មិនគួរឱ្យជឿ កីឡាករថៃ ជាអ្នកបំបែកកំណត់ត្រាមិនដែលចាញ់៥០ប្រកួតរបស់ Floyd

2020-06-22 07:55:37
ចំនួនមតិ 0 | ចំនួនចែករំលែក 0

ចន្លោះមិនឃើញ

Floyd Mayweather ជាអ្នកប្រដាល់មិនដែលចាញ់របស់អាមេរិក ដែលមានកំណត់ត្រា៥០-០ និងបានប្រកាសចូលនិវត្តន៍បាត់ទៅហើយ។

តែកំណត់ត្រាដ៏អស្ចារ្យនេះ ត្រូវបានគេបំបែកបានទៅហើយ ដោយកីឡាករជនជាតិថៃឈ្មោះថាWanheng Menayothin មានរហស្សនាមថា "Dwarf Giant"។ អ្នកប្រដាល់មាឌល្អិតចិត្តធំនៅជាប់របងកម្ពុជានេះ បានប្រកាសចូលនិវត្តន៍កាលពីពេលកន្លងទៅនេះ ដោយបញ្ចប់ត្រឹមកំណត់ត្រា៥៤ប្រកួត ឈ្នះទាំង៥៤ប្រកួត។ ហើយ ៥៤-០ នេះដែរ ក៏បានបំបែកកំណត់ត្រារបស់ Floyd បាត់ទៅហើយ ក្នុងនាមជាអ្នកមិនដែលចាញ់បានច្រើនប្រកួត។

ការពិតទៅ Menayothin បានបំបែកកំណត់ត្រារបស់ Floyd បានតាំងពីរូបគេវៃឈ្នះប្រកួតទី៥១មកម្ល៉េះនៅឆ្នាំ២០១៨ ប៉ុន្តែគ្រានោះមិនទាន់ចូលនិវត្តន៍។ ខណៈដែលការប្រកាសចូលនិវត្តន៍កន្លងទៅ ដែលមានកំណត់ត្រាឈ្នះ៥៤ប្រកួតនេះ គឺល្មមសម្រាប់បញ្ចប់ភាពអស្ចារ្យរបស់អ្នកប្រដាល់អាមេរិកបានហើយ។

Menayothin ទើបតែវ័យ៣៤ឆ្នាំប៉ុណ្ណោះ ប៉ុន្តែដោយសារតែសាមីខ្លួនបញ្ជាក់ថាកាយសម្បទាលែងអំណោយផលហើយនោះ ទើបរូបគេសម្រេចចិត្តចូលនិវត្តន៍តែម្ដង។ សាមីខ្លួនថែមទាំងនិយាយទៀតថា លុយពិតជាសំខាន់ ប៉ុន្តែអ្វីដែលសំខាន់លើសលុយទៀតនោះ គឺសុខភាពរបស់គេតែម្ដង៕

ប្រភព៖ The Sun អត្ថបទ៖ ប្រុស យុទ្ធ