នាយកុយ ប្រាប់ពីស្ថានភាពសុខភាពរបស់ខ្លួនក្រោយចាក់វ៉ាក់សាំងSinopharm បាន១ថ្ងៃ

2021-02-17 06:53:58
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែងជើងចាស់លោក ជួង ជី ហៅនាយកុយ បានរ៉ាយរ៉ាប់ពីស្ថានភាពសុខភាព និងការតបនានាក្រោយចាក់វ៉ាក់សាំងSinopharm ដើម្បីការពារជំងឺកូវីដ-១៩ បាន១ថ្ងៃ។ គិតមកដល់រសៀលថ្ងៃទី១៧ ខែកុម្ភៈ នេះលោកថា រូបលោកពុំមានអាការៈអ្វីខុសប្លែកទេគឺនៅមានសុខភាពល្អធម្មតា។

នាយកុយ ប្រាប់Sabay នៅមុននេះបន្តិចថា មុនចាក់ ខាងគ្រូពេទ្យបានពិនិត្យសុខភាពលោកឃើញថាពុំមានជំងឺទឹកនោមផ្អែម ថ្លើម មហារីក និងជំងឺប្រចាំកាយអ្វីផ្សេងទៀតដែលងាយនឹងប្រតិកម្មនឹងថ្នាំបង្ការជំងឺកូវីដ-១៩ ឡើយ ទើបគ្រូពេទ្យចាក់ឲ្យតែម្ដង។ Sabay៖ គ្រូពេទ្យថា ការចាក់នេះមានប្រសិទ្ធភាពកម្រិតណាដែរ...បើលោកពូលើសអាយុទៅហើយ? នាយកុយ៖ពេទ្យថាអត់អីទេចាក់ទៅ...ទោះបីខ្ញុំចាស់ហើយឲ្យតែនៅមានសុខភាពល្អ ឬអត់ដែលមានបញ្ហាអាលែកហ្សីចាក់ទៅការពារបានល្អ"។

បើតាមនាយកុយ បន្ទាប់ពីចាក់ថ្នាំបង្ការជំងឺកូវីដ-១៩ នេះ គឺត្រូវតមផឹកស្រា ពិសាសាច់គោ និងគ្រឿងសមុទ្រ ព្រមទាំងការពារកន្លែងចាក់នោះមិនឲ្យត្រូវទឹកភ្លាមៗឡើយ ហើយហាមធ្វើការងារធ្ងន់ធ្ងរបណ្ដាលឲ្យប៉ះពាល់ដល់សុខភាព។លោកបានអនុវត្តតាមការណែនាំនេះហើយ ហើយពេលនេះលោកពុំមានអាការៈក្ដៅខ្លួន ឬគេងមិនលក់អ្វីឡើយកាលពីយប់មិញនេះ ពោលគឺពេលក្រោកពីដំណេកមកភ្លាម លោកនៅងើបដើរភិល ហូបបាន និងកម្លាំងនៅមានធម្មតា ។

នាយកុយដែលពេលនេះមានវ័យ៦៤ឆ្នាំលើសពីលក្ខខណ្ឌតម្រូវ នៃការទទួលវ៉ាក់សាំងទៅហើយក្ដី ប៉ុន្តែលោកនៅតែចាក់ដើម្បីផ្ដល់ជាគំរូដល់មហាជនផង និងដើម្បីការពារសុខភាពផ្ទាល់ខ្លួន គ្រួសារ និងសង្គមជាតិផង ព្រោះលោកគឺជាមនុស្សរបស់មហាជន។ ថ្ងៃនេះដែរ លោក អ៊ូ ប៊ុណ្ណារ៉ាត់ ដែលជាតារាកំប្លែងរួមជំនាន់ ហើយមានតួនាទីនៅក្នុងបញ្ជាការដ្ឋានកងអង្គរក្សដូចគ្នានោះក៏លោកបានចេញទៅចាក់វ៉ាក់សាំងSinopharm របស់ចិននេះហើយដែរ៕

អត្ថបទ៖ ជិន សុភ័ក្ដ្រ