អ្នកជំនាញថៃប្រើវិធីនេះ ដើម្បីថែក្បាច់ច្រកទ្វារប្រាសាទភ្នំរូងខ្មែរ ដែលជួយពួកគេរកចំណូលបានរាប់លាន

2020-11-17 07:57:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាសាទភ្នំរូង ដែលថៃដាក់ឈ្មោះតំបន់នោះថា ឧទ្យានប្រវត្តិសាស្ត្រភ្នំរូង គឺជាប្រាសាទបុរាណមួយរបស់ខ្មែរកាលពីសម័យមហានគរ ដែលទឹកដីខ្មែរមានទំហំធំធេង វាតទី និងគ្រប់គ្រងមួយផ្នែកធំនៃដែនដីអាស៊ីអាគ្នេយ៍ដីគោក។

ប្រាសាទនេះមានទីតាំងមិនឆ្ងាយប៉ុន្មានពីព្រំដែនកម្ពុជា-ថៃនាពេលបច្ចុប្បន្នដែលស្ថិតនៅ ភូមិតាបុិក, ស្រុកឈ្លើមប្រៈកៀត ខេត្តបុរីរាំ ឬបុរីរម្យជាភាសាខ្មែរ។ ភ្នំរូងត្រូវបានសាងសង់លើកូនភ្នំធម្មជាតិ ដែលជាអតីតភ្នំភ្លើងងាប់ កាលពីរាប់លានឆ្នាំមុន ហើយនេះ គឺជាលក្ខណៈពិសេសរបស់ប្រាសាទភ្នំរូងដែលថៃបានផ្សព្វផ្សាយយ៉ាងខ្លាំងក្លាដើម្បីទាក់ទាញភ្ញៀវទេសចរទៅទស្សនា។

ភ្ញៀវទេសចរបរទេសដែលចង់ទៅទស្សនានៅទីនោះត្រូវទិញសំបុត្រតម្លៃទៅតាមប្រភេទមាន ១០០បាត ឬជាង៣ដុល្លារអាមេរិក និង១៥០បាត ឬជាង៥ដុល្លារអាមេរិកបើសិនជាចង់ទៅទស្សនាប្រាសាទផ្សេងទៀត។ ប្រាសាទនេះត្រូវបានកសាងឡើងដោយព្រះមហាក្សត្រខ្មែរក្នុងរាជ្យរបស់ព្រះបាទរាជេន្ទ្រវរ្ម័នទី២ ក្នុងសតវត្សទី១០ គ.ស ហើយបន្តសាងបន្ថែមដោយព្រះបាទជ័យវរ្ម័នទី៥ជាបុត្រ (?)។

នៅក្បែរភ្នំរូង មានកសិណ ឬស្រះ២ដ៏ធំសម្បើម ដែលកើតពីភ្នំភ្លើង ដោយស្រះមួយនៅជិតភ្នំ និងមួយទៀតនៅជិតប្រាសាទមឿងតាំ។ នៅចង្កេះភ្នំនោះមានអាស្រម២ដែលគេចាត់ទុកជាមន្ទីរពេទ្យព្យាបាលរោគ ហៅថា”អរោគសាលា” នៅជំនាន់ព្រះបាទជ័យវរ្ម័នទី៧។

លក្ខណៈពិសេសមួយទៀតរបស់ប្រាសាទនេះគឺជារៀងរាល់ឆ្នាំគឺមានបាតុភូតព្រះអាទិត្យជះចូលតាមខ្លោងទ្វារទាំង១៥ប្រលោះរបស់ប្រាសាទ ដែលកើតឡើង៤ដងក្នុងមួយឆ្នាំ។ ក្នុងខែមិនា និងតុលា គឺជាខែដែលបាតុភូតពន្លឺថ្ងៃលិចជះចូលប្រាសាទ រីឯខែមេសា និងកញ្ញា គឺជាខែដែលបាតុភូតថ្ងៃរះជះចូលប្រាសាទ។ បាតុភូតទាំង២នេះបានទាក់ទាញភ្ញៀវទេសចរឲ្យមកសិក្សា ពីប្រាសាទភ្នំរូងរាប់លាននាក់ក្នុង១ឆ្នាំៗ។

ដោយសារប្រាសាទភ្នំរូងផ្ដល់អត្ថប្រយោជន៍ និងចំណូលច្រើនសន្ធឹកដល់រដ្ឋាភិបាលថៃ ក៏ដូចជាផ្ដល់មុខរបរ និងការងារដល់ប្រជាជនថៃក្នុងតំបន់នោះ ទើបធ្វើឲ្យអ្នកជំនាញរបស់ថៃប្រឹងថែរក្សាប្រាសាទនេះយ៉ាងខ្លាំង។ កាលពីខែតុលា ថៃបានលាងសម្អាតក្បាច់នៅច្រកទ្វារចូលប្រាសាទ និងបន្ថែមកញ្ចក់ការពារកុំឲ្យភ្ញៀវទេសចរដើរជាន់ធ្វើឲ្យសឹកក្បាច់ ឬរបកជាដើម។

វិធីសាស្ត្រនេះហាក់សាមញ្ញ ប៉ុន្តែវានឹងផ្ដល់អត្ថប្រយោជន៍២ ក្នុងពេលតែមួយគឺទី១ ក្បាច់នៅមុខច្រកទ្វារមិនសឹក នៅគង់វង្សយូរឆ្នាំទៀត ហើយទី២អ្នកទេសចរ នៅតែអាចមើលឃើញក្បាច់នៅច្រកទ្វារបានដដែលដោយសារកញ្ចក់ថ្លាអាចមើលធ្លុះទៅក្រោម៕