គ្រូជម្រើសជាតិថ្នាល ITF ហ៊ វិចិត្រ វគ្គអាជ្ញាកណ្ដាលលើកនេះល្អមែនទែន មានទាំងប្រឡងទៀត
- 2020-09-28 07:49:25
- ចំនួនមតិ 0 | ចំនួនចែករំលែក 0
គ្រូជម្រើសជាតិថ្នាល ITF ហ៊ វិចិត្រ វគ្គអាជ្ញាកណ្ដាលលើកនេះល្អមែនទែន មានទាំងប្រឡងទៀត
ចន្លោះមិនឃើញ
គ្រូជំនួយជម្រើសជាតិថ្នាលតេក្វាន់ដូ ITF ហ៊ វិចិត្រ ថាឆ្លងកាត់វគ្គបណ្ដុះបណ្ដាលចៅក្រម អាជ្ញាកណ្ដាលកម្រិត «ក» លើកនេះទទួលបានចំណេះដឹងថ្មីៗច្រើន និងមានការប្រឡងសមត្ថភាពសិក្ខាកាមពេលចប់វគ្គទៀតផង។
ហ៊ វិចិត្រ បានឲ្យដឹងថា ក្រោយឆ្លងកាត់វគ្គបណ្ដុះបណ្ដាលរយៈពេល៦ថ្ងៃកន្លងទៅនេះគឺទទួលបានចំណេះដឹងថ្មីៗបន្ថែមទៀតជាច្រើន ជាពិសេសលក្ខន្តិកៈដែលអន្តរជាតិបានផ្លាស់ប្ដូរកែសម្រួលជាបន្តបន្ទាប់។ វគ្គនេះគឺពិតជាធ្វើឲ្យខ្លួនមានការយល់ដឹងកាន់តែច្បាស់ថែមទៀតទៅលើបច្ចេកទេសជាចៅក្រម ឬនៅពេលធ្វើជាអាជ្ញាកណ្ដាល ព្រោះមិនត្រឹមតែសិក្សាជាទ្រឹស្ដីទេ បូកទាំងការអនុវត្តន៍ផ្ទាល់ភ្លាមៗ។
គ្រូជំនួយជម្រើសជាតិថ្នាលខាងលើនេះបន្តលើកឡើងទៀតថា លើកនេះគឺប្លែកជាងមុនទៅទៀតរៀនដាក់ពិន្ទុតាមបែបអេឡិចត្រូនិក ថែមទាំងមើលវីដេអូប្រកួតពិភពលោកហើយសាកដាក់ពិន្ទុតាម ហើយបន្ទាប់មកទៀតឆ្លងកាត់ការវាយតម្លៃពីគ្រូឧបទេសជនជាតិកូរ៉េ កម្រិតខ្សែក្រវាត់ខ្មៅ ៨ដាន់។ វិចិត្រា ក៏ប្ដេជ្ញាថានឹងប្រឹងប្រែងពង្រឹងសមត្ថភាពផ្នែកចៅក្រម អាជ្ញាកណ្ដាលនេះជាបន្តបន្ទាប់ទៀត ដើម្បីមានសមត្ថភាពពេញលេញល្អ និងមានឱកាសឈានដល់កម្រិតអន្តរជាតិនៅពេលណាមួយ។
រំលឹកដែរថា សហព័ន្ធតេក្វាន់ដូ ITF បានបើកវគ្គបណ្ដុះបណ្ដាលចៅក្រម អាជ្ញាកណ្ដាល កម្រិត «ក» រយៈពេល៦ថ្ងៃគឺចាប់ពីថ្ងៃទី២១ ដល់ ២៦ ខែកញ្ញា ឆ្នាំ២០២០ នៅវិមាននៃពហុកីឡដ្ឋានជាតិ។ វគ្គបណ្ដុះបណ្ដាលនេះមានគ្រូឧបទេសជាតិកូរ៉េខាងជើង Grand Master Ri Chol Nam កម្រិតខ្សែក្រវាត់ខ្មៅ ៨ដាន់៕