ស្មាតហ្វូនដំបូងក្នុងលោក បង្កប់កាមេរ៉ាក្រោមអេក្រង់ តម្លៃ ៣២២ដុល្លារ

2020-09-02 01:27:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតស្មាតហ្វូនជាច្រើនកំពុងសម្ងំអភិវឌ្ឍន៍បច្ចេកវិទ្យាកាមេរ៉ាបង្កប់ក្រោមផ្ទៃអេក្រង់ សម្រាប់ជំនួសរចនាបថក្បាលឆក, រចនាបថតំណក់ទឹក និងរចនាបថចោះរន្ធលើអេក្រង់ជាដើម។ ពេលនេះ ZTE បានក្លាយជាក្រុមហ៊ុនដំបូងគេ ប្រកាសចេញស្មាតហ្វូនម៉ូដែល Axon 20 5G ដែលមានបង្កប់កាមេរ៉ាក្រោមអេក្រង់ ចេញលក់លើទីផ្សារប្រទេសចិនក្នុងតម្លៃចាប់ពីប្រមាណ ៣២២ដុល្លារ។

គួរដឹងថាបច្ចេកវិទ្យាកាមេរ៉ាបង្កប់ក្រោមអេក្រង់ដែលមានក្រុមហ៊ុនមួយចំនួនធ្លាប់បង្ហាញចេញកន្លងមក គឺមានបញ្ហាត្រង់សមត្ថភាពស្រូបយកពន្លឺរបស់ Sensor ធ្វើឲ្យរូបភាពមិនមានគុណភាពល្អ។ បន្ថែមពីនេះនៅទីតាំងដែលបង្កប់កាមេរ៉ា គេឃើញមានពន្លឺ និងពណ៌ខុសពីផ្ទាំងអេក្រង់ទាំងមូលផងដែរ។

ក្រុមហ៊ុន ZTE បានដោះស្រាយបញ្ហាទាំងនេះ ដោយបញ្ហាទីមួយដោះស្រាយតាមរយៈការប្រើប្រាស់បន្ទះពិសេសម្យ៉ាងបំពាក់លើផ្ទៃអេក្រង់ ដែលអាចឲ្យពន្លឺចាំងចូល Sensor កាមេរ៉ាបានប្រសើរជាងមុន។ កាមេរ៉ា Selfie ទំហំ ៣២MP បង្កប់ក្រោមអេក្រង់នៅលើស្មាតហ្វូន ZTE Axon 20 5G ក៏មានមកជាមួយនូវ Sensor ចាប់យកពន្លឺ ដែលអាចគ្រប់គ្រងលើពន្លឺដែលត្រូវការសម្រាប់ស្ថានភាពនីមួយៗបាន។

បន្ថែមពីនេះ ZTE ក៏បានកែសម្រួលលើគ្រាប់ភីកសែលនៅជុំវិញឡេនកាមេរ៉ា ដើម្បីឲ្យវាស៊ីគ្នានឹងផ្នែកដទៃទៀតនៃអេក្រង់ផងដែរ។ ចុងក្រោយគឺការប្រើប្រាស់រូបមន្តគណនារូបភាពថ្មី ដែលជួយបង្កើនភាពច្បាស់នៃរូបភាព។

Axon 20 5G មានអេក្រង់ទំហំ ៦,៩២អ៊ីញ ជាប្រភេទ OLED ដែលអាចបង្ហាញរូបភាពបានកម្រិត FHD+ និងមាន Refresh Rate 90Hz ហើយលើអេក្រង់ក៏មានបង្កប់ទ្រនាប់ស្កេនម្រាមដៃផងដែរ។

នៅផ្នែកខាងក្រោយមានកាមេរ៉ាចំនួន៤គ្រាប់ ដែលកាមេរ៉ាមេមានទំហំ ៦៤MP, កាមេរ៉ា Ultrawide ទំហំ ៨MP និងពីរទៀតជាកាមេរ៉ាវាស់ជម្រៅ និងកាមេរ៉ា Macro ដែលមានទំហំ ២MP ដូចគ្នា។

ស្មាតហ្វូននេះដំណើរការដោយបន្ទះឈីប Snapdragon 765G គួបផ្សំជាមួយ RAM ទំហំ ៦GB ឬ ៨GB និងអង្គផ្ទុក ១២៨GB ឬ ២៥៦GB។ ថ្មមានទំហំ ៤២២០ mAh ដែលមានបច្ចេកវិទ្យាសាកថ្មកម្លាំង 30W។

ZTE Axon 20 5G នឹងមានដាក់លក់នៅប្រទេសចិននាថ្ងៃទី១០ ខែកញ្ញា ដោយមានតម្លៃប្រមាណ ៣២២ដុល្លារ សម្រាប់ RAM 6GB/ROM 128GB, តម្លៃប្រមាណ ៣៦៦ដុល្លារ សម្រាប់ RAM 8GB/ROM 128GB និងតម្លៃប្រមាណ ៤១០ដុល្លារ សម្រាប់ RAM 8GB/ROM 256GB។ ចំពោះដំណឹងនៃការចេញលក់ក្រៅប្រទេសនៅមិនទាន់មានការបញ្ជាក់នៅឡើយទេ៕

ប្រភព៖ GSMarena ប្រែសម្រួល៖ សុខហេង