មើលតម្លៃត្រកូល OnePlus 8 ទើបលេចធ្លាយ មិនថោកប៉ុន្មានឡើយ
- 2020-04-09 04:02:01
- ចំនួនមតិ 0 | ចំនួនចែករំលែក 0
មើលតម្លៃត្រកូល OnePlus 8 ទើបលេចធ្លាយ មិនថោកប៉ុន្មានឡើយ
ចន្លោះមិនឃើញ
៦ ថ្ងៃទៀតប៉ុណ្ណោះ OnePlus 8 និង OnePlus 8 Pro នឹងប្រកាសចេញជាផ្លូវការ។ ប៉ុន្តែគេដឹងមុនអំពីលក្ខណៈសម្បត្តិនិងចំណុចពិសេសរបស់តាមរយៈការលេចធ្លាយមិនចេះចប់ ហើយថ្ងៃនេះប្រភពចេញពី Roland Quandt បានបង្ហាញអំពីតម្លៃរបស់ស្មាតហ្វូនជំនាន់ថ្មីទាំងពីរ។
ផ្អែកតាមដំណឹងដែល Roland Quandt ទទួលបានពីហាងលក់រាយមួយនៅអឺរ៉ុប បានឲ្យដឹងថា OnePlus 8 RAM8GB/ROM128GB គឺមានតម្លៃ ៧១៩ អឺរ៉ូ និង ៧២៩ អឺរ៉ូ នៅទូទាំងអឺរ៉ុបអាស្រ័យលើទីផ្សារនីមួយៗ។ ចំណែកប្រភេទ RAM12GB/ROM256GB គឺមានតម្លៃចន្លោះពី ៨១៩ អឺរ៉ូ និង ៨២៩ អឺរ៉ូ។
តម្លៃទាំងនេះមិនថ្លៃនោះទេប្រសិនបើប្រៀបធៀបនឹងពពួក Flagship នាពេលបច្ចុប្បន្ន ប៉ុន្តែវាឡើងថ្លៃច្រើនបើធៀបនឹង OnePlus ជំនាន់មុន។ ជាក់ស្ដែង OnePlus 7T ដែលប្រកាសចេញកាលពីខែតុលាកន្លងទៅ ប្រភេទ RAM8GB/ROM128GB មានតម្លៃ ៥៨៩ អឺរ៉ូ និង ៥៩៩ អឺរ៉ូ នៅអឺរ៉ុប។
ចំណែក OnePlus 7T Pro មានតម្លៃ ៧៥៩ និង ៧៦៩ អឺរ៉ូ ប៉ុន្តែវាមិនបន្សល់តម្លៃដ៏ទាក់ទាញនេះដល់ OnePlus 8 Pro ដែលជាអ្នកស្នងតំណែងនោះទេ។ OnePlus 8 Pro មានតម្លៃលក់រាយ ៩១៩ និង ៩២៩ អឺរ៉ូ នៅអឺរ៉ុប សម្រាប់ប្រភេទ 8GB/128GB។
ឯប្រភេទ 12GB/256GB វិញគឺមានតម្លៃ ១០០៩ និង ១០១៩ អឺរ៉ូ ឯណោះ។ នេះជាលើកដំបូងហើយដែលស្មាតហ្វូន OnePlus មានតម្លៃលើស ១០០០ អឺរ៉ូ ហើយវាថែមទាំងថ្លៃជាង OnePlus 7T Pro McLaren Edition (តម្លៃ ៨៥៩ អឺរ៉ូ) ទៀតផង។
ហេតុផលចម្បងពីក្រោយការឡើងថ្លៃនេះគឺ OnePlus ធ្លាប់បានបញ្ជាក់ដែរ នោះគឺ Modem 5G Snapdragon X55 ដែលមានបង្កប់នៅលើបន្ទះឈីប Snapdragon 865 មករួចជាស្រេច។ កត្តាផ្សេងទៀតទំនងជាការពង្រឹងសមត្ថភាពកាមេរ៉ាលើម៉ូដែលទាំងពីរ, វត្តមានការសាកថ្មឥតប្រើខ្សែជាលើកដំបូង និងអេក្រង់ល្អលើសមុនជាដើម៕