យក់ ថិតរដ្ឋា ប្រកាសរកជួបមុខអតីតតារាចម្រៀងល្បីឈ្មោះបីរូប

2020-10-28 09:06:53
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតតារាចម្រៀងប្រចាំផលិតកម្ម អេស អេស ប៊ី គឺអ្នកនាង យក់ ថិតរដ្ឋា បានបង្ហាញរូបថតអនុស្សាវរីយ៍កាលពី១៤ឆ្នាំមុន របស់នាង និងស្វាមី ព្រមទាំងមិត្តធ្លាប់រួមអាជីពបីនាក់។ មិត្តទាំងនោះរួមមានលោក គង់ សង្វារដានី លោក ប៊ុន ស័ក្ដិ និងអ្នកនាង អាណា។

នៅថ្ងៃទី២៨ ខែតុលា នេះ អ្នកនាង យក់ ថិតរដ្ឋា បានបង្ហោះរូបថតមួយសន្លឹកនេះតាមបណ្ដាញសង្គមហ្វេសប៊ុកដោយសំណូមពរម្ចាស់រូបទាំងអស់នោះបង្ហាញមុខមាត់ពិតក្នុងពេលបច្ចុប្បន្ន ដើម្បីកុំឲ្យប្រិយមិត្តភ្លេចមុខ។

យក់ ថិតរដ្ឋា ដែលបច្ចុប្បន្នមានស្វាមី និងកូនទៅហើយនោះ ធ្លាប់ជាតារាចម្រៀងល្បីឈ្មោះម្នាក់កាលពីអំឡុងឆ្នាំ២០០៥ ប៉ុន្ដែនាងបានឃ្លាតឆ្ងាយពីវិស័យសិល្បៈអស់រយៈពេលជាច្រើនឆ្នាំក្រោយពីនាងបានរៀបការ និងបង្កើតកូនបាន២នាក់ ជាមួយលោក ឃុំ ប៉ុណ្ណាដែត ដែលជាអតីតដៃគូចម្រៀងជាមួយគ្នា។

ម្ចាស់បទ"ភ្លៀងធ្លាក់សូររណ្ដំ" រូបនេះ បានសម្រេចចិត្ដហក់ចូលប្រឡូកក្នុងវិស័យសិល្បៈជាថ្មី ដោយនាងទើបតែទទួលច្រៀងលើកដំបូងក្នុងកម្មវិធីប្រគំតន្ត្រីមួយរបស់សាប៊ូLiby ដែលផ្សាយបន្តផ្ទាល់នៅលើកញ្ចក់ទូរទស្សន៍ស៊ី ធី អិន កាលពីប៉ុន្មានថ្ងៃមុន។ ថ្មីៗនេះ យក់ ថិតរដ្ឋា បានព្យាយាមគាស់រំលើងនូវអនុស្សាវរីយ៍ចាស់ៗ និងរំលឹកនូវមិត្តសិល្បៈចាស់ៗរបស់នាងឡើងវិញ៕

អត្ថបទ៖ ជិន សុភ័ក្ដ្រ