កុល ដាវី កាត់បន្ថយការចេញថតរឿង ហើយអនុវត្តវិធានបីយ៉ាងខ្ជាប់ខ្ជួន ដើម្បីត្រៀមពពោះកូនដំបូង

2021-02-18 08:59:34
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងស្រីវ័យជ្រេ កុល ដាវី ប្រកាសយកកូនដំបូងដែលជាតំណក់ឈាមរួមគ្នារវាងនាង និងលោក សុខ រក្សា ឲ្យបានក្នុងឆ្នាំ២០២១ នេះ។ ដាវី កំពុងថ្នមខ្លួនយ៉ាងខ្លាំង ដោយនាងសុខចិត្តផ្អាកការចេញថតខ្សែភាពយន្តស្ទើរទាំងស្រុង ហើយងាកមកអនុវត្តសកម្មភាពបីយ៉ាងរាល់ថ្ងៃតាមការណែនាំរបស់គ្រូពេទ្យ ដើម្បីឲ្យមានសុខភាពល្អ និងឆាប់មានកូន។

នៅក្នុងឱកាសដែលតារាស្រីរូបនេះចូលរួមក្នុងពិធីសម្ពោធបើកApp មួយរបស់ក្រុមហ៊ុន សាស្ដ្រហ្វៀម យប់មិញ បានបង្ហើបថា សកម្មភាពចេញថតខ្សែភាពយន្ត និងស្ពតផ្សេងៗដែលធ្លាប់មានក្នុង១សប្ដាហ៍ចេញស្ទើរ៥ ទៅ៦ថ្ងៃនោះ ត្រូវនាងកាត់បន្ថយមកនៅត្រឹមតែ២ ឬ៣ថ្ងៃប៉ុណ្ណោះក្នុង១សប្ដាហ៍។ ទន្ទឹមគ្នានេះ នាងក៏បានអនុវត្តជាប្រចាំនូវទម្លាប់គេងឲ្យបានគ្រប់គ្រាន់ ទទួលទានបន្លែ-ផ្លែឈើឲ្យបានច្រើន និងហាត់ប្រាណរាល់ព្រឹក។

កុល ដាវី៖"តាមពិតខ្ញុំត្រូវផ្អាកទាំងស្រុងហើយ ដើម្បីត្រៀមមានកូន...តែដោយខ្ញុំបានសន្យាជាមួយអ្នកដឹកជាច្រើននាក់ថា ខ្ញុំនៅតែបន្តអាជីពនេះហើយខ្ញុំក៏ទទួលខ្លះទៅ ហើយទៅថ្ងៃមុខបើទោះបីជាខ្ញុំមានកូនក៏ខ្ញុំនៅតែចេញសម្ដែងដែរ"។

បច្ចុប្បន្ន កុល ដាវី មានវ័យជាង៣០ឆ្នាំហើយ ហើយនាងបានស្រឡាញ់ និងរួមរស់ជាមួយលោក សុខ រក្សាអស់រយៈពេលជិត១០ឆ្នាំ ប៉ុន្តែគេមិនធ្លាប់ឮថានាងមានកូន ឬចង់បានកូននោះទេជាមួយគ្នានោះទេ។ ទើបនៅចុងឆ្នាំ២០២០ និងដើមឆ្នាំ២០២១ នេះ កុល ដាវី បានប្រកាសផ្ទួនៗថានាង និងស្វាមីចង់បានកូនម្នាក់ដែលជាដំណក់ឈាមរួមគ្នា។

កុល ដាវី បានប្រឡូកក្នុងវិស័យសិល្បៈតាំងពីឆ្នាំ២០០៥។ បច្ចុប្បន្នប្រជាប្រិយភាព និងទីផ្សារសម្ដែងរបស់នាងនៅតែខ្ពស់ បើទោះបីជានាងបើកចំហនូវទំនាក់ទំនងស្នេហាជាមួយលោក សុខ រក្សា ទាំងនៅមុន និងក្រោយរៀបការ ហើយបើទោះបីជាពេលនេះនាងមានវ័យជ្រេបន្តិចទៅហើយក្ដី៕

អត្ថបទ៖ ជិន សុភ័ក្ដ្រ