈដោយមិនបានកំណត់ពេលចូលប្រឡូកវិញ។
ប៉ុន្ដែលោកថា ចិត្ដ និងបេះដូងរបស់លោកនៅតែស្រឡាញ់អាជីពនេះ បើទោះបីជាបច្ចុប្បន្នការងារសិល្បៈមិនសូវមានហាងឆេងសម្រាប់សិល្បករ-សិល្បការិនីដែលមានវ័យកណ្ដាលដូចជារូបលោកក៏ដោយ៕