យុវជនក្លឹបធំៗចតនៅបង់ច្រើន ជាក្ដីកង្វល់១របស់គ្រូ U-19 កម្ពុជា Koji Gyotoku

2020-07-20 04:21:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនធ្លាប់តែជាប់ និងបានលេងឱ្យជម្រើសជាតិកម្ពុជា U-19 មួយចំនួនបានផ្លាស់ប្ដូរទ្រនំចាស់ ទៅកាន់ក្លឹបថ្មីដែលជាក្លឹបធំៗប្រជែងគ្នាយ៉ាងខ្លាំងក្លានៅលីគកំពូលកម្ពុជា។ ទោះមានឈ្មោះលេងឈុតធំ ប៉ុន្តែយុវជនមួយចំនួនបានត្រឹមអង្គុយមើលក្នុងបង់ប៉ុណ្ណោះ ហើយអ្នកខ្លះមិនបានលេងសូម្បីតែមួយប្រកួត។

លោកគ្រូបង្គោល Koji Gyotoku

ត្រង់ចំណុចនេះគ្រូបង្គោលក្រុមជម្រើសជាតិ U-19 កម្ពុជាសញ្ជាតិជប៉ុន Koji Gyotoku បានបង្ហាញក្ដីបារម្ភអំពីការធ្លាក់ចុះនៃគុណភាពលេងរបស់ពួកគេ។

លោក Koji Gyotoku លើកឡើងថា ៖«នេះជាបញ្ហាមួយដែរ សម្រាប់កីឡាករនៅពេលដែលគាត់អត់បានលេងគឺគាត់ធ្លាក់ហើយ។ ការលេងរបស់គាត់គឺធ្លាក់ចុះ ហើយអឺ...សហព័ន្ធបាល់ទាត់ តាមដែលខ្ញុំឮមក គឺដោយសារតែមានបញ្ហាហ្នឹងកើតឡើងហើយ បានជាសហព័ន្ធបាល់ទាត់បង្កើតលីគទី២ហ្នឹងមក ដើម្បីឱ្យកីឡាករយុវជនហ្នឹងមានឱកាសលេងច្រើន...។ សម្រាប់ប្រទេសផ្សេងៗក៏បារម្ភពីបញ្ហាហ្នឹងដែរ...យុវជនចេញទៅលេងក្លឹបធំៗ គឺចតនៅបង់ច្រើនដែរ...ហើយគេក៏កំពុងតែរកដំណោះស្រាយទាក់ទងយុវជនដែលអត់បានលេងហ្នឹងដែរ គេកំពុងតែគិតដែរ»។

សហព័ន្ធកីឡាបាល់ទាត់កម្ពុជា(FFC) កាលពីថ្ងៃទី១៤ ខែកក្កដា ឆ្នាំ២០២០ បានប្រកាសរៀបចំការប្រកួតជម្រើសជើងឯកជាតិលីគទី២ឡើងវិញ ក្រោយខកខានរៀបចំរយៈពេល ២ឆ្នាំជាប់គ្នា កាលពីឆ្នាំ២០១៨-២០១៩។ នេះបើតាមតាមការចុះផ្សាយរបស់សារព័ត៌មាន Fresh NewsAsia។

លីគលំដាប់ទី២ ឆ្នាំ២០២០ នឹងចាប់ផ្ដើមការប្រកួតនៅថ្ងៃទី៣ ខែតុលារហូតដល់ថ្ងៃទី១៩ ខែធ្នូ ឆ្នាំ២០២០ ចំណែកការទទួលពាក្យចុះឈ្មោះចូលរួមមានរយៈពេល១ខែកន្លះ គិតចាប់បីថ្ងៃប្រកាសរហូតដល់ថ្ងៃទី៣១ ខែសីហា ឆ្នាំ២០២០ខាងមុខ។

គួរបញ្ជាក់ថា លីគលំដាប់ទី២របស់កម្ពុជា បានចាប់ផ្ដើមដំបូងតាំងពីឆ្នាំ២០១៦ និងដំណើរការបានតែពីរដូវកាលប៉ុណ្ណោះ គឺឆ្នាំ២០១៦ និង២០១៧ ហើយត្រូវបានផ្អាកវិញ។ លីគទី២នេះត្រូវបានបង្កើតឡើង ក្នុងគោលបំណងស្វែងរកក្រុមជើងឯក និងក្រុមជើងឯករង ឡើងទៅបង្គ្រប់កៅអីលីគកំពូលកម្ពុជា ជំនួសក្រុមដែលឈរបាតតារាង ៕

អត្ថបទ៖ អ៊ុំ សុភក្តិ