ហ៊ុយ យ៉ាឡេង លើកចំណុចមួយចាក់ដោតណាស់ ក្រោយសម្រេចយករឿង "ដើម្បីកូន" ដាក់បញ្ចាំងជាលើកទី២

2020-10-28 09:01:29
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ហ៊ុយ យ៉ាឡេង បានសម្រេចយកស្នាដៃចុងក្រោយមួយដ៏ល្បីរបស់ខ្លួនរឿង "ដើម្បីកូន" មកដាក់បញ្ចាំងម្ដងទៀតជូនប្រិយមិត្តបានទស្សនានៅខែក្រោយនេះ ដោយក្នុងនោះលោកលើកឡើងចំណុចមួយដែលកូនៗគួរដឹកនាំដៃឪពុកចាស់មកទស្សនារឿងខាងលើ។

តាមការបង្ហើបចេញនៅលើបណ្ដាញសង្គម ខ្សែភាពយន្តដកស្រង់ពីជីវិតពិតរឿង "ដើម្បីកូន" នឹងត្រូវដាក់បញ្ចាំងសារជាថ្មីនៅថ្ងៃទី ១២ វិច្ឆិកា ខាងមុខនៅគ្រប់រោងភាពយន្តនៅក្នុងប្រទេសកម្ពុជា។ "បញ្ចាំងគ្រប់ទាំងអស់បង ទាំងនៅតែភ្នំពេញ និងនៅតាមខេត្ត និយាយរួមរោងណាដែលបើក គឺបញ្ចាំងទាំងអស់ លើកលែងតែ បាត់ដំបង ប៉ោយប៉ែត គេអត់ទាន់បើក!”។

រឿង "ដើម្បីកូន" គឺជាភាពយន្តរសជាតិថ្មី ដែលស្ដែងចេញពីតថភាពសង្គម និងរាប់ថាជារឿងប្រភេទអប់រំសង្គមទី១ដែលទទួលបានការចាប់អារម្មណ៍ខ្លាំង ក្រោយពីបានចេញចាក់បញ្ចាំងជូនប្រិយមិត្តទស្សនាកាលពីដើមឆ្នាំ ២០២០។ កាលណោះ ខណៈដំណើរចាក់បញ្ចាំងបាន និងកំពុងដំណើរការល្អ ដោយមានប្រិយមិត្តជាច្រើនគាំទ្រទាំងនៅតាមបណ្ដាខេត្ត និងរាជធានី ស្រាប់តែមេរោគខូវីដ១៩ ក៏បានផ្ទុះនៅកម្ពុជា។

ភ្លាមៗដើម្បីទប់ស្កាត់ការរីករាយដាលនៃជំងឺនេះ រាជរដ្ឋាភិបាលបានប្រកាសឲ្យបិទបណ្ដោះអាសន្នរោងភាពយន្ត និងកន្លែងសម្ដែងសិល្បៈនានា។ លោក ហ៊ុយ យ៉ាឡេង លើកឡើងថា ពេលនោះ រឿងរបស់លោក មិនទាន់ធ្លាក់ប្រជាប្រិយភាពនៅឡើយស្រាប់តែត្រូវផ្អាកកណ្ដាលទី។ ដូច្នេះហើយ បន្ទាប់ពីស្ថានភាពបានវិលមករកភាពល្អប្រសើរ ពោលគឺ រាជរដ្ឋាភិបាលគ្រប់គ្រងបានការចម្លងរបស់មេរោគកាចសាហាវនោះ ទើបរឿងនេះសម្រេចយកមកបញ្ចាំងម្ដងទៀត។

យ៉ាងឡេង ថ្លែងថា "កាលណោះ យើងបាត់ចំណូលអស់ ៣០% ព្រោះកំពុងតែទទួលការចាប់អារម្មណ៍ ស្រាប់តែមេរោគខូវីដហ្នឹងមក ក៏ផ្អាកទៅ ដល់ឥឡូវរោងកុនបើកវិញ ហើយរោងកុនគេយល់ព្រមឲ្យបញ្ចាំងដែរ ក៏សម្រេចយកមកបញ្ចាំងម្ដងទៀតទៅ ព្រោះកាលមុនមានអ្នកបានមើលរួច ហើយក៏មានអ្នកមិនទាន់បានមើលដែរ!”។

ការវិលត្រឡប់មកវិញជាលើកទី២នៃរឿង "ដើម្បីកូន" នេះ លោក ហ៊ុយ យ៉ាឡេង លើកឡើងថា នេះជាពេលល្អសម្រាប់កូនៗ សម្រាប់សម្ដែងទឹកចិត្តចំពោះលោកឪពុកដ៏មានគុណ។ លោកថ្លែងថា "ដឹកដៃលោកឪពុករបស់អ្នក មកទស្សនាភាពយន្តនេះ ដើម្បីគោរពការលះបង់របស់គាត់! លោកឪពុក មិនចេះនិយាយច្រើនដូចអ្នកម្តាយ តែលោកឪពុកប្រឹងលះបង់ដើម្បីកូនលុះមរណា!”។

សាររបស់ផលិតករ អ្នកនិពន្ធ ដឹកនាំ និងជាតួសម្ដែងរូបនេះ បានទទួលការសាទរជាច្រើនពីប្រិយមិត្តរបស់លោក ក្នុងនោះពិសេសអ្នកនៅតាមបណ្ដាខេត្ត ពួកគេអះអាងថា អន្ទះសាចង់ទស្សនារឿងនេះសារជាថ្មី៕

អត្ថបទ៖ ទារិកា