វង្ស ថាណាន់ កុងត្រាប៉ុន្មានឆ្នាំជាមួយGalaxy ឥឡូវនេះដឹងការពិតហើយ!

2020-09-25 03:26:08
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង វង្ស ថាណាន់ បានធ្វើឲ្យមានការភ្ញាក់ផ្អើលកាលពីដើមខែកក្កដា ដោយស្ងាត់ៗរូបគេស្រាប់តែត្រូវប្រកាសក្លាយជាតារាកុងត្រារបស់ Galaxy បាត់ទៅហើយ។ ប៉ុន្តែអ្វីដែលជាមន្ទិលសង្ស័យ គឺរយៈពេលកុងត្រារបស់តារាចម្រៀង និងផលិតកម្ម។

កាលនោះ បន្ទាប់ពីក្លាយខ្លួនជាតារាចម្រៀងអាជីពរបស់ផលិតកម្មឧកញ៉ា វ័យក្មេងភ្លាម ក៏លេចដំណឹង អំពីកុងត្រារបស់ ថាណាន់ ជាមួយ Galaxy គឺវែងខ្លាំង កម្រមានតារាចម្រៀងណាផ្សេងទទួលបានកុងត្រាដូច្នេះណាស់។ តាមប្រភពមិនបញ្ចេញឈ្មោះបានឲ្យដឹងថា កុងត្រារបស់តារាចម្រៀងមានប្រវត្តិកម្សត់កម្រ គឺមានដល់ទៅ ១០ឆ្នាំឯណោះ។ រយៈពេលកុងត្រានេះ អាចនិយាយបានថា វែងជាងកុងត្រាការងាររបស់សិល្បករផ្សេងទៀតនៅក្នុងស្រុក។

ជាទូទៅកុងត្រារបស់តារាចម្រៀងជាមួយផលិតកម្មណាមួយ ភាគច្រើនធ្វើឡើងក្នុងរយៈពេល ៥ឆ្នាំម្ដងប៉ុណ្ណោះ។ កិច្ចសន្យាត្រឹមប៉ុណ្ណេះ ភាគីទាំងពីរឯកភាព ដោយទុកផ្លូវសម្រាប់ខ្លួនឯងដូចគ្នា។ មានន័យថា ក្នុងរយៈ ពេលនេះ សម្រាប់តារាចម្រៀង ប្រសិនបើមើលទៅហាក់មុជមិនជ្រៅទៅមិនឆ្ងាយ អាចឆាប់បានដកខ្លួន។ ឯសម្រាប់ផលិតកម្មក៏ដូចគ្នា ក៏ស្រួលមើលថា ពីដំណើររបស់តារាចម្រៀងដូចគ្នា ថាត្រូវបន្ត ឬបញ្ឈប់។

វិលមកករណីរបស់តារាចម្រៀង វង្ស ថាណាន់ វិញ បន្ទាប់ពីធ្លាយព័ត៌មានខាងលើភ្លាមៗ សាមីខ្លួនតារាចម្រៀង និងផលិតកម្ម សុំមិនធ្វើការបកស្រាយដូចគ្នា។ យ៉ាងណា ថ្មីៗនេះ ថាណាន់ បានបង្ហើបជុំវិញរឿងនេះវិញថា ជាការពិត គឺលោកបានចុះកុងត្រាជាមួយ Galaxy រយៈពេល១០ឆ្នាំពិតមែន។ យ៉ាងណា តារាចម្រៀងមកពីខេត្តកំពង់ចាម មិនបានប្រាប់ថា ហេតុអ្វីនោះទេ។

ប៉ុន្តែលោកថា លោកពេញចិត្តចំពោះកុងត្រាចំពោះការងារមួយនេះ និងមានភាពកក់ក្ដៅ ក្រៅពីតស៊ូកាត់ព្យុះភ្លៀងក្រោយពីចេញពីមណ្ឌលកុមារកំព្រានៅខេត្តកំពង់ស្ពឺមក ទីបំផុតលោកអាចរកបានកន្លែងជ្រកគត់មុត ទ្រនំធំបែបនេះ។ ពិសេសបំផុតលោក ក៏ត្រូវបានផលិតកម្មស្វាគមន៍ ដោយគ្រាន់តែបង្ហាញមុខភ្លាម ក៏រៀបចំបទចម្រៀងឲ្យបានចេញនៅលើទីផ្សារតែម្ដង។

បទចម្រៀងទី១របស់លោកចេញនៅ Galaxy គឺបទ "ស្នេហ៍ក្រៅផ្លូវការ" គឺចេញក្នុងថ្ងៃទី១ នឹងការបង្ហាញមុខរបស់លោកក្នុងផលិតកម្មតែម្ដង។ បទនេះទទួលបានការចូលចិត្ត និងគាំទ្រជាច្រើន ដោយប្រិយមិត្តជាច្រើនលើកសរសើរថាពីរោះ ហើយ ថាណាន់ ក៏ធ្វើបានល្អថែមទៀត។ គិតមកត្រឹមថ្ងៃនេះ បទទី១របស់ ថាណាន់ មានអ្នកចូលទៅស្ដាប់ចំនួន ២.៣លានដង។

បន្ទាប់ពីបទទី១នេះ ផលិតកម្មក៏បានបញ្ចេញបទឲ្យលោកបន្តបន្ទាប់ទៀតបាន ៥បទហើយ ហើយបទចុងក្រោយរបស់លោក ទើបនឹងចេញនៅថ្ងៃម្សិលមិញនេះ មានចំណងជើងថា "ជីវិតខ្ញុំ គ្មានឆ្នាំងសាកថ្មទេ"។ តោះ...ទស្សនា និងស្ដាប់ទាំងអស់គ្នា៖