អ្នកគ្រប់គ្រងការផលិតនៅ Rock ធ្លាប់ជាកុមារលក់ទឹកកកឈូសតាមកំពង់ចម្លង

2014-09-25 22:16:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆ្នាំ២០១៣ មកដល់ ២០១៤ ជាឆ្នាំដែលផលិតកម្ម Rock បានវិវត្តន៍ខ្លួនមកជាអ្នកផលិតភាពយន្តក្នុងស្រុកច្រើនជាងគេ ពោលគឺដល់ទៅជាង ២០រឿង ទាំងភាពយន្តភាគ និងភាពយន្តខ្នាតធំ។ លោក យឹម សុសត្យា ជាបុគ្គលដ៏សំខាន់នៅពីក្រោយកិច្ចការដ៏មមាញឹកនេះ ក្នុងនាទីជាប្រធានគ្រប់គ្រងការផលិត និងជាជំនួយការអគ្គនាយកផង។

បច្ចុប្បន្នលោកបាន និងកំពុងធ្វើការយ៉ាងជិតស្និទ្ធជាមួយក្រុមផលិតអ្នកភាពយន្តដល់ទៅជិត១០ក្រុមផ្សេងគ្នា(ក្រុមជាប់កុងត្រាជាមួយ Rock) ដើម្បីផលិតខ្សែរឿងដែលមានរសជាតិប្លែកៗមកបម្រើអារម្មណ៍ និងខ្សែចក្ខុរបស់ទស្សនិកជន។ នេះមិនទាន់គិតពីក្រុមអ្នកផលិតរបស់លោកផ្ទាល់ប្រចាំផលិតកម្មផង។ សំឡឹងទៅកាន់តែឆ្ងាយពីអតីតកាលរបស់លោកទៀត លោក យឹម សុសត្យា ធ្លាប់ជាកុមារលក់នំចំណីកំប៉ិកកំប៉ុកនៅតាមទូកដរជួយអ្នកម្ដាយមេម៉ាយ ដែលជួនកាលរបរនេះ លោកត្រូវហែលទឹកត្រឡប់មកផ្ទះវិញទៀត ពេលទូកដែលលោកឡើងលក់មិនព្រមចូលដល់ច្រាំង។

តទៅនេះ សូមតាមដានដំណើរជីវិតរបស់អ្នកគ្រប់គ្រងការផលិតរូបនេះជាមួយ Sabay៖

ប្រវត្តិសង្ខេប

ឈ្មោះ	ថ្ងៃ ខែ ឆ្នាំ កំណើត	ទីកន្លែង កំណើត	ចំនួនបងប្អូន	កម្ពស់/ទម្ងន់	Facebook
យឹម សុសត្យាYIM SOSATHYA	ថ្ងៃទី ២ខែឧសភា ឆ្នាំ ១៩៦៩	ភូមិចុងក្រូច ឃុំរាប ស្រុកពារាំង ខេត្តព្រៃវែង	៥នាក់ (ប្រុស៣ ស្រី២)	កម្ពស់ ១.៧២ម៉ែត្រទម្ងន់ ៧៥ គីឡូក្រាម	https://www.facebook.com/meng.lysa?fref=ts

លោក យឹម សុសត្យា ឬ លីម៉េង(ឈ្មោះក្នុងសិល្បៈ) លោកមានស្រុកកំណើតនៅភូមិចុងក្រូច ឃុំរាប ស្រុកពារាំងខេត្តព្រៃវែង។ លោកជាកូនបន្ទាប់ពៅ(ទី៤)ក្នុងចំណោមបងប្អូនចំនួន ៥នាក់(ប្រុស៣ ស្រី២)។ ឪពុកឈ្មោះ យឹម ឮ (ស្លាប់ជំនាន់ប៉ុលពត) អ្នកម្ដាយឈ្មោះ ហាក់ ទន់ បច្ចុប្បន្នមានអាយុ ៧៦ឆ្នាំ។ កាលពីមុនអ្នកម្ដាយរបស់លោកមានមុខរបរជាអ្នកលក់ត្រី លក់នំបញ្ចុក និងលក់នំចំណីកំប៉ិកកំប៉ុកផ្សេងទៀត។

ជីវិតកុមារភាព

ចំរើនវ័យបានត្រឹមអាយុ ៦-៧ឆ្នាំប៉ុណ្ណោះ របបខ្មែរអាវខ្មៅក៏ចូលមកដល់។ ពេលវេលាអូសជើងផុតរយៈពេលជាង៣ឆ្នាំ លោក យឹម សុសត្យា បានវិលត្រឡប់មកស្រុកកំណើតវិញ។ លោកមានឱកាសលេងសប្បាយតាមរបៀបកុមារបានតិចតួចប៉ុណ្ណោះ ព្រោះត្រូវយកពេលក្រៅពីម៉ោងសិក្សាទៅជួយលក់ដូរនំចំណីម្ដាយមេម៉ាយនៅលើទូកកាណូតនៅផែព្រែកពោធិ ដើម្បីដោះស្រាយជីវភាព ខណៈពេលនោះលោកមានអាយុខ្ទង់ ១៣-១៤ឆ្នាំប៉ុណ្ណោះ។ មុខរបរដែលលោកសុខចិត្តបោះចោលពេលវេលាលេងសប្បាយផ្ទាល់ខ្លួន មកចែករំលែកការលំបាកអ្នកម្ដាយគ្រានោះ គឺលោកជាអ្នកទូលត្រីលក់ លក់នំ លក់បារី និងលក់ទឹកកកឈូសជាងដើម។ "ត្រង់ហ្នឹងខ្ញុំចាំច្បាស់ ព្រោះខ្ញុំតែងពពាយនាយលក់ថា "ទឹកកកឈូសផ្អែមត្រជាក់ ញុំាពីរនាក់ញាក់មុខដាក់គ្នា"។

មុខរបរជាអ្នកលក់តាមទូកដរ មិនមែនជារឿងងាយស្រួលប៉ុន្មានឡើយព្រោះត្រូវចល័តលក់ពីទូកមួយទៅទូកមួយ ជួនកាលចុះពីទូកមិនទាន់ត្រូវទូកបើកយកទៅជាមួយថែមទៀត លុះដល់កំពង់ដរមួយទៀតទើបជិះទូកផ្សេងត្រឡប់មកវិញ។ ជារឿងធម្មតាសម្រាប់កុមារៗលក់នំចំណីតាមទូក ឬកាណូត ប៉ុន្តែម្ដងម្កាលក៏ជួបរឿងលំបាកដែរ។ លោក ថា "ទូកខ្លះគេចូលច្រាំងឲ្យមិនអីទេ ប៉ុន្តែទូកខ្លះអត់ចូលយើងពិបាក មានគ្រាមួយនោះចាំមិនភ្លេច ពួកខ្ញុំត្រូវហែលទឹកមកកាន់ច្រាំងខ្លួនឯង យើងហូរតាមទឹកជិត២គីឡូម៉ែត្រទម្រាំគេចផុតពីខ្សែទឹកហូរមកដល់ខាង ហ៊ឺ..នឹកទៅកម្សត់ដែរកាលហ្នុង!”។

ប្រវត្តិការសិក្សា

វ័យខ្ទង់ ៤-៥ឆ្នាំ លោក យឹម សុសត្យា បានចូលសិក្សានៅបឋមសិក្សា "ព្រែកពោរ" តែរៀនមិនបានប៉ុន្មានផង របបអាវខ្មៅក៏ចូលមកដល់។ ឆ្លងកាត់របបនេះលោក សត្យា បានឱកាសចូលសិក្សាម្ដងទៀតក្នុងឆ្នាំ ១៩៨១នៅសាលាមធ្យមសិក្សា "ស្រីសឈរ" បច្ចុប្បន្នប្តូរមកជា "ស្រីសន្ធរ" និងបានបញ្ចប់ទទួលបានសញ្ញាបត្រឌីប្លូមនៅឆ្នាំ ១៩៨៦។ លោកបានបន្តមកបញ្ចប់ការសិក្សាចំណេះទូទៅនៅ "វិទ្យាល័យសម្ដេចឪ" នាខេត្តកំពង់ចាមនៅឆ្នាំ ១៩៩០ ទទួលបានសញ្ញាបត្របាក់ឌុបមួយផង។

ឡើងមកបន្តការសិក្សានៅរាជធានី

លោក យឹម សុសត្យា បានឡើងមករាជធានីនៅឆ្នាំដដែល ១៩៩០។ នៅភ្នំពេញ លោកបានចំណាយពេល១ឆ្នាំរៀនត្រៀមជំនាញប្រវត្តិវិទ្យា មុនពេលប្រឡងជាប់ចូលសិក្សាថ្នាក់បរិញ្ញាបត្រអក្សរសាស្ត្រ និងមនុស្សសាស្ត្រឯកទេស "ប្រវត្តិវិទ្យា" នៅសាកលវិទ្យាល័យភូមិន្ទភ្នំពេញ។នៅឆ្នាំ ១៩៩៥ លោកបានបញ្ចប់ដោយជោគជ័យ។ បន្តមកទៀតលោកបានចូលរៀនបំប៉នជំនាញគរុកោសល្យ១ឆ្នាំទៀតទើបក្លាយជាគ្រូពេញសិទ្ធិ។ ឈ្មោះលោកត្រូវគេបញ្ជូនទៅបង្រៀននៅខេត្តបាត់ដំបង ប៉ុន្តែគ្រានោះលោកអត់ទៅបង្រៀនទេ ព្រោះជាប់កិច្ចការមួយចំនួននៅភ្នំពេញ។

រំលឹកដល់ប្រវត្តិសិក្សានេះដែរ លោក យឹម សុសត្យា គឺជាអតីតសិស្សពូកែ ដោយបានប្រឡងសិស្សពូកែនៅស្រុកស្រីសន្ធរជាប់២មុខវិជ្ជាក្នុងពេលតែមួយគឺ "អក្សរសាស្ត្រ" និង "គណិតវិទ្យា"។ "ខ្ញុំត្រូវប្រឡងនៅកំពង់ចាមទៀតយើងជាប់ទាំងពីរមែនតែកាលហ្នុង គេឲ្យរើសតែមួយមុខប៉ុណ្ណោះ ហើយមិនដឹងថានិស្ស័យយ៉ាងម៉េច ខ្ញុំរើសយកខ្មែរ មិត្តភក្ដិខ្ញុំម្នាក់ទៀត គេរើសយកគណិត។ ប្រឡងនៅខេត្ត ខ្ញុំធ្លាក់ព្រោះកាលហ្នុងគេចេញច្បាប់ល្បើកអង្គរ ខ្ញុំរៀនអត់ទាន់ដល់ផង"។

ជីវិតការងារ

អំឡុងពេលសិក្សាបរិញ្ញាបត្រ លោក យឹម សុសត្យា បានឆ្លៀតទៅរៀនភាសាថៃបន្ថែមនៅបាក់ទូក។ រៀនបានតែ១ឆ្នាំប៉ុណ្ណោះ អាចចេះចាំប្រើការបាន ហើយលោកក៏បានចូលប្រឡូកការងារ ដោយធ្វើជាគ្រូបង្រៀនភាសាថៃ។ "ខ្ញុំរៀនបណ្ដើរ ធ្វើការបណ្ដើរដើម្បីយកលុយរៀន ព្រោះកាលនោះរំពឹងលើម្ដាយ គាត់អត់មានរបរអ្វីដុំកំភួនទេ"។ តាំងពីដើមមក លោកមានបំណងមុតមាំមួយ គឺចង់ធ្វើការនៅស្ថានទូត។ នៅឆ្នាំ ២០០១ លោកក៏បានសម្រេចបំណងមួយនេះ ដោយបានការងារជាអ្នកបកប្រែភាសាថៃនៅស្ថានទូតថៃ។ ប៉ុន្តែធ្វើបានតែ២ឆ្នាំប៉ុណ្ណោះ លោកក៏បាត់បង់ការងារនេះវិញ ដោយសារមានកុប្បកម្មដុតទូតថៃនៅគ្រានោះ។

លោក យឹម សុសត្យា កាលធ្វើការនៅស្ថានទូតថៃប្រចាំនៅកម្ពុជា

ដំណើរចូលសិល្បៈ និងផ្អាកទៅវិញ

តាមពិតទៅ យឹម សត្យា បានប្រឡូកការងារសិល្បៈតាំងពីអំឡុងពេលសិក្សាម្ល៉េះក្នុងទសវត្សរ៍ទី ៩០ ដើម្បីរកថវិកាទ្រទ្រង់ការសិក្សា។ ក្រោមការសហការជាមួយលោក មុំ បូវី ជាបងថ្លៃ លោកបានធ្វើកុនរឿង “ជើងមេឃធ្លុះធ្លាយ" "ចំប៉ីទងមាស" និងរឿង "ពៅឈូកស" ដោយលោក មុំ បូវី ជាអ្នកនិពន្ធ លោកជាអ្នកសរសេរប្លង់ ចាត់ចែងផលិត និងហៅតួជាមួយលោក ណាង ផាន់អាត្យា ជាអ្នកកាន់កាមេរ៉ា និងជាគ្រូដើមដែលបានបង្រៀនពីប្លង់ថតដល់លោក។ "ហៅតួហ្នឹងដឹងម៉េចទេ សព្វថ្ងៃមានទូរសព្ទណា ប៉ុន្តែកាលហ្នុងអត់ទេ អីចឹងពេលត្រូវការថត គឺត្រូវជិះម៉ូតូដើរប្រាប់តួតាមផ្ទះ ម្ដងម្នាក់ៗមិនស្រួលដូចសព្វថ្ងៃនេះទេ!(សើច)”។

លោក យឹម សុសត្យា និងក្រុមការងារថតកុនរឿង "ចៅពស់កេងកង"

ក្រៅពីនេះ លោក សត្យា ក៏ធ្លាប់ចូលរួមសម្ដែងមួយរឿងដែរគឺរឿង "ពៅឈូកស" ធ្វើជាតួព្រះឥន្ទ្រ។ "គឺអញ្ចេះទេ កាលហ្នុងគេខ្វះតួព្រះឥន្ទ្រ ដល់អីចឹងគេចាប់ឲ្យលេង ខ្ញុំក៏លេង ហើយដោយសាររឿងហ្នឹងហើយ ទើបខ្ញុំជាប់ឈ្មោះថា "ព្រះឥន្ទ្រមុខចង់" គឺព្រះអង្គមុខចិន រហូតមក អ្នកស្គាល់ស្និទ្ធដូចជាបង ពិន សំណាង តែងតែបង្អាប់ខ្ញុំពីរឿងនេះ"។ ក្រោយមកទៀតមានរឿងមួយចំនួនដែលលោកផលិតខ្លួនឯង ដឹកខ្លួនឯងមានរឿង "ស្រីដុះស្នែង" ជាដើម។

រឿងចុងក្រោយបំផុតក្រោមការដឹកនាំ និងចាត់ចែងផលិតរបស់លោក គឺរឿង "ស៊ូប៉ិអេងតាយ" មុនពេលភាពយន្តខ្មែរសន្លប់មួយរយៈដោយសារភាពយន្តថៃ។ លោក សត្យា បានផ្អាកសិល្បៈមួយរយៈ គាប់ជួនលោកត្រូវរៀនត្រៀមប្រឡងបញ្ចប់បរិញ្ញាបត្រផង មុនពេលបានការងារជាមន្ត្រីស្ថានទូតថៃ។

វិលចូលសិល្បៈវិញ

បន្ទាប់ពីអស់ការងារនៅស្ថានទូតថៃ លោក យឹម សុសត្យា ក៏បានដើរចូលការងារសិល្បៈវិញដដែល។ "មិនថានិស្ស័យឬយ៉ាងម៉េច ពីដើមឡើយខ្ញុំមិនដែលប្រាថ្នាការងារសិល្បៈទេ តែទីបំផុតការងារទូតដែលខ្ញុំប៉ងក៏អស់ ចុងក្រោយសិល្បៈដដែលមកដល់សព្វថ្ងៃ"។ លោក យឹម សុសត្យា ចាប់ផ្តើមការងារសិល្បៈជាថ្មីនៅឆ្នាំ ២០០៤ ដោយបានទៅធ្វើជាជំនួយការអ្នកដឹកនាំថតចម្រៀងកាយវិការជាមួយលោក មុំ បូវី (បងថ្លៃ) នៅខេត្តបាត់ដំបង ឲ្យផលិតកម្មឆ្លងដែន។

លោក យឹម សុសត្យា ក្នុងថ្ងៃសម្ពោធរឿង "ចៅពស់កេងកង"

នៅអំឡុងឆ្នាំ ២០០៤-២០០៥ លោកក៏បានមកធ្វើជាប្រធានផលិតក្នុងផលិតកម្មប្រាសាទពេជ្ររបស់លោកឧកញ៉ា តុង សេង ធ្វើរឿងជាច្រើនដូចជារឿង "ចៅពស់កេងកង" "មនុស្ស ឬខ្មោច" "មន្តមាយា" "ព្រាយក្រឡាភ្លើង" និងរឿង"នាងមច្ឆា" ជាដើម។ បទពិសោធន៍ផ្សេងទៀតលោកក៏ធ្លាប់ដឹកនាំថតបទចម្រៀងជាច្រើនដែរ ដូចជា ផលិតកម្មឆ្លងដែន និងនាគមាស។

នៅឆ្នាំ ២០០៦ លោក សត្យា ក៏បានមកកាន់ការជាប្រធានផ្នែកផលិតរបស់ផលិតកម្ម Rock ផ្នែកផលិតចម្រៀង។ លោក បានឈប់ទៅវិញមួយរយៈក្រោយផលិតកម្ម Rock បិទការផលិតចម្រៀង មុនពេលចូលមកវិញ ធ្វើការផលិតភាពយន្តវិញម្ដង ដែលមួយរយៈចុងក្រោយនេះ លោកបានកៀរគរក្រុមអ្នកផលិតភាពយន្តមក ផលិតរឿងបានជាង ២០រឿងទាំងភាពយន្តភាគ និងភាពយន្តខ្នាតធំ។

ជីវិតអាពាហ៍ពិពាហ៍

លោក យឹម សុសត្យា បានជួបជាមួយអ្នកស្រី ងិន សុជាតី ក្នុងវគ្គសិក្សាភាសាថៃនៅឆ្នាំ ១៩៩៩ ភរិយា។ ជួបមុខគ្នារាល់ៗថ្ងៃ លោក និងអ្នកស្រី ងិន សុជាតី ក៏ចាប់ផ្ដើមមានចិត្តលើគ្នា ហើយក្រោយពីសិក្សាមើលចិត្តគ្នាទៅវិញទៅមកបានប្រមាណជា២ឆ្នាំ លោក សត្យា ក៏បានរៀបអាពាហ៍ពិពាហ៍ក្លាយជាគូស្វាមី ភរិយា ពេញច្បាប់នៅឆ្នាំ ២០០១។ មកទល់បច្ចុប្បន្ន ក្រុមគ្រួសាររបស់លោក ទទួលបានចំណងដៃបុត្រា បុត្រីចំនួន ២នាក់។ កូនស្រីបង ឈ្មោះ សត្យា សុភានុ អាយុ ១៣ឆ្នាំ និងកូនប្រុសប្អូនឈ្មោះ សត្យា សុភាចារ អាយុ ៥ឆ្នាំ។

លោក យឹម សុសត្យា ឬ លី ម៉េង និងភរិយា

ផែនការជីវិត

ផែនការអនាគត លោក យឹម សុសត្យា ប្រាប់ថា លោកមិនចង់ចេញទៅណាឆ្ងាយពីការងារសិល្បៈទេ។ លោកចង់ផលិតភាពយន្តខ្នាតធំដោយខ្លួនឯង និងរៀបចំឲ្យគ្រួសារមានមុខរបរធំដុំមួយក្រៅពីការងារសិល្បៈ៕

អត្ថបទ៖ ទារិកា