ពេលណាទើបម្ចាស់ iPhone អាចដំឡើង iOS 14 បាន?
- 2020-06-25 03:26:14
- ចំនួនមតិ 0 | ចំនួនចែករំលែក 0
ពេលណាទើបម្ចាស់ iPhone អាចដំឡើង iOS 14 បាន?
ចន្លោះមិនឃើញ
ក្រោយពីបានបង្ហាញចេញប្រព័ន្ធប្រតិបត្តិការ iOS 14 ភ្លែត Apple បានបញ្ចេញនូវ iOS 14 ប្រភេទ Developer Beta សម្រាប់ឲ្យ Developer ប្រើប្រាស់សាកល្បងដើម្បីចូលរួមដោះស្រាយនូវបញ្ហាដែលមានលើប្រព័ន្ធប្រតិបត្តិការជំនាន់ថ្មី។
Apple បាននិយាយថា iOS 14 ប្រភេទ Public Beta នឹងត្រូវបញ្ចេញនាខែកក្កដាខាងមុខ។ ពេលដែលវាចេញមក អ្នកប្រើប្រាស់ធម្មតានឹងអាចដំឡើងវានៅលើ iPhone ដោយមិនបាច់ទាល់តែចុះឈ្មោះជា Developer នោះទេ។ គួរដឹងថា iOS 14 ប្រភេទ Public Beta នឹងនៅតែមានបញ្ហាខ្លះៗមិនខុសពី Developer Beta ប៉ុន្មានឡើយ គ្រាន់តែមានបញ្ហាតិចជាង អាចឲ្យអ្នកប្រើធម្មតាសាកល្បងបាន។ Apple មិនបានបញ្ជាក់អំពីកាលបរិច្ឆេទជាក់លាក់នៃខែកក្កដានោះទេ វាអាចលឿនបំផុតក្នុងសប្ដាហ៍ក្រោយ ប៉ុន្តែក៏ទំនងជានឹងត្រូវចាំដល់ពាក់កណ្ដាល ឬដល់ចុងខែកក្កដាឯណោះ។
សម្រាប់អ្នកដែលមិនចង់ប្រើប្រាស់ប្រភេទ Beta ទាំងពីរ នឹងត្រូវរង់ចាំរហូតដល់រដូវស្លឹកឈើជ្រុះ ដែលពេលនោះ Apple នឹងបញ្ចេញ iOS 14 ប្រភេទផ្លូវការ។ ជាធម្មតាការបញ្ចេញ iOS ជំនាន់ថ្មីឲ្យប្រើជាផ្លូវការគឺកើតមានអំឡុងពេលខែកញ្ញា ស្របពេលនឹងការចេញលក់ iPhone ជំនាន់ថ្មី។
របាយការណ៍ថ្មីៗនេះបានសន្និដ្ឋានថា iPhone 12 នឹងចេញលក់យឺតយ៉ាវ ដោយអាចអូសបន្លាយដល់ខែតុលា ប៉ុន្តែមិនច្បាស់ថា iOS 14 នឹងត្រូវអូសបន្លាយដល់ខែតុលាដែរឬយ៉ាងណានោះទេ។ មកទល់ពេលនេះ "រដូវស្លឹកឈើជ្រុះ” ជាតម្រុយតែមួយគត់ដែល Apple បានផ្ដល់ឲ្យ។ រដូវស្លឹកឈើជ្រុះនៅអាមេរិក ជាទូទៅកើតមានចន្លោះចុងខែកញ្ញា ដល់ចុងខែធ្នូ៕