គិតជ្រៅណាស់! ធុង ប៉េត្រូ ត្រៀមបណ្ដុះក្មេងបីនាក់ដើម្បីជួយសង្គមតាមរយៈកម្មវិធី"ប្រឡងកញ្ញាឯកភេទទី៣"

2021-03-30 07:29:24
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្លែក ហើយដំបូងគេនៅកម្ពុជា គឺ"ប្រឡងកញ្ញាឯក២៥ខេត្ត/ក្រុង សម្រាប់អ្នកភេទទី៣"។ កម្មវិធីនេះ នឹងរៀបចំឡើងដោយក្រុមហ៊ុនមួយដោយមានការផ្ដួចផ្ដើមគំនិតពីអ្នកស្រឡាញ់ភេទដូចគ្នា ក្នុងគោលបំណងផ្ដល់ឱកាសការងារ និងភាពសប្បាយរីករាយ។

តារាសម្ដែង និងជាអ្នកលក់តាមបណ្ដាញសង្គមដ៏ល្បីឈ្មោះ គឺលោក ទុយ វិសុទ្ធ ហៅធុង ប៉េត្រូ បញ្ជាក់ថា កម្មវិធីនេះរៀបចំឡើងសម្រាប់តែបងប្អូនភេទទី៣ ឬអ្នកស្រឡាញ់ភេទដូចគ្នាប៉ុណ្ណោះ ហើយបើបេក្ខជនចាប់អារម្មណ៍អាចដាក់ពាក្យដោយឆាតចូលFacebook ធុង ប៉េត្រូ ឬទាក់ទងតាមទូរស័ព្ទលេខ០៩៧៩៨៨២៩៨៨ ចាប់ពីថ្ងៃទី២៩ ខែមីនា ឆ្នាំ២០២១ តទៅ។

ធុង ប៉េត្រូ៖"សម្រាប់អ្នកជាប់លេខ១ បានធ្វើការជាមួយក្រុមហ៊ុន អូគីថាណា រយៈពេល១ឆ្នាំ ហើយបេក្ខជនដែលជាប់ជយលាភី នឹងមានឱកាសច្រើនក្នុងការកសាងសមត្ថភាព កេរ្តិ៍ឈ្មោះ និងជួយសង្គមដូចខ្ញុំបានធ្វើរាល់ថ្ងៃនេះអីចឹង"។

កម្មវិធីប្រឡង"កញ្ញាឯកភេទទី៣" គ្រោងរៀបចំធ្វើនៅរាជធានីភ្នំពេញ ក្នុងខែមេសា ឆ្នាំ២០២១ នេះ។ បេក្ខជនគ្រប់រូបដែលមានអាយុក្រោម៥០ឆ្នាំ អាចដាក់ពាក្យចូលរួមប្រឡងបានដោយមិនគិតពីរូបសម្បត្តិ ប៉ុន្តែសំខាន់ឲ្យតែបេក្ខជនមានទេពកោសល្យខាងដើរម៉ូត និងតុបតែងខ្លួន។

តារាកំប្លែង ធុង ប៉េត្រូ បង្ហើបថា កម្មវិធីនឹងជម្រុះយកជយលាភីលេខ១ លេខ២ និងលេខ៣ ដោយកំណត់ជូនរង្វាន់សម្រាប់ជយលាភីលេខ១ នូវទឹកប្រាក់ចំនួន៣០០ដុល្លារ លេខ២ទទួលបាន២០០ដុល្លារ និងជយលាភីលេខ៣ ទទួលបានចំនួន១០០ដុល្លារ៕

អត្ថបទ៖ ជិន សុភ័ក្ដ្រ