ថ្ងៃសម្រាកចាំបាច់ទៅណាឆ្ងាយ! សាកធ្វើ "មាន់ដុតទឹកដោះគោទឹកឃ្មុំ និងបាយខ្ទិះដូង"ធានាជក់មាត់ជិបៗ

2020-04-30 08:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការបរិភោគអាហារនៅផ្ទះ ជាពេលវេលាដ៏ល្អបំផុតសម្រាប់ការជួបជុំគ្រួសារឲ្យរីករាយ និងទទួលអាហារដោយសុវត្ថិភាព បើទោះបីរវល់ការងារយ៉ាងណា អ្នកគួរឆ្លៀតពេលធ្វើអាហារសម្រាប់ថ្ងៃសម្រាកដោយខ្លួនឯង និងគ្រួសារផងដែរ។ ថ្ងៃនេះ កញ្ញា សូមណែនាំអ្នកទាំងអស់គ្នាពីរបៀបធ្វើ "មាន់ដុតទឹកដោះគោទឹកឃ្មុំ និងបាយខ្ទិះដូង" ញ៉ាំជាមួយគ្នាធានាជក់មាត់ជិបៗ មិនខាន។ តោះឥឡូវយើងទៅដឹងគ្រឿងផ្សំនិងវិធីខាងក្រោមនេះ៖

១. បាយខ្ទិះដូង

គ្រឿងផ្សំ៖

អង្ករផ្កាម្លិះ១ កំប៉ុង

ទឹក ៣/៤ កំប៉ុង

ខ្ទិះដូង ១/២ កំប៉ុង

ស្ករស ១,៥ ស្លាបព្រាបាយ

អំបិល ១ ស្លាបព្រាបាយ

វិធីធ្វើ៖

ដាក់ទឹក ខ្ទិះដូង ស្ករស និងអំបិលចូលក្នុងឆ្នាំងចម្អិន (ឆ្នាំងអគ្គិសនី) កូរវាឲ្យសព្វ ហើយដាក់ដាំ រហូតដល់ពុះ។
លាងអង្ករជាមួយទឹក (មិនមែនទឹកក្ដៅ) ច្របាច់លាងឲ្យស្អាត ហើយចម្រុះទឹកឲ្យស្ងួតពីអង្ករដូចយើងលាងរាល់ដង។
ទឹកខ្ទិះដូងពុះ ហើយដាក់អង្ករលាងរួចនោះចូល កូរវាឲ្យសព្វ (ប្រយ័ត្នកុំឲ្យរលាកដៃ) ហើយដាក់ដាំវាម្ដងទៀត។
នៅពេលបាយឆ្អិន សូមកុំទាន់បើកគម្រប ដោយទុកវាចោលប្រមាណ ១០នាទី (ធ្វើដូចនេះ ទើបបាយស្រុះទឹកបានល្អ) ហើយអាចទទួលទាននូវរសជាតិថ្មីប្លែកនេះដោយរីករាយជាមួយក្រុមគ្រួសារ។ សូមទស្សនាវីដេអូបន្ថែម៖

២. មាន់ដុតទឹកដោះគោទឹកឃ្មុំ

គ្រឿងផ្សំ៖

មាន់ ១ទាំងមូល

ឫសវ៉ាន់ស៊ុយ ៥ឬស

ខ្ទឹមស ១០កំពឹស

ម្រេចគ្រាប់ពណ៌ស ១ស្លាបព្រាបាយ

ស្ករត្នោត ៤ស្លាបព្រាបាយ

ទឹកឃ្មុំ ១២០ក្រាម

ទឹកដោះគោឆៅ ៤ស្លាបព្រាបាយ

ទឹកស៊ីអ៊ីវខាប់ ១ស្លាបព្រាបាយ

ទឹកស៊ីអ៊ីវ ៣ស្លាបព្រាបាយ

ទឹកប្រេងខ្យង ៣ស្លាបព្រាបាយ

បាយដំណើប និងទឹកជ្រលក់សម្រាប់ញ៉ាំជាមួយ។

វិធីធ្វើ៖

បុកឫសវ៉ាន់ស៊ុយ ខ្ទឹមស និងម្រេចគ្រាប់ឲ្យម៉ដ្ឋ។
យកគ្រឿងដែលបុកហើយ មកលាយស្ករត្នោត ទឹកឃ្មុំ ទឹកដោះគោឆៅ ទឹកស៊ីអ៊ីវខាប់ ទឹកស៊ីអ៊ីវ ប្រេងខ្យង ហើយកូរឲ្យចូលជាតិគ្នា រួចយកប្រឡាក់ជាមួយសាច់មាន់ឲ្យសព្វ ទុក២០នាទី។ - យកមាន់ដែលប្រឡាក់រួចមករៀបចំដាក់ដុត បើកភ្លើង ១៧០អង្សា រយៈពេល ៣០ទៅ៤៥នាទី (ល្មមសាច់មាន់ឆ្អិន)។ បើមិនមានចង្ក្រាន Microwave ទេ អាចប្រើឆ្នាំងធម្មតា ឬដាក់អាំងក៏បាន ។ - នៅពេលសាច់មាន់ឆ្អិនហើយ អាចកាប់ជាដុំៗ ទទួលទានជាមួយបាយដំណើប និងទឹកជ្រលក់ហឹរៗ។ សូមទស្សនាវីដេអូបន្ថែម៖

អត្ថបទ៖ ស៊ិន សាវ៉េត