ការខឹងមិនសុទ្ធតែអាក្រក់នោះទេ ព្រោះវាជាការបង្ហាញនូវអារម្មណ៌ពិតដែលផ្ទុះចេញមកទាំងកំរោល តាមរយៈទឹកមុខ កាយវិការ និងពាក្យសម្តី។ បញ្ហានៅត្រង់ថា តើអ្នកនឹងគ្រប់គ្រងអារម្មណ៌ខឹងរបស់អ្នកយ៉ាងណានោះតែប៉ុននោះ។ តោះ មកដឹងពីជំនាញទាំង៨ ដែលអ្នកអាចយកមកគ្រប់គ្រប់កំហឹង នៅពេលដែលអ្នកខឹងនរណាម្នាក់ ៖

**១. ប្រសិនបើអ្នកមានសញ្ញាដូចខាងក្រោម រកកន្លែងបន្ធូរអារម្មណ៌ មិនចឹងចូរព្យាយាមនៅឱ្យឆ្ងាយពីអ្នកដ៏ទៃ ៖** + បេះដូងដើរញាប់, សង្ក្រៀតធ្មេញជាប់ៗគ្នា, បែកញើសជាប់, តឹងណែនក្នុងទ្រូង, ញ័រពេញទាំងរាងកាយ, ខ្សោះ, សម្លេងឡើងខ្ពស់ជាងពេលធម្មតា, គ្មានអារម្មណ៌លែងសើច, មានកំដៅចេញពីខាងក្នុង, មានអារម្មណ៌ថាគ្រប់យ៉ាងមិនល្អ មនុស្សគ្រប់គ្នាកំពុងប្រើខ្សែភ្នែកមាក់ងាយ និងរាល់សម្តីរបស់ពួកគេគឺសុទ្ធសឹងតែវិជ្ជមាន (អារម្មណ៌របស់អ្នកចាប់ផ្តើមអគតិលើអ្វីគ្រប់យ៉ាងជុំវិញខ្លួន)។

២. ស្វែងរកថា អ្វីជាមូលហេតុ ដែលធ្វើអោយអ្នកខឹង

• ពេលខ្លះ វាអាចកើតឡើងពីភាគីម្ខាងទៀត ស្របពេលខ្លះ អ្នកសុខៗក៏ខឹងដោយគ្មានហេតុផល របៀបថា ម្នាក់ឯងៗអីចឹង។ ហេតុផល៣ខាងក្រោមនេះ អាចធ្វើអោយអ្នកធ្លាក់ចូលទៅក្នុងកំហឹង ដែលមិនអាចស្រោចស្រង់បាន ៖ _ អ្នកកំពុងនៅក្រោមការគៀបសង្កត់អ្វីមួយ ឬនរណាម្នាក់ _ ការផ្លាស់ប្តូររាងកាយ ឬអារម្មណ៌របស់អ្នកភ្លាមៗ ដោយគ្មានមូលហេតុ _ គិតច្រើន ស្មុគស្មាញ ពីអ្វីដែលមិនទាន់កើតឡើង ដូចជារឿងអនាគតដែលសែនវែងឆ្ងាយអីជាដើម ប្រសិនបើអ្នកស្វែងរកឃើញពីមូលហេតុដែលធ្វើអោយខឹង ចូររកដំណោះស្រាយភ្លាមៗ មិនចឹងទេ វានឹងនាំផលអាក្រក់ដល់អ្នកជាមិនខានឡើយ។

៣. សរសេរអារម្មណ៌របស់អ្នក ឬរឿងរ៉ាវផ្សេងៗ ដែលធ្វើអោយអ្នកខឹង

• ការសរសេរជាវិធីសាស្ត្រយ៉ាងល្អប្រសើរមួយក្នុងការគ្រប់គ្រងកំហឹង ព្រោះយ៉ាងហោចណាស់វាគ្មានមាត់យកទៅនិយាយប្រាប់អ្នកណាបន្ត វាមិនស្តីអោយអ្នកវិញ ហើយអ្នកក៏អាចសរសេរបានគ្រប់យ៉ាងដើម្បីបន្ធូរអារម្មណ៌របស់អ្នក។ អ្នកអាចជ្រើសរើសកូនសៀវភៅ ឬជា Secret Box ចៀសវាងការសរសេររៀបរាប់នៅក្នង Social media ដូចជា facebook អីជាដើម។

៤. រាប់ពី ០ ទៅ១០០

• ការរាប់ ជាមូលដ្ឋានយ៉ាងមានប្រសិទ្ធភាព និងទទួលបានលទ្ធផលល្អ ព្រោះវាអាចបញ្ចេញទាំងអារម្មណ៌មិនល្អ មិនត្តឹមតែប៉ុននោះ វាជួយអ្នកក្នុងការគ្រប់គ្រប់ខ្លួន និងអារម្មណ៌របស់អ្នកយ៉ាងល្អ មុនពេលដែលអ្នកបង្ហាញសកម្មភាព ឬសម្តីមិនល្អចេញមក។

៥. បន្ធូរអារម្មណ៌

• ដើរចេញពីស្ថានការណ៌ដ៏តានតឹង វាមើលទៅដូចជាអន់ណាស់ដែលអ្នករត់គេចពីបញ្ហា ប៉ុន្តែអ្នកច្រលំហើយនេះជាវិធីសន្តិភាពទៅវិញទេ ព្រោះពេលដែលខឹង អ្នកអាចនឹងធ្វើអ្វីមួយដែលមិនបានតាំងចិត្ត ហើយបន្សល់ទុកភាពស្តាយក្រោយតែប៉ុននោះ។

៦. កុំនៅមួយកន្លែង

• ធ្វើលំហាត់ប្រាណ រត់ ដើរលឿន វាយបាវខ្សាច់ ឬជាបែបលំហាត់ប្រាណដែលអាចបញ្ចេញកំហឹងបាន គិតទៅមានទាំងចំនេញ និងចំនេញ ព្រោះបានទាំងសុខភាពល្អហើយ គ្រប់គ្រងអារម្មណ៌ខឹងបានទៀត។

៧. រកមនុស្សដែលអ្នកទុកចិត្ត អាចនិយាយរឿងប្រាប់ទៅគេបាន

• ជារឿងដែល្អ ប្រសិនបើអ្នកមានមនុស្សម្នាក់ដែលអាចអង្គុយស្តាប់អ្នកបានគ្រប់បញ្ហា មិនត្អូញត្អូរ មិនធុញទ្រាន់ មិនស្តីបន្ទោស ឬថាអោយអ្នកវិញ ហើយនិយាយទៅហើយ ធ្វើអោយអ្នកមានអារម្មណ៌ថា ធូរស្រាល។ ប្រសិនបើកំហឹងរបស់អ្នក ត្រូវបានចាត់ជាបញ្ហាសុខភាព ចូរស្វែងរកការព្យាបាល បែបការពិគ្រោះពិភាក្សា ឬមើលវីដេអូ បែបអប់រំផ្លូវចិត្តក៏បាន។

៨. សម្រាក លំហែ

• ចំណាយពេលសម្រាក ឬលំហែអោយបានច្រើន ជាពិសេសបើអ្នកស្វែងរកឃើញថា ខ្លួនកំពុងតែមានអារម្មណ៌តប់ប្រមុល ឬកំពុងធ្លាក់ចូលទៅក្នុងការខឹងសម្បារ។ ការសម្រាកលំហែ មានច្រើនសណ្ខាន ដូចជាការដើរកំសាន្តតាមសួនច្បារ, អានសៀវភៅ, ស្តាប់បទចម្រៀង, ឬជាសកម្មភាពផ្សេងៗ ដូចជាការធ្វើលំហាត់ប្រាណផ្លូវចិត្ត និងឧស្សាហ៌ញញឹមប្រាប់ខ្លួនឯងថា រាល់បញ្ហាតែងមានដំណោះស្រាយ៕

ប្រភព ៖ Reach Out.com