បាន គីមូន៖ អេបូឡា ធ្វើទុក្ខបុកម្នេញមិនដល់ពាក់កណ្ដាល ២០១៥ ទេ

2014-11-22 18:05:25
ចំនួនមតិ 0 | ចំនួនចែករំលែក 0

ចន្លោះមិនឃើញ

មុននេះបន្តិច អគ្គលេខាធិការ អង្គការសហប្រជាជាតិ សញ្ជាតិកូរ៉េខាងត្បូង លោក បាន គីមូន ថ្លែងទៅកាន់សារព័ត៌មានថា ការធ្វើទុក្ខបុកម្នេញ ទាំងការចម្លង និងគម្រាមកំហែងអាយុជីវិតមនុស្ស ដ៏គួរឲ្យបារម្ភ (ជំងឺ) អេបូឡា នឹងអស់អានុភាព យ៉ាងយូរត្រឹមពាក់កណ្ដាលឆ្នាំ ២០១៥។

ស៊ិនហួរ រាយរាប់ហេតុផលរបស់មេដឹកនាំអង្គការអន្តរជាតិដ៏មានសក្ដានុពលដដែលនេះថា ការរីករាលដាល និងការគំរាមកំហែងរបស់ អេបូឡា នឹងលែងជាបញ្ហាចោទទៀត ត្រឹមចុងឆមាសទីមួយ ២០១៥ តាមរយៈការបន្តកិច្ចសហប្រតិបត្តិការដូចភ្លៀងរលឹមពីសំណាក់បណ្ដាប្រទេសនានា ប្រឆាំងទៅនឹងជំងឺ ដ៏កាចសាហាវមួយនេះ។

“យើងត្រូវការការទទួលខុសត្រូវជាសាកល និងរួមគ្នាជាចាំបាច់ តាមរយៈការផ្ដល់ការសារអប់រំ និងបំប៉នជំនាញឱសថសាស្ត្រដល់ក្រុមការងារ និងជាពិសេសប្រជាពលរដ្ឋនៅតាមតំបន់ដាច់ស្រយាលដែលមិនអាចមើលរំលងបាន"។ គីមូន បន្ថែម។

ក្នុងស្មារតីទទួលខុសត្រូវ កៀកស្មាគ្នាការពារ ព្យាបាល និងសង្គ្រោះ អ្នកជំងឺ ដើម្បីរួមគ្នាកម្ចាត់ និងឈានដល់ការលុបបំបាត់ពីមេរោគអេបូឡា ប្រទេសមហាអំណាចសេដ្ឋកិច្ចលេខ១ ចិន បានផ្ដល់ជំនួយ ៥លានដុល្លារអាមេរិក ដល់ប្រទេស Guinea ភាគខាងលិចទ្វីបអាហ្វ្រិក។ ទឹកប្រាក់ទាំងនោះក្រុមការងាររបស់WHO នឹងចាយទៅលើ រថយន្តសាមុយ ២០គ្រឿង ម៉ូតូ ១០០គ្រឿង គ្រែ(ពេទ្យ) និងសម្ភារៈសុខាភិបាលមួយចំនួនទៀត។ ជាមួយគ្នានេះដែរ ក្រៅពីប្រាក់កាស ចិនខ្លួនឯងក៏បានបញ្ជូន បុគ្គលិកជំនាញរបស់ខ្លួន ទៅផ្ដល់វគ្គបណ្ដុះបណ្ដាល ទាំងការការពារ និងគ្រប់គ្រង Ebolaដល់ក្រុមការងារដល់ប្រទេសដែលកំពុងគម្រាមកំហែងដោយសារអេបូឡា ធ្ងន់ធ្ងរ Guinea ផ្ទាល់តែម្ដង។

របាយការណ៍ចុងក្រោយរបស់អង្គការសុខភាពពិភពលោកក៏បានឲ្យដឹងដែរថា គិតត្រឹមថ្ងៃទី ២០ ខែវិច្ឆិកានេះ អេបូឡា កើតមាន ៦ករណី នៅម៉ាលី ហើយអ្នកទាំងនោះស្លាប់ទាំងអស់។ ប៉ុន្តែបើគិតលើករណីដែលកើតមានក្នុងប្រទេស Guinea ១.៩៧១ករណី មាន ១.១៩២នាក់បានបាត់បង់ជីវិត។

ដោយ៖ ខ្លាឃ្មុំតូច ប្រភព៖ xinhuanet