ធ្វើតេស្ត U19 យុវជនណាហ្គា និងអគ្គិសនី៣រូប សុទ្ធតែមានជំនឿចិត្តខ្ពស់

2020-07-23 03:21:59
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នយុវជនអាយុក្រោម១៩ឆ្នាំ កែវ ឧត្ដម, ចាន់ សុភា របស់ក្លឹបណាហ្គាវើលដ៍ និង សៀន សុភក្ត្រា កីឡាករក្លឹបបាល់ទាត់អគ្គិសនីកម្ពុជា សុទ្ធតែមានជំនឿចិត្តអាចជាប់ជម្រើសជាតិ U19 កម្ពុជាឆ្នាំ២០២០ ប៉ុន្តែលទ្ធផលធ្វើតេស្តនាពេលអនាគតយ៉ាងណានោះ ពួកគេក៏នៅមិនទាន់ដឹងដូចគ្នា ដ្បិតការប្រមូលផ្ដុំលើកនេះប្រជុំសុទ្ធកីឡាករល្អៗរហូតដល់ទៅជាង៣០នាក់។

កែវ ឧត្ដម ធ្វើតេស្តថ្ងៃទី១

កែវ ឧត្ដម បញ្ជាក់ថា ៖«ខ្ញុំយល់ឃើញថាការធ្វើតេស្តនេះល្អសម្រាប់ពួកយើងទាំងអស់គ្នា ដែលមានឈ្មោះធ្វើតេស្តនេះ។ សម្រាប់ខ្ញុំផ្ទាល់ក៏មិនហ៊ាននិយាយមុនថានឹងអាចជាប់មានឈ្មោះ២៣នាក់ចុងក្រោយដែរ ព្រោះវាពិតជាពិបាកខ្លាំងណាស់ ព្រោះអ្នកមានឈ្មោះមកធ្វើតេស្តនេះសុទ្ធតែជាអ្នកល្អល្អ...សម្រាប់ក្ដីសង្ឃឹមខ្ញុំមាន៧០%»។

ទោះជាបែបនេះក្ដី កីឡាករមកពីខេត្តកំពង់ឆ្នាំ មិនបោះបង់ការប្រឹងប្រែងឡើយ ដោយគេនឹងខិតខំដើម្បីជាប់ជម្រើសជាតិ U19។ ឧត្ដមបានបន្ថែមថា បើសិនគេមិនជាប់ គឺជារឿងគួរឱ្យសោកស្ដាយបំផុត ព្រោះមនុស្សម្នាក់ៗធ្វើអ្វីមួយគឺចង់បានផ្លែផ្កាល្អមកវិញ។

យុវជនណាហ្គាវើលដ៍ ចាន់ សុភា

ចំណែក ចាន់ សុភា ដែលធ្លាប់ជាប់ U19 ម្ដងរួចមកហើយនោះ មានក្ដីសង្ឃឹមរហូតដល់៨០% ដោយផ្អែកលើការខិតខំហ្វឹកហាត់ទាំងនៅក្លឹប និងជម្រើសជាតិ។ យ៉ាងណាគេក៏មិនទាន់ដឹងថាទទួលបានលទ្ធផលល្អ ឬអាក្រក់ដែរ មានតែពេលវេលាប៉ុណ្ណោះជាអ្នកអារកាត់។

សុភា ពន្យល់បែបនេះ ៖«ខ្ញុំសំអាងលើការខិតខំប្រឹងប្រែងរបស់ខ្ញុំទាំងនៅក្លឹបនិងនៅជម្រើសជាតិ។ ទោះបីពេលខ្លះនៅក្លឹបខ្ញុំមិនសូវបានលេងក៏ដោយ ប៉ុន្តែសម្រាប់ខ្ញុំ ខ្ញុំព្យាយាមណាស់ ។ មួយទៀតសំអាងលើការហ្វឹកហាត់នៅក្លឹប មានការហ្វឹកហាត់ខ្លាំង និងមានឱកាសមានឈ្មោះចូលលេងម្ដងម្កាលដែរ»។

សៀន សុភត្ត្រា ខ្សែប្រយុទ្ធក្លឹបអគ្គិសនីកម្ពុជា

ទោះមិនទាន់ច្បាស់១០០%ថាជាប់ U19 ក្ដី ប៉ុន្តែ សៀន សុភក្ត្រា នៅតែមានជំនឿចិត្តលើខ្លួនឯង ដ្បិតរូបគេមិនខ្លាចរអានឹងការប្រកួតប្រជែងឡើយ។

សុភក្ត្រា រៀបរាប់៖ «ជំនឿចិត្តមាននៅតែមាន តែខ្ញុំអត់អាចនិយាយថាម៉េចទៀតទេនាពេលខាងមុខ ប៉ុន្តែជំនឿចិត្ត កាន់តែធ្វើឱ្យយើងមានការខំប្រឹង បើយើងអត់មានជំនឿចិត្តទេ ការខំប្រឹងក៏អត់សូវមានដែរ»។

មកទល់នឹងពេលនេះ សៀន សុភក្ត្រា ធ្វើតេស្តបាន២លើករួចមកហើយ ចាប់តាំងពីធ្វើតេស្តលើកដំបូងកាលពីថ្ងៃ ទី១៤ ខែកក្ដដា ឆ្នាំ២០២០មក។ ២លើកនេះគេថា កីឡាករហាក់លេងត្រូវគ្នាច្រើន បើធៀបនឹងលើកទី១ ព្រោះកីឡាករខ្លះធ្លាប់ជាប់ U19 ជាមួយពីមុនមក។

ក្រុមកីឡាបាល់ទាត់ជម្រើសជាតិកម្ពុជា U19 បានចាប់ឆ្នោតប៉ះម្ចាស់ផ្ទះអ៊ូសបេគីស្ថាន អ៊ីរ៉ង់ និងឥណ្ឌូណេស៊ី នៅពូល A សម្រាប់ការប្រកួតជម្រុះពានរង្វាន់ AFC U-19 Championship 2020។ សម្រាប់ជំនួបបើកឆាកU19 កម្ពុជា នឹងត្រួវតតាំងជាមួយឥណ្ឌូណេស៊ីនៅថ្ងៃទី១៤ ខែតុលា មុនប៉ះម្ចាស់ផ្ទះអ៊ូសបេគីស្ថាន នៅ៣ថ្ងៃបន្ទាប់។ សម្រាប់ជំនួបចុងក្រោយកម្ពុជា ក្រោមការដឹកនាំរបស់គ្រូបង្វឹកជប៉ុន Koji Gyotoku នឹងត្រូវតតាំងជាមួយអ៊ីរ៉ង់នៅថ្ងៃទី២០ ខែតុលា ឆ្នាំ២០២០៕

អត្ថបទ៖ អ៊ុំ សុភក្តិ