TikTok ធ្លាប់ខាតលុយជាង ៥០ម៉ឺនដុល្លារមួយថ្ងៃ ពេលត្រូវឥណ្ឌាបិទឆ្នាំមុន
- 2020-06-30 07:55:58
- ចំនួនមតិ 0 | ចំនួនចែករំលែក 0
TikTok ធ្លាប់ខាតលុយជាង ៥០ម៉ឺនដុល្លារមួយថ្ងៃ ពេលត្រូវឥណ្ឌាបិទឆ្នាំមុន
ចន្លោះមិនឃើញ
ក្រសួងបច្ចេកវិទ្យាព័ត៌មានរបស់ប្រទេសឥណ្ឌា បានធ្វើការហាមឃាត់ ឈប់ឱ្យប្រើប្រាស់កម្មវិធីទូរសព្ទ ចំនួន ៥៩កម្មវិធី ដែលមាននៅលើប្រព័ន្ធប្រតិបត្តិការ Android និងប្រព័ន្ធប្រតិបត្តិការ iOS ក្រោយពីពិនិត្យឃើញពីគុណវិបត្តិជាច្រើន ពាក់ព័ន្ធនឹងកម្មវិធីទាំងអស់នេះ ដែលភាគច្រើនត្រូវបានដាក់ឱ្យប្រើប្រាស់សម្រាប់ផ្សព្វផ្សាយពាណិជ្ជកម្ម និងដើម្បីបម្រើផលប្រយោជន៍ឱ្យក្រុមហ៊ុនពួកគេតែប៉ុណ្ណោះ ម្យ៉ាងវិញទៀត កម្មវិធីនេះអាចធ្វើឱ្យប៉ះពាល់ដល់សិទ្ធិបុគ្គល ក៏ដូចជាសិទ្ធិថ្នាក់ដឹកនាំ ក្នុងការលួចទាញយកទិន្នន័យទៀតផង។ TikTok ក៏ជាកម្មវិធីមួយដែលស្ថិតក្នុងចំណោមនោះ ហើយការបិទឈប់ឲ្យប្រើនេះ នឹងធ្វើឲ្យ TikTok ត្រូវខាតបង់លុយច្រើនសន្ធឹក។
គួរដឹងថាកាលពីខែមេសាឆ្នាំមុន ឥណ្ឌាធ្លាប់បិទកម្មវិធី TikTok រយៈពេលមួយសប្ដាហ៍ ដោយពេលនោះតាមពាក្យបណ្ដឹងរបស់រដ្ឋាភិបាលឥណ្ឌា បានចោទប្រកាន់ថា TikTok ជាបណ្ដុំកម្មវិធីមានចែកចាយមាតិកាមិនសមរម្យនិងអាសអាភាសដែលផ្ដោតខ្លាំងលើកុមារនិងមនុស្សវ័យជំទង់។ ក្រុមហ៊ុនដែលជាអ្នកបង្កើតកម្មវិធី TikTok ឡើង ឈ្មោះថា Bytedance Technology បាននិយាយថាអំឡុងពេលបិទមួយសប្ដាហ៍នេះ ក្រុមហ៊ុនត្រូវខាតបង់ទឹកប្រាក់ជាង ៥០ម៉ឺនដុល្លារក្នុងមួយថ្ងៃ ហើយជាង ២៥០នាក់ត្រូវប្រឈមមុខបាត់បង់ការងារថែមទៀតផង។
តួលេខពីក្រុមហ៊ុនវិភាគ Sensor Tower ចេញផ្សាយកាលពីខែមេសា បានឲ្យដឹងថាឥណ្ឌាជាប្រទេសដែលបានដំឡើងកម្មវិធី TikTok ច្រើនជាងគេ ដែលមានចំនួនទាញយកសរុប ៦១១លានដង ស្មើនឹង ៣០,៣% នៃចំនួនទាញយកសរុប។ ដូចនេះជាមួយការបិទឈប់ឲ្យប្រើដោយគ្មានកំណត់រយៈពេលលើកនេះ នឹងធ្វើឲ្យកម្មវិធី TikTok ក៏ដូចជាកម្មវិធីចិនដទៃទៀតត្រូវរងការខាតបង់ជាខ្លាំង៕