iOS 14 ចាប់បាន TikTok លួចអានព័ត៌មានអ្នកប្រើ

2020-06-29 02:51:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបានអាប់ដេតឡើងទៅកាន់ iOS 14 ប្រភេទ Beta (សាកល្បង) រួចមក មានអ្នកប្រើប្រាស់មួយចំនួនទទួលបានសារឥតឈប់ឈរដែលបង្ហាញថាកម្មវិធី TikTok បានចូលទៅកាន់ Clipboard របស់អ្នកប្រើប្រាស់។

មានអ្នកប្រើប្រាស់ម្នាក់បានបង្ហោះវីដេអូបង្ហាញអំពីសកម្មភាពនេះ ដែល iOS 14 បានប្រាប់ថា TikTok បានចូលទៅកាន់ Clipboard។ វីដេអូអាចទាក់ទាញចំនួនទស្សនាបានច្រើនសន្ធឹក ហើយមានភាគច្រើនសរសេរ Comment សរសើរ Apple ដែលការពារភាពជាឯកជនរបស់អ្នកប្រើផងដែរ។

បើផ្អែកតាម Telegraph បានឲ្យដឹងថា ក្រោយពីគេដឹងរឿងនេះ TikTok បានបញ្ចេញកំណែទម្រង់ថ្មីលើ App Store ដើម្បីបំបាត់បញ្ហានេះ។ ក្រុមហ៊ុនបានបកស្រាយថា កម្មវិធី TikTok ចូលទៅកាន់ Clipboard ដើម្បីវិភាគ និងទប់ស្កាត់កុំឲ្យមានការសរសេរ Comment Spam (សរសេរពាក្យរំខានដដែលៗ) ដោយមិនមានចេតនាបំពានភាពឯកជនរបស់អ្នកប្រើនោះទេ។ យ៉ាងណាក្ដី ក្រុមហ៊ុនមិនបានបញ្ជាក់ថាបានលុបមុខងារនេះចេញពីកម្មវិធីសម្រាប់ Android ដែរឬយ៉ាងណានោះទេ។

Okay so TikTok is grabbing the contents of my clipboard every 1-3 keystrokes. iOS 14 is snitching on it with the new paste notification pic.twitter.com/OSXP43t5SZ
— Jeremy Burge (@jeremyburge) June 24, 2020

លើស្មាតហ្វូន នៅពេលដែលអ្នកប្រើប្រាស់ធ្វើការ Copy ពាក្យឬឃ្លា វានឹងត្រូវរក្សាទុកលើ Clipboard ហើយនឹងលុបចេញវិញពេលដែលអ្នកប្រើប្រាស់បាន Paste វាទៅកាន់កន្លែងណាផ្សេង។ ចាប់តាំងពីខែមីនា អ្នកជំនាញសុវត្ថិភាពបានរកឃើញថានៅលើ iPhone និង Android មានកម្មវិធីមួយចំនួន បានអានទិន្នន័យលើ Clipboard របស់អ្នកប្រើដោយគ្មានការអនុញ្ញាត។ កម្មវិធីទាំងនោះមាន TikTok, Weibo និង Accuweather ជាដើម។

កម្មវិធីទាំងនោះគ្រាន់តែអាន (Read) មិនប្រមូលយកទិន្នន័យនោះឡើយ ប៉ុន្តែ Developer នៅតែបារម្ភថានាថ្ងៃខាងមុខ ទម្លាប់មួយនេះអាចធ្វើឲ្យព័ត៌មានសម្ងាត់របស់អ្នកប្រើត្រូវលេចធ្លាយ ព្រោះថាមានអ្នកប្រើខ្លះបាន Copy លេខសម្ងាត់, អាសយដ្ឋានអ៊ីមែល ពីកម្មវិធីមួយទៅកម្មវិធីមួយ។

កាលពីខែមីនា TikTok បានបញ្ជាក់ដល់សារព័ត៌មាន Telegraph ថាខ្លួននឹងដកចេញមុខងារដែលអាន Clipboard នេះក្នុងពេលប៉ុន្មានសប្ដាហ៍ខាងមុខ។ យ៉ាងណាក្ដី ការដែល iOS 14 លោតសារបញ្ជាក់បែបនេះ មានន័យថា TikTok មិនបានគោរពតាមពាក្យសន្យានោះទេ៕

ប្រភព៖ vnexpress ប្រែសម្រួល៖ សុខហេង