Prang និង Tong ធ្លាប់បែកគ្នា ២ឆ្នាំ ហេតុផលមិនមែនមានអ្នកទី ៣ តែពេលវិលជួបគ្នា ស្រឡាញ់គ្នាលើសដើម

2021-03-25 03:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកណាៗក៏សរសើរ និងលួចច្រណែនស្នេហារវាងតារាសម្ដែង Prang Kanarun និង Tong Twopee ដែរ ក៏ព្រោះតែភាពផ្អែមល្ហែមដែលអ្នកទាំង ២តែងបង្ហាញ ប៉ុន្តែមិនមែនគ្រប់គ្នាសុទ្ធតែដឹងទេ ពី Background ស្នេហារបស់អ្នកទាំង ២។

ស្ថិតក្នុងបទសម្ភាសកាលពីពេលថ្មីៗ Prang Kanarun បាននិយាយថា នាង និង Tong ធ្លាប់បានបែកគ្នាដល់ទៅ ២ឆ្នាំឯណោះ ទម្រាំនិស្ស័យបណ្ដាលចិត្តពួកគេឲ្យវិលមកជួបគ្នាវិញ។

មុនចូលដល់សាច់រឿងស៊ីជម្រៅ ក្រុមការងារ Thairath បានសួរថា ពីមុនធ្លាប់មានសង្សារទេ? Prang ឆ្លើយថា ដោយគោរពតាមសំណូមពររបស់ម្ដាយ ថាកុំទាន់មានសង្សារ ពេលនៅរៀន ទើបពេលបញ្ចប់ការសិក្សានៅមហាវិទ្យាល័យ នាងក៏មានគូស្នេហ៍នឹងគេ គឺ Tong Twopee នេះឯង។

ទំនាក់ទំនងនេះបន្តជាមួយគ្នារយៈពេល ៤ឆ្នាំ ហើយពេលនោះជីវិតពួកគេពោរពេញទៅដោយក្ដីសុខ។ ម្យ៉ាងនេះគឺជាស្នេហ៍គ្រាដំបូង ដូចនេះវាមានន័យខ្លាំងណាស់ ប៉ុន្តែដោយសារអ្នកទាំង ២រសនៅពិភពដែលមានការយល់ឃើញផ្សេងគ្នា ទើបត្រូវចែកផ្លូវគ្នាសិន។

Prang និយាយថា នាងបែកពី Tong ដោយសារពេលនោះនាងមិនទាន់មានអ្វីក្នុងជីវិត មិនមែនដោយសារមានជនទី ៣ជ្រៀតជ្រែកទេ ប៉ុន្តែក៏ព្រោះនាងមានក្ដីសុបិនច្រើនដែលចង់សម្រេច ហើយចង់ធ្វើអ្វីដែលចង់ធ្វើឲ្យជោគជ័យសិន ទើបជ្រើសយកផ្លូវបែកសិន។

រយៈពេលបែកគ្នា ២ឆ្នាំនោះ ពួកគេមិនបាននិយាយរកគ្នាសូម្បីមួយម៉ាត់ បើទោះបីឃ្លាតគ្នាក្នុងន័យល្អ មិនខឹងគ្នា និងគ្មានរឿងអ្វីបង្កជាជម្លោះក៏ដោយ។

តាមពិតក្រោយពីនោះ សាមីខ្លួនទាំងសង្ខាងចាត់ទុកគ្នាជាមិត្តល្អ បើមានរឿងអ្វីអាចជួយគ្នាបាន ប៉ុន្តែនៅពេលអត់និយាយរកគ្នាបែបនេះ វាបង្កើតជាការអៀនខ្មាសរៀងខ្លួនរហូតមិនដឹងធ្វើយ៉ាងណា និងមិនហ៊ាន Chat រកគ្នា។

កន្លងផុតមួយរយៈការងារ និងអ្វីដែលពួកគេចង់ធ្វើ ក៏បានសម្រេចជាបន្តបន្ទាប់ ហើយពេលនោះ ក៏ស្រាប់នាងលើកយកចំណុចខ្លះមកពិចារណាសិន។ Prang ថា ពេលនោះ នាងគឺជាអ្នក Chat ទៅ Tong មុន (ដល់កន្លែងនេះនាងសើច ព្រោះថារាល់ដង Tong ជាអ្នក Chat មកនាងមុន)។ អ្វីដែលគួរឲ្យភ្ញាក់ផ្អើល ពេលនោះគឺ Tong កំពុងបួសជាសង្ឃ ដូច្នេះចាំដល់ពេលសឹករួច ហើយនាងក៏សុំទៅអនុមោទនាកុសលផលបុណ្យជាមួយនឹង Tong។ បន្ទាប់មកពួកគេក៏ចាប់ផ្ដើមនិយាយគ្នាលេង ហើយ Prang ក៏បានលាន់មាត់ថា៖ «វាយូរហើយដែរ ដែលយើងមកជាមិត្តល្អនឹងគ្នា» ភ្លាមៗ Tong ក៏តបថា «ចាំមួយភ្លែត តោះទៅញ៉ាំបាយជាមួយគ្នា»។

ក្រោយមក ពួកគេក៏ឧស្សាហ៍ណាត់គ្នាញ៉ាំអីក្រៅ ហើយចំណាយពេលរហូតដល់ទៅ ២-៣ខែ ដែលអ្នកទាំង ២ស្វែងយលពីគ្នាជាថ្មី និងសិក្សាពីអ្វីគ្រប់យ៉ាងដែលជាបញ្ហា។ ចូលដល់ចំណុចនេះ Prang និយាយថា រឿងអីបន្តជាមួយគ្នាវិញមិនបាន ព្រោះតែពួកគេមិនបានឈ្លោះបែកគ្នាឯណា ពួកនាងគ្រាន់តែមិននិយាយរកគ្នាប៉ុណ្ណោះ។ អ្នកផ្សេងអាចនឹងមានដៃគូរៀងខ្លួន បើស្ថិតក្នុងកាលៈទេសៈបែបនេះ នោះក៏ព្រោះពួកគេស្អប់គ្នា មានរឿងឈ្លោះគ្នាខ្លាំងបណ្ដាលឲ្យបែកមិនដូច Prang និង Tong ទេ។

មកដល់បច្ចុប្បន្ននេះ ស្នេហារបស់ពួកគេមានអាយុ ១០ឆ្នាំហើយ សរុបទាំង ២ឆ្នាំដែលបែកគ្នា ប៉ុន្តែពួកគេនៅតែផ្ដល់នូវក្ដីស្រឡាញ់ឲ្យគ្នាកាន់តែខ្លាំង ដោយសារភាគីទាំងសង្ខាងយល់ពីគ្នា មិនយល់តែចិត្តខ្លួនឯង និងព្យាយាមយល់ ក៏ដូចជាអត់ឱនឲ្យគ្នាគ្រប់ពេល។ សម្រាប់អ្នកគាំទ្រក៏សង្ឃឹមថា ថ្ងៃមង្គលជ័យរបស់គូស្នេហ៍ ១គូនេះ នឹងកើតឡើងឆាប់ៗ៕