ទើបបញ្ចប់គម្រោងរត់ សម្រាកមិនទាន់ស្រួលខ្លួនផង ឥឡូវ Sai ប្រកាសគម្រោងធំៗ២ទៀតហើយ!

2021-02-01 02:36:09
ចំនួនមតិ 0 | ចំនួនចែករំលែក 0

ចន្លោះមិនឃើញ

នាព្រឹកថ្ងៃសៅរ៍ ទី៣០ ខែមករា ឆ្នាំ២០២១ កម្មវិធីរត់ដើម្បីសប្បុរសធម៌ជាមួយសាយ បានរៀបចំកម្មវិធីប្រកាសបិទជាផ្លូវការ។

កម្មវិធីរត់ដើម្បីសប្បុរសធម៌ជាមួយសាយ ដែលលោកអ៊ួន បឋម (សាយ)បានធ្វើការរត់ដោយប្រើរយៈពេល៩៧ថ្ងៃ ក្នុងចម្ងាយ២៤០៨គ.ម ហើយបានឆ្លងកាត់ ២១ខេត្តក្រុង ជុំវិញប្រទេសកម្ពុជា បានបញ្ចប់ជាផ្លូវការតាមរយៈសន្និសីទសារព័ត៌មានមួយកាលពីថ្ងៃសៅរ៍ទី ៣០ មករា ២០២១ នៅ Major Cineplex by Smart។ តែឥឡូវយុវជនឆ្នើម បានប្រកាសគម្រោងធំ២ទៀតហើយ។

នៅក្នុងថ្ងៃបិទផ្លូវការ កម្មវិធីរត់ដើម្បីសប្បុរសធម៌ជាមួយសាយ បានឲ្យដឹងថា យុវជនមកពីខេត្តស្ទឹងត្រែង ទទួលបានទឹកប្រាក់បរិច្ចាគពីប្រជាពលរដ្ឋកម្ពុជាទាំងក្នុង និងក្រៅប្រទេស ព្រមទាំងបានពីសំណាក់ក្រុមហ៊ុនផ្សេងៗលើពីគោលដៅដែលបានដាក់នៅក្នុងកម្មវិធី ទ្វេមួយជាពីរ ដោយមានទឹកប្រាក់សរុបប្រមាណចំនួន ២ ០២៥ ៦០៩ ៧១០ រៀល (ពីរពាន់ម្ភៃប្រាំលាន ប្រាំមួយរយប្រាំបួនពាន់ ប្រាំពីររយដប់រៀល) ស្មើនឹងប្រមាណជា ៥០ ម៉ឺនដុល្លារសហរដ្ឋអាមេរិក ដែលថវិកានេះគឺជាថវិកាដ៏សប្បុរសបរិច្ចាគពីសំណាក់ប្រជាជនខ្មែរទាំងក្នុង និងក្រៅប្រទេស។

បើទោះជាកម្មវិធីរត់ដើម្បីសប្បុរសធម៌ជាមួយសាយបញ្ចប់ទៅដោយជោគជ័យ លោកអ៊ួន បឋម (សាយ) បានប្រកាសកម្មវិធីថ្មីពីរទៀត បន្ទាប់ពីកម្មវិធីនេះ នោះគឺ ៖

-ការផលិតជាភាពយន្តឯកសារពីកម្មវិធីរត់ដើម្បីសប្បុរសធម៌ជាមួយសាយ៖ ក្រោយការផលិតត្រូវបានបញ្ចប់ ភាពយន្តឯកសារនេះ នឹងដាក់បញ្ចាំងនៅក្នុងរោងកុន ដើម្បីប្រជាពលរដ្ឋទូទៅ និងជាពិសេសគឺ សម្រាប់យុវជនកម្ពុជាផ្ទាល់តែម្តងបានទស្សនា។ ភាពយន្តនេះ មានគោលបំណងជាគំរូ និងជាការជម្រុញទឹកចិត្ត ក្នុងការចាប់ផ្តើមធ្វើសកម្មភាពដើម្បីជួយដល់សង្គមនានា ពីយុវជនទាំងឡាយ នាពេលអនាគត។

-ចំណែកឯកម្មវិធីមួយទៀតនោះ គឺកម្មវិធី តោះចាប់ផ្តើមធ្វើជាមួយសាយ (Let’s Do It with Sai)៖ ជាកម្មវិធីជួយសង្គមមួយទៀត មានចេតនាផ្តួចផ្តើមគំនិតឲ្យយុវជនមាន គំនិតចង់ធ្វើសកម្មភាពល្អដើម្បីជួយដល់សង្គម ក្នុងការចាប់ផ្តើមធ្វើដោយមិនរារែកចិត្ត ដែលក្នុងនោះកម្មវិធីនឹងធ្វើការ ជ្រើសរើសយកយុវជនជាក្រុមតូចៗ ដែលបានដាក់ពាក្យមកកាន់កម្មវិធី។ កម្មវិធីនឹងផ្តល់ជាប្រឹក្សាយោបល់ និងពិភាក្សាក្នុងការរៀបចំសកម្មភាព ឬយុទ្ធនាការកិច្ចសង្គមណាមួយ ហើយកម្មវិធីអាចនឹងធ្វើការគាំទ្រជាកញ្ចប់មូលនិធិមួយចំនួនផងដែរ។

យ៉ាងណា មិនមានកាលបរិច្ឆេទផ្លូវការត្រូវបានបញ្ជាក់នៅឡើយ ប៉ុន្តែគេជឿថា អ្វីៗអាចនឹងមិនយូរនោះទេ៕

អត្ថបទ៖ ទារិកា