Facebook ថា Apple ចង់ចំណេញលុយជាងគិតពីឯកជនភាពរបស់អ្នកប្រើប្រាស់

2020-12-17 02:06:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងការបង្ហោះថ្មីមួយ Facebook បានអះអាងថាការផ្លាស់ប្ដូរថ្មីនៅលើ iOS 14 ដែលនឹងចាប់ផ្ដើមអនុវត្តន៍នៅដើមឆ្នាំ ២០២១ នឹងប៉ះពាល់ដល់អាជីវកម្មតូចៗជាច្រើន។

គួរដឹងថាចាប់ពីដើមឆ្នាំក្រោយ Apple នឹងតម្រូវឲ្យកម្មវិធីទាំងអស់ត្រូវសុំការអនុញ្ញាតពីអ្នកប្រើប្រាស់ក្នុងការប្រមូលយកចំណង់ចំណូលចិត្តអំពីការផ្សាយពាណិជ្ជកម្មរបស់អ្នកប្រើប្រាស់ ដែលទិន្នន័យនេះនឹងត្រូវប្រើដើម្បីការផ្សាយពាណិជ្ជកម្មរបស់ក្រុមហ៊ុនពាណិជ្ជកម្មចេញទៅចំគោលដៅ។ វានឹងបង្ហាញជាផ្ទាំងដូចខាងក្រោម ពេលអ្នកប្រើប្រាស់ចូលទៅកាន់កម្មវិធីណាមួយនៅលើ iOS 14 ៖

ដោយឡែកក្នុងការបង្ហោះរបស់ Facebook បានសរសេរដូចនេះថា ៖ "យើងមិនយល់ស្របនឹងគោលការណ៍ថ្មីរបស់ Apple នោះទេ ប៉ុន្តែ”យើងគ្មានជម្រើសអ្វីផ្សេងក្រៅពីបង្ហាញផ្ទាំងបញ្ជាក់របស់ Apple។ ប្រសិនបើយើងមិនព្រមបង្ហាញផ្ទាំងសួរបញ្ជាក់ទៅអ្នកប្រើប្រាស់ ពួកគេ (Apple) នឹងប្លុក Facebook ពី App Store។ ដែលបែបនេះគឺនឹងប៉ះពាល់ដល់អ្នកប្រើ និងអាជីវកម្មដែលពឹងផ្អែកលើសេវាកម្មយើង។"

Facebook បានបន្តរៀបរាប់ថាគោលការណ៍របស់ Apple គឺគិតតែពីប្រាក់ចំណេញ មិនមែនឯកជនភាពនោះទេ។ Facebook អះអាងថាអាជីវកម្មតូចៗនឹងត្រូវបង្ខំចិត្តប្រើប្រាស់ការបង់លុយប្រើប្រាស់សេវាកម្ម និងការលក់របស់របរបន្ថែមក្នុងកម្មវិធីដើម្បីរកប្រាក់ចំណូល ដែលចុងក្រោយ Apple គឺជាអ្នកចំណេញ។

ជាការឆ្លើយតបនឹង Facebook ខាង Apple បានធ្វើការពន្យល់ថា Facebook អាចប្រាប់អ្នកប្រើប្រាស់អំពីមូលហេតុនៃការសុំប្រមូលយកទិន្នន័យរបស់អ្នកប្រើប្រាស់បាន និងបានបន្ថែមថាគោលការណ៍ថ្មីលើ iOS 14 មិនបានតម្រូវឲ្យ Facebook ប្ដូរវិធីសាស្ត្រប្រមូលយកទិន្នន័យពីអ្នកប្រើប្រាស់នោះទេ គឺគ្រាន់តែតម្រូវឲ្យ Facebook ផ្ដល់ជូនជម្រើសដល់អ្នកប្រើ៕

ប្រភព៖ macrumors ប្រែសម្រួល៖ សុខហេង