យប់មិញមាន ៣ក្រុមហ៊ុនប្រជែងគ្នា ចេញទូរសព្ទប្រើឈីប SD 865+ មុនគេក្នុងលោក

2020-07-23 02:58:53
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីយប់មិញនេះ មានស្មាតហ្វូនថ្មីចំនួនបីបានប្រកាសចេញ ដែលសុទ្ធសឹងជាស្មាតហ្វូនដែលប្រើប្រាស់នូវឈីប Snapdragon 865+ ជាបន្ទះឈីបជំនាន់ចុងក្រោយរបស់ Qualcomm។ ស្មាតហ្វូនដែលប្រកាសចេញមុនគេ មានឈ្មោះជាស្មាតហ្វូនបានប្រើឈីប Snapdragon 865+ មុនគេគឺ Lenovo Legion Duel បន្ទាប់មកគឺ Galaxy Z Flip 5G និង Asus ROG Phone 3 ដែលប្រកាសចេញមុនក្រោយគ្នាប៉ុន្មានម៉ោងប៉ុណ្ណោះ។

Lenovo Legion Duel

ស្មាតហ្វូននេះមានបំពាក់ដោយអេក្រង់ AMOLED ទំហំ ៦,៦៥អ៊ីញ ដែលមាន Refresh Rate 144Hz និងមានទ្រនាប់ស្កេនម្រាមដៃបំពាក់ក្រោមផ្ទៃអេក្រង់ផងដែរ។ នៅផ្នែកចំហៀងនៃស្មាតហ្វូនមានបំពាក់នូវកាមេរ៉ា Selfie ទំហំ ២០MP ដែលទីតាំងរបស់វាខុសប្លែកពីស្មាតហ្វូនដទៃ។

បន្ទះឈីប Snapdragon 865+ លើស្មាតហ្វូននេះ មានគួបផ្សំជាមួយ RAM ដែលមានជម្រើសទំហំដល់ ១៦GB និងអង្គផ្ទុកមានជម្រើសដល់ ៥១២GB ជាប្រភេទ UFS 3.1។ វាក៏មាននូវប្រព័ន្ធបញ្ចុះកម្ដៅជំនាន់ថ្មី ដែលជួយបញ្ចុះកម្ដៅពេលលេងហ្គេមធំៗរយៈពេលយូរផងដែរ។

នៅផ្នែកខាងក្រោយមានកាមេរ៉ាមេទំហំ ៦៤MP ជាមួយកាមេរ៉ា Ultrawide ទំហំ ១៦MP ដែលស្ថិតនៅចំកណ្ដាលខ្នងស្មាតហ្វូន។ ថ្មរបស់វាមានទំហំ ៥០០០ mAh ដែលមានកម្លាំងសាកដល់ 90W អាចសាកពេញដោយប្រើពេល ៣០នាទី។ យ៉ាងណាក្ដីដើម្បីទទួលបានលទ្ធផលនេះ អ្នកត្រូវដោតខ្សែសាកចូលរន្ធ USB Type-C ទាំងពីរដែលមានលើស្មាតហ្វូន ដែលមួយនៅផ្នែកខាងឆ្វេង និងមួយទៀតនៅផ្នែកខាងក្រោម ដោយសារថ្មរបស់វាមានបែងចែកជាពីរផ្នែក។

Legion Duel នឹងដាក់លក់នៅប្រទេសចិនចាប់ពីថ្ងៃទី ៥ ខែសីហា ដោយមានតម្លៃប្រមាណ ៥០០ដុល្លារ សម្រាប់ 8GB/128GB, ប្រមាណ ៥៥៧ដុល្លារ សម្រាប់ 12GB/128GB, ប្រមាណ ៦០០ដុល្លារសម្រាប់ 12GB/256GB និងប្រមាណ ៨៥៧ដុល្លារ សម្រាប់ប្រភេទកប់ 16GB/512GB។

Samsung Galaxy Flip 5G

ស្មាតហ្វូននេះគឺជាការអាប់ដេតចេញពី Galaxy Z Flip ប្រភេទ 4G ដែល Samsung បានប្រកាសចេញកាលពីខែកុម្ភៈកន្លងទៅ។ រូបរាងរបស់វាមិនមានការផ្លាស់ប្ដូរ ហើយលក្ខណៈសម្បត្តិគឺខុសតែត្រង់ការប្ដូរមកប្រើឈីប Snapdragon 865+ ដែលមានគាំទ្រសេវា 5G ហើយវាក៏មានជម្រើសពណ៌ខុសពីមុនគឺមានពណ៌ទង់ដែង ជាមួយពណ៌ប្រផេះ។

Galaxy Z Flip 5G នឹងដាក់លក់ចាប់ពីថ្ងៃទី ៧ ខែសីហា ដោយនៅសហរដ្ឋអាមេរិកមានលក់តាមរយៈ AT&T និង T-Mobile ជាមួយតម្លៃ ១៤៥០ដុល្លារ ដែលថ្លៃជាងប្រភេទ 4G ៧០ដុល្លារ។

Asus ROG Phone 3

ស្មាតហ្វូននេះមានបំពាក់នូវឈីប Snapdragon 865+ ដែលគួបផ្សំដោយ RAM មានជម្រើសទំហំដល់ ១៦GB និងអង្គផ្ទុកធំបំផុតដល់ ៥១២GB ជាប្រភេទ UFS 3.1 ហើយ RAM ជាប្រភេទ LPDDR5។ លើកនេះ Asus បានបន្ថែមនូវ AeroActive Cooler 3 មកក្នុងប្រអប់ស្មាតហ្វូន ដែលអាចជួយបញ្ចុះកម្ដៅបានយ៉ាងល្អ។

អេក្រង់របស់ស្មាតហ្វូននេះគឺមានទំហំ ៦,៦អ៊ីញ ជាប្រភេទ AMOLED ដែលមាន Refresh Rate 144Hz ហើយអ្នកប្រើប្រាស់ក៏អាចរើសយក 120Hz និង 90Hz ឬកំណត់ជា Auto ដើម្បីសន្សំសំចៃថាមពលបានផងដែរ។

សម្រាប់កាមេរ៉ាវិញ Asus បានបន្ថែមកាមេរ៉ាគ្រាប់ទីបីនៅផ្នែកខាងក្រោយ ដែលជាកាមេរ៉ា Macro ទំហំ ៥MP។ កាមេរ៉ាមេបានដំឡើងទំហំដល់ ៦៤MP និងកាមេរ៉ាទីពីរជាប្រភេទ Ultrawide ទំហំ ១៣MP ដែលអាចថតរូបភាពកម្រិត ១២៥ដឺក្រេ។ កាមេរ៉ាមេអាចថតវីដេអូ 8K/30fps ឬ 4K/120fps។ សម្រាប់កាមេរ៉ា Selfie មានទំហំ ២៤MP។

ចំពោះថ្មវិញគឺមានទំហំ ៦០០០ mAh ដែលគាំទ្រការសាកល្បឿនលឿន 30W ដែលអាចសាកថ្មបាន ៧០% ក្នុងពេល ៤៦នាទី។

Asus ROG Phone 3 នឹងចេញលក់នៅទីផ្សារអឺរ៉ុប ក្នុងតម្លៃប្រមាណ ១១៥៣ដុល្លារ សម្រាប់ប្រភេទ RAM 12GB/ROM 512GB និងតម្លៃប្រមាណ ១២៦៩ដុល្លារ សម្រាប់ប្រភេទ RAM 16GB/ROM 512GB។ Asus បញ្ជាក់ថានឹងដាក់លក់ស្មាតហ្វូននេះនៅអាមេរិកនាខែកញ្ញា ប៉ុន្តែមិនបានបញ្ជាក់តម្លៃនៅឡើយទេ៕

ប្រភព៖ GSMarena ប្រែសម្រួល៖ សុខហេង