លេចឮលើកទី១ហើយថា ព្រីម លីហ្សា មានបុរសម្នាក់ត្រៀមទិញចិញ្ចៀនពេជ្រឲ្យចុងឆ្នាំនេះ

2020-11-27 07:14:10
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាស្រីនិយមប្រើប្រាស់សំលៀកបំពាក់ Top Brand ព្រីម លីហ្សា បានលេចដំណឹងថា មានបុរសម្នាក់រស់នៅឯនាយសមុទ្រ ត្រៀមនឹងទិញចិញ្ចៀនពេជ្រ មួយវង់ជូននាឱកាសចុងឆ្នាំ ២០២០នេះ។

ដំណឹងនេះ បានលេចឡើង ក្រោយថ្មីៗនេះ ព្រីម លីហ្សា ខ្លួនឯងបានបើកបង្ហាញយ៉ាងកម្រនូវទំនាក់ទំនងស្នេហារបស់។ តារាស្រី បានសរសេរនៅលើទំព័រហ្វេសប៊ុករបស់នាងថា នាង បានមានទំនាក់ទំនងស្នេហាជាមួយបុរសម្នាក់ជាច្រើនឆ្នាំមកហើយ ហើយថា នាពេលនេះ នាងកំពុងតែនឹកបុរសនោះយ៉ាងខ្លាំង។

"នឹកមនុស្សប្រុសម្នាក់ដែលនៅក្រៅប្រទេសស្រលាញ់គ្នារយៈពេល 4 ឆ្នាំហើយឪពុកម្ដាយទាំងសងខាងក៏បានដឹងឮដែរ!”។ យ៉ាងណាក៏ដោយនៅពេលនេះ នាង និងបុរសម្នាក់នោះ បាន និងកំពុងជួបឧបសគ្គ ដោយសារពួកគេមិនអាចជួបគ្នា។ បញ្ហានេះបានធ្វើឲ្យតារាស្រីកើតទុក្ខយ៉ាងខ្លាំង។ លីហ្សា ថ្លែងថា "ពេលនេះ គឺពិបាកជួបគ្នាខ្លាំងណាស់មានអ្នកណាដូចជាខ្ញុំទេ?”។

សារទាំងប៉ុន្មាន របស់ ព្រីម លីហ្សា បាន ធ្វើឲ្យប្រិយមិត្តរបស់នាងជាច្រើន បានភ្ញាក់ផ្អើល ខណៈច្រើនឆ្នាំមកហើយ គេមិនដែលដឹងថា លីហ្សា មានគូស្នេហ៍ហើយនោះឡើយ។ ចំពោះបញ្ហានេះ ព្រីម លីហ្សា មិនបានបញ្ចេញលម្អិតហើយ ប៉ុន្តែមានប្រភពមួយផ្សេងទៀត បានលួចបង្ហើបក្នុងន័យបញ្ជាក់ទៅលើរឿងនេះ។

ប្រភពកំបាំងមុខដែលនៅមិនឆ្ងាយពីតារាស្រី បានឲ្យដឹងថា លីហ្សា ពិតជាមានទំនាក់ទំនងស្នេហាជាមួយបុរសជនជាតិមួយរូបមែន ហើយថា នៅចុងឆ្នាំនេះ ប្រសិនបើមិនមានការងើបឡើងនូវជំងឺខូវីដ១៩ទៀតនោះទេ បុរសជាគូស្នេហ៍រូបនោះ នឹងចុះមកស្រុកខ្មែរហើយ។

“តាមដឹង គូស្នេហ៍គាត់ គ្រោងចុះមកស្រុកខ្មែរចុងឆ្នាំហ្នឹង បើខូវីដ១៩មិនរាំងស្ទះទៀត ហើយការមកស្រុកខ្មែររបស់ជនជាតិគេរូបនោះ លឺថា គេត្រៀមទិញចិញ្ចៀនពេជ្រមួយវង់ ចូន អាលីហ្សា ផង!”។ បែបនេះក្ដី ប្រភពមិនបញ្ចេញអត្តសញ្ញាណរូបនេះ មិនហ៊ានអះអាងឡើយថា ការទិញចិញ្ចៀនពេជ្រឲ្យ លីហ្សា ក្នុងពេលនេះ មានន័យយ៉ាងណានោះទេ។

“គ្រាន់តែដឹងថា គេមកហើយ ទិញចិញ្ចៀនពេជ្រឲ្យ ប៉ុន្តែខ្ញុំអត់ច្បាស់ដែរថា នោះជាចិញ្ចៀនបញ្ចាំចិត្ត ឬចិញ្ចៀនភ្ជាប់ពាក្យរបស់ពួកគេនោះទេ!”។ ប្រភពបន្ថែម។

ជុំវិញបញ្ហានេះ សាមីខ្លួនតារាស្រីផ្ទាល់ នៅមិនទាន់អាចភ្ជាប់ទំនាក់ទំនងដើម្បីសុំការអធិប្បាយបាននោះទេ គិតត្រឹមរសៀលថ្ងៃទី ២៧ វិច្ឆិកានេះ។ យ៉ាងនេះក្ដី គេជឿថា អាប៉ោងអាចនឹងបើកគម្របឆាប់ៗនេះ ត្បិតថា វេលាចុងឆ្នាំ ដែលប្រភពលួចបង្ហើបនេះ នៅមិនយូរឡើយ៕

អត្ថបទ៖ ទារិកា