TN Kandal ឈ្នះដៃគូ ៦-១ នេះក្រុមមិនបានហ្វឹកហាត់ទេ

2020-08-24 09:23:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្លឹប TN Kandal FC ថាការប្រកួតជាមួយក្រុមបាល់ទាត់ MAMBO ម្សិលមិញនេះគឺកូនក្រុមរបស់លោកមិនបានហ្វឹកហាត់នោះទេ ពោលសម្រាកថ្ងៃសងពិធីបុណ្យចូលឆ្នាំដូចគេដូចឯងដែរ។

TN Kadal (អាវលឿង)

ឯកឧត្ដម ថុល នាង ប្រធានក្លឹប TN Kandal FC បានឲ្យដឹងថា អាចថាជាការសំណាងដែរការប្រកួតសប្ដាហ៍ទី១១ ម្សិលមិញនេះក្រុមរបស់លោកបានប៉ះក្រុមល្មមៗ មិនលើ មិនក្រោមពេក ទើបអាចឈ្នះបាន និងរកគ្រាប់រហូត៦គ្រាប់បែបនេះ។ ដោយសារតែមានថ្ងៃឈប់សម្រាករហូត៥ថ្ងៃទើបកីឡាករម្នាក់ៗចេញទៅកម្សាន្តដូចគេឯង ជាហេតុមិនបានហ្វឹកហាត់។

ចំពោះជ័យជម្នះម្សិលមិញនេះ ប្រធានក្លឹបខាងលើលើកឡើងទៀតថា កីឡាករលេងយល់ចិត្តគ្នា មានសាមគ្គីភាព និងភាពអំណត់តស៊ូទើបឈ្នះរហូតដល់ ៦-១។ មុនការប្រកួតលោកក៏មិនរំពឹងថាឈ្នះបានច្រើនគ្រាប់បែបនេះដែរ ប៉ុន្តែប្រហែលដៃគូក៏មិនបានហ្វឹកហាត់ដូចគ្នាដែរមើលទៅ។

លទ្ធផលម្សិលមិញ

រំលឹកដែរថា ពានរង្វាន់បាល់ទាត់ពាក់កណ្ដាលអាជីព KW Cambodian League 2020 បានបញ្ចប់ការប្រកួតសប្ដាហ៍ទី១១ ហើយម្សិលមិញនេះ។ ដោយឡែកក្រុម TN Kandal FC ឈ្នះក្រុម MAMBO ៦-១ កំពុងឈរលើកំពូលតារាងដដែលមាន ៣០ពិន្ទុ ប្រដេញដោយក្រុម ISI DSC មាន៣០ពិន្ទុ ចាញ់គ្រាប់ចំណេញ៕

អត្ថបទ៖ នួន ស៊ីណា