ល្អាងភ្នំប្រាក់ ប្រៀបដូចដាននាគដ៏អាថ៌កំបាំង នៅខេត្តស្ទឹងត្រែង (វីដេអូ)

2020-05-24 17:19:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ល្អាងភ្នំប្រាក់ ដែលស្ថិតនៅក្នុងរបៀងអភិរក្សជីវៈចម្រុះ ក្នុងភូមិវើនសៀន ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង នៅតែជាចម្ងល់ស្រាយមិនចេញ របស់អ្នកភូមិ និងភ្ញៀវទេសចរ ដែលបានទៅទស្សនា ពីមូលហេតុនៃការកកើតរបស់វា។

លោក យ៉េន ម៉ី ប្រធានសហគមន៍អេកូទេសចរណ៍តំបន់អូរស្វាយ ធ្លាប់បានថ្លែងប្រាប់ Sabay ថា ពុំទាន់មាននរណាម្នាក់ដឹងពីមូលហេតុ នៃការកកើតល្អាងនេះនៅឡើយទេ មិនដឹងថា វាកើតដោយធម្មជាតិ ឬក៏មនុស្សជាអ្នកដាប់ថ្មធ្វើ។ វាមានប្រវែងរាប់រយម៉ែត្រ ក្នុងថ្មជម្រៅជាងមួយម៉ែត្រ និងបត់បែនប្រៀបដូចជាដានពស់ ឬនាគវៀរដូច្នោះដែរ។ បុរសវ័យ ជាង ៥០ឆ្នាំ បានបន្តថា៖ «តាំងពីខ្ញុំធំឡើង ឆ្លងកាត់សម័យសង្គ្រាមមកដល់ពេលនេះ ខ្ញុំក៏ឃើញ ល្អាងភ្នំប្រាក់បែបនេះរហូតមក ហើយពេលសួរចាស់ៗ ក៏ពួកគាត់មិនដឹងដូចគ្នា"។

អ្នកស្រី ហម ចាន់ថន អ្នកនាំភ្ញៀវទេសចរណ៍នៅរមណីយដ្ឋានអូរស្វាយ ក៏បានលើកឡើងផងដែរថា អ្នកស្រីក៏មិនបានដឹងពីប្រវត្តិនៃការកកើតល្អាងភ្នំប្រាក់នេះដូចគ្នា។ ល្អាងភ្នំប្រាក់នេះស្ថិតនៅកណ្តាលព្រៃសហគមន៍ដែលក្លាយជាតំបន់ដ៏អស្ចារ្យសម្រាប់បោះជំរំកម្សាន្ត។ រហូតដល់ពេលនេះ មានភ្ញៀវទេសចរតិចតួចបំផុតបានទៅដល់ទីនោះ រួមទាំងភ្ញៀវបរទេស២ឬ៣នាក់ ក៏ធ្លាប់ទៅផ្ដិតរូបភាពដែរ ហើយក៏មិនដឹងមូលហេតុ។ រីឯឯកសារក៏គ្មានផងដែរ ដូច្នេះហើយទើបវា នៅតែចម្ងល់មួយ រហូតដល់សព្វថ្ងៃ។

ល្អាងភ្នំប្រាក់ ស្ថិតនៅជើងភ្នំប្រាក់ មានចម្ងាយប្រហែល ១៨គីឡូម៉ែត្រ ពីឃុំអូរស្វាយ។ ដើម្បីទៅដល់ល្អាងភ្នំមួយនេះ ភ្ញៀវទេសចរត្រូវធ្វើដំណើរដោយជិះទូកតាមដៃទន្លេមេគង្គ រយៈពេលប្រហែល១ម៉ោង ទើបដល់ភូមិវឿនសៀន រួចបន្តធ្វើដំណើរដោយថ្មើរជើង ឬជិះគោយន្តចូលទៅព្រៃ៣គីឡូម៉ែត្រទៀត៕

សូមទស្សនាវីដេអូវពីកម្មវិធីផ្លូវទៅស្រុក វគ្គ១ របស់ Sabay ដែលថតកាលពីចុងឆ្នាំ២០១៦ ខាងក្រោមនេះ៖