ភាពយន្តខ្នាតធំ ប្រើតួជិត២០០០នាក់ បើកសម្ពោធយប់មិញ
- 2014-11-20 17:53:48
- ចំនួនមតិ 0 | ចំនួនចែករំលែក 0
ភាពយន្តខ្នាតធំ ប្រើតួជិត២០០០នាក់ បើកសម្ពោធយប់មិញ
ចន្លោះមិនឃើញ
ខ្សែភាពយន្តរឿង "ទ្វាររបង ឬ The Gate” “ Les temps des aveux”ជាខ្សែភាពយន្តខ្នាតធំ ដែលនិយាយទាក់ទងនឹងប្រវត្តិសាស្ត្រកម្ពុជាក្នុងអំឡុងពេលមុនខ្មែរក្រហមគ្រប់គ្រងអំណាច បានបើកសម្ពោធហើយកាលពីល្ងាចមិញនេះ នៅរោងភាពយន្តទំនើប MAJOR CINEPLEX BY CELLCARD។
រឿង"ទ្វាររបង" ឬ The Gate” “ Les temps des aveux”ត្រូវបានផលិតឡើងក្រោមកិច្ចសហផលិត រវាងផលិតកម្ម Goumont ផលិតកម្ម Les films du cap របស់ប្រទេសបារាំង ជាមួយផលិតកម្មបុប្ផាណា នៃ ប្រទេសកម្ពុជា។ សាច់រឿងទាំងមូល ត្រូវបានដកស្រង់ឡើងពីសៀវភៅរបស់លោក ហ្វ្រង់ស្វ័រ ប៊ីហ្សូ ដែលបានចងក្រងពីប្រវត្តិសាស្ត្រ កម្ពុជាក្នុងអំឡុងពេលមុនខ្មែរក្រហមគ្រប់គ្រងអំណាច។
បើតាមការឲ្យដឹងពីលោក ជៀប សុវិជ្ជា នាយកមជ្ឈមណ្ឌលបណ្ដុះបណ្ដាលជំនាញ និងទទួលថតភាពយន្តនៅកម្ពុជា ខ្សែភាពយន្តមួយនេះបានប្រើពេលជាង២ឆ្នាំក្នុងការផលិតឡើង ដោយរយៈពេលនេះ បូកបញ្ចូលតាំងការស្វែងរកទីតាំងដើម្បីថត តួសម្ដែង ក៏ដូចជា ឯកសារផ្សេងៗទៀត។
ប្លង់នៃសាច់ទាំងមូល ត្រូវបានថតនៅក្នុងប្រទេសកម្ពុជាទាំងអស់ ក្នុងនោះមាន ខេត្ត បាត់ដំបង់ សៀមរាប បន្ទាយមានជ័យ ព្រះវិហារ និង រាជធានីភ្នំពេញ ក្នុងរយៈពេលនៃ ការរៀបចំកន្លែងថតមានចំនួន៤៥ថ្ងៃ និងចំនួនថ្ងៃថត ៣៦ថ្ងៃ។
លោក ជៀប សុវិជ្ជា បានឲ្យដឹងទៀតថា ខ្សែភាពយន្តដែលមានការចូលរួមរវាងផលិតកម្មធំៗមកពីប្រទេសបារាំង និងកម្ពុជានេះ បានប្រើប្រាស់អ្នកបច្ចេកទេសនិងក្រុមការងារ មានរហូតដល់ទៅ២២៤នាក់ឯណោះ ក្នុងនោះជនជាតិបារាំងចំនួន ៤៣នាក់ ជនជាតិខ្មែរចំនួន១៨១នាក់។
ចំណែកតារាសម្ដែងមានរហូតដល់ទៅ ១៨០៤ នាក់ ក្នុងនោះតួសម្ដែងសំខាន់ជនជាតិបារាំង១នាក់ តួសម្ដែងសំខាន់ជនជាតិខ្មែរ៣នាក់ តួបន្ទាប់បន្សំបរទេសចម្រុះជាតិសាស្ត្រ៨៤៥នាក់ និង តួបន្ទាប់បន្សំជនជាតិខ្មែរចំនួន៩៥៩នាក់ ។
ពិធីសម្ពោធរឿង"ទ្វាររបង ឬ”The Gate” “ Les temps des aveux” កាលពីល្ងាចម្សិលមិញនេះ មានការចូលរួមពី រដ្ឋមន្ត្រីក្រសួងព័ត៌មាន រដ្ឋមន្ត្រីក្រសួង វប្បធម៌វប្បធម៌ និងវិចិត្រសិល្បៈ មន្ត្រីស្ថានទូតបារាំង ផលិតករ អ្នកដឹកនាំរឿងតួសម្ដែង និងភ្ញៀវជាតិអន្តរជាតិជាច្រើនរូបទៀត។
លោកជំទាវ ភឿង សកុណា រដ្ឋមន្ត្រីក្រសួងវប្បធម៌វប្បធម៌ និងវិចិត្រសិល្បៈ បានឲ្យដឹងថា ប្រទេសកម្ពុជា និងបារាំង ការចុះកិច្ចព្រមព្រៀងស្ដីពីសហផលិតកម្មភាពយន្តកាលពីថ្ងៃទី០៤ ខែ វិច្ឆិកា ឆ្នាំ ២០១៣។ កិច្ចព្រមព្រៀងនេះ គឺដើម្បីរឹតចំណងលើវិស័យភាពយន្ត បារាំងកម្ពុជា ឲ្យមានការផ្លាស់ប្ដូររវាងអ្នកជំនាញផ្នែកភាពយន្តទាំងពីរសញ្ជាតិឲ្យកាន់តែខ្លាំងក្លាថែមទៀត និងជួយបង្កភាពងាយស្រួលដល់ផលិតករ ក្នុងការចេញចូលថតខ្សែភាពយន្ត ក្នុងប្រទេសទាំង២។
រឿង "ទ្វាររបង ឬ The Gate” “ Les temps des aveux” គឺជាខ្សែភាពយន្តទី១ហើយ ដែលបានផលិតឡើងរវាងផលិតករបារាំង និងកម្ពុជា បន្ទាប់ពីចុះហត្ថលេខាជាមួយគ្នា។លោកជំទាវ រដ្ឋមន្ត្រីក្រសួង បានលើកទឹកចិត្ត និងសង្ឃឹមយ៉ាងមុតមាំថា ប្រទេសទាំងពីរនឹងបន្តផលិតខ្សែភាពយន្តនានាកាន់តែច្រើនបន្ថែមទៀត៕
https://www.youtube.com/watch?v=3L0_3trzGIo
អត្ថបទ៖ ខុត សីហា