មិត សាម៉ើយ នៅតែមានជំនឿចិត្តជាប់២៣នាក់ចុងក្រោយជម្រើសជាតិ U19

2020-07-16 02:02:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះមានយុវជនល្អៗមកពីក្លឹបផ្សេងគ្នាទៅធ្វើតេស្ត ក្រុមជម្រើសជាតិកម្ពុជាអាយុក្រោម១៩ឆ្នាំជាច្រើនមែន ប៉ុន្តែ មិត សាម៉ើយ នៅតែមានជំនឿចិត្តនិងរំពឹងថា រូបគេនឹងជាប់ក្នុងបញ្ជីឈ្មោះ២៣នាក់ចុងក្រោយ របស់គ្រូបង្វឹកសញ្ជាតិជប៉ុនលោក Koji Gyotoku ។

មិត សាម៉ើយ អាវទឹកក្រូច

«ការប្រកួតប្រជែងយកកៅអី២៣នាក់ បើខ្ញុំមានការរំពឹងទុកជាមុន....យើងឃើញហើយមានការប្រមូលផ្ដុំច្រើនគ្នាមែន ប៉ុន្តែខ្ញុំនៅតែជឿជាក់លើខ្លួនឯង ថាខ្លួនឯងជាប់២៣នាក់ទៅលេងនៅអ៊ូបេគីស្ថាន»។ នេះជាសម្ដីរបស់យុវជនក្លឹបនគរបាលជាតិ ក្រោយបញ្ចប់ការធ្វើតេស្តលើកដំបូងនៅពហុកីឡដ្ឋានជាតិ កាលពីថ្ងៃទី១៤ ខែកក្កដា ឆ្នាំ២០២០។

ការប្រមូលផ្ដុំមានយុវជនដល់៣៨នាក់នេះ ហើយអ្នកខ្លះជាកីឡាករថ្មីថ្មោងផងនោះ សាម៉ើយ បានបង្ហាញអារម្មណ៍រីករាយ ប៉ុន្តែគ្រាន់តែថាពួកគេលេងមិនទាន់យល់ចិត្តគ្នា និងមិនសូវមានតាក់តិចលេង ព្រោះជាការជួបជុំលើកដំបូង។

គួរបញ្ជាក់ថា មិត សាម៉ើយ ជាបេក្ខភាពមួយរូបស៊ុតបញ្ចូលទី១គ្រាប់ ជួយឱ្យក្រុមគោព្រៃជំទង់កម្ពុជា ឈ្នះថៃ ២-១ វគ្គជម្រុះតាមពូលឡើងមកវគ្គផ្ដាច់ព្រ័ត្រនៃពានរង្វាន់ AFC U-19 Championship 2020 នៅប្រទេសអ៊ូបេគីស្ថាន។

ក្រុមកីឡាបាល់ទាត់ជម្រើសជាតិកម្ពុជា U19 បានចាប់ឆ្នោតប៉ះម្ចាស់ផ្ទះអ៊ូសបេគីស្ថាន អ៊ីរ៉ង់ និងឥណ្ឌូណេស៊ី នៅពូល A សម្រាប់ការប្រកួតពានរង្វាន់ AFC U-19 Championship 2020។ សម្រាប់ជំនួបបើកឆាកU19 កម្ពុជា នឹងត្រួវតតាំងជាមួយឥណ្ឌូណេស៊ីនៅថ្ងៃទី១៤ ខែតុលា មុនប៉ះម្ចាស់ផ្ទះអ៊ូសបេគីស្ថាន នៅ៣ថ្ងៃបន្ទាប់។ សម្រាប់ជំនួបចុងក្រោយកម្ពុជា ក្រោមការដឹកនាំរបស់គ្រូបង្វឹកជប៉ុន Koji Gyotoku នឹងត្រូវតតាំងជាមួយអ៊ីរ៉ង់នៅថ្ងៃទី២០ ខែតុលា ឆ្នាំ២០២០៕

អត្ថបទ៖ អ៊ុំ សុភក្តិ