បើតាមការបង្ហើបរបស់ឪពុកព្រឹកនេះ ស្រីស្អាត លីកា កាន់តែមានសង្ឃឹមហើយ!

2020-07-21 03:18:01
ចំនួនមតិ 0 | ចំនួនចែករំលែក 0

ចន្លោះមិនឃើញ

តារារាំ K-pop តែ ស៊ុនសុដាលីកា ហៅ លីកា បានចូលខ្លួនទៅព្យាបាលជំងឺអាថ៌កំបាំងមួយអស់ពេលជាង ១ខែមកហើយ ដោយឥឡូវនេះ បើតាមការបង្ហើបរបស់លោក តែ ស៊ុនណាង ជាឪពុក តារាស្រីកាន់តែមានសង្ឃឹមហើយ។

នៅព្រឹកនេះ លោកឪពុកដែលមុននេះ បានចេញមុខមកការពារកូនស្រីម្ដងហើយ ដោយច្រានចោលចចាមអារ៉ាមថា កូនស្រី ត្រូវមេក្រុមបណ្ដេញចេញពីក្រុមរាំនោះ បានបញ្ចេញសារថ្មីថា កូនស្រីរបស់នាងសភាពជំងឺបានវិវត្តកាន់តែប្រសើរហើយ។ លោកសរសេរថា "តាមការវិវត្តន៏របស់គាត់ គាត់ជិតបានវិលត្រឡប់ទៅជួប Faៗគាត់វិញហើយ!”។

នេះជាការវិវត្តន៍ថ្មី ចាប់តាំងពី លីកា បានបន្សាត់ខ្លួនបាត់ពីការងារសិល្បៈរបស់នាង ហើយសំណេររបស់លោកឪពុកនាពេលនេះបាននាំឲ្យប្រិយមិត្តរបស់តារាស្រី កើតក្ដីរីករាយ។ លោក ស៊ុនណាង ក៏បានបង្ហើបឲ្យដឹងដែរថា មកឥឡូវ គឺកូនស្រីរបស់លោក អាចងើបអង្គុយខ្លួនឯងបានហើយ ខណៈពីមុននាងត្រូវការជំនួយ ទើបអាចងើបបាន។

កញ្ញា តែ ស៊ុនសុដាលីកា ហៅ លីកា បានប្រកាសដកឃ្លាពីការងារសិល្បៈហើយទៅព្យាបាលជំងឺកាលពីដើមខែឧសភា ដោយកាលណោះអាការរបស់នាង គឺមិនអាចធ្វើចលនាបានឡើយ។ លីកា មិនបានបញ្ចេញជាក់លាក់អំពីប្រភេទជំងឺរបស់នាងឡើយនៅពេលនោះ ប៉ុន្តែនៅថ្ងៃនេះលោក ស៊ុនណាង ជាឪពុកបានបញ្ជាក់ប្រាប់ Sabayថា កូនស្រីលោក មានបញ្ហាលើឆ្អឹងខ្នងដែលកើតយូរមកហើយ ប៉ុន្តែកូនស្រីបានលាក់លៀមនឹងក្រុមគ្រួសារ។

រហូតដល់ស្ថានភាពកាន់តែធ្ងន់ទើបក្រុមគ្រួសារដឹង និងបញ្ជូនទៅមន្ទីរពេទ្យតែម្ដង។ ស្ថានភាពកាលនោះរបស់តារាស្រី គឺនាងតម្រូវឲ្យមានការវះកាត់ ហើយក្រោយមកប្រមាណ១សប្ដាហ៍ នាងបានសរសេរប្រាប់អ្នកគាំទ្ររបស់នាងទៀតថា នាងបានឆ្លងកាត់ការវះកាត់រួចហើយ ប៉ុន្តែនៅតែមិនអាចធ្វើចលនា ឬងើបអង្គុយខ្លួនឯងនៅឡើយ។ ប៉ុន្តែគិតមកត្រឹមព្រឹកថ្ងៃទី ២១ កក្កដានេះ លោក ស៊ុនណាង បញ្ជាក់ថា កូនស្រីមានការវិវត្តកាន់តែល្អ។

ស្ថានភាពនេះ ឪពុករូបនេះអះអាងថា កូនស្រីទំនងអាចនឹងវិលទៅជួបអ្នកគាំទ្ររបស់នាងក្នុងពេលមិនយូរទៀតនោះទេ។ ទោះយ៉ាងណា ចំពោះអាការដែលកើតចំលើឆ្អឹងខ្នង ដែលគេជឿថា មានចំណែកសំខាន់លើការពុតពេនរបស់នាងរាងកាយនោះ លោក តែ ស៊ុនសំណាង មិនទាន់ហ៊ានអះអាងឡើយថា លីកា នឹងអាចបន្តការងារសិល្បៈរាំ k-pop របស់នាងដូចមុនឬអត់។ លោកថា អ្វីៗត្រូវរង់ចាំមើលលទ្ធផលជាក់ស្ដែង ក្រោយពីកូនស្រីបានជាសះស្បើយសិន៕

អត្ថបទ៖ ទារិកា