លេងមែនទែនហើយ! លៀក លីដា គ្រោងសម្ពោធដាក់បញ្ចាំងខ្សែភាពយន្តខ្នាតធំចំនួន៤រឿង ក្នុងខែតែមួយ

2021-04-01 03:24:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម អិល ឌី គ្រោងសម្ពោធចាក់បញ្ចាំងខ្សែភាពយន្តខ្នាតធំចំនួន៤ នៅក្នុងខែឧសភា ឆ្នាំ២០២១។ ដំណឹងនេះត្រូវបានម្ចាស់ផលិតកម្មលោក លៀក លីដា ប្រកាសតាមបណ្ដាញសង្គម Facebook នៅព្រឹកថ្ងៃទី១ ខែមេសា នេះ។

លោក លៀក លីដា បានប្រាប់Sabay បន្ថែមថា ក្នុងចំណោមរឿងទាំង៤ គឺអាចបញ្ចេញចំណងជើងបានតែមួយរឿងសិនប៉ុណ្ណោះ គឺរឿង"តណ្ហា"។ ចំពោះទីតាំង និងកាលបរិច្ឆេទសម្ពោធ ហើយចាក់បញ្ចាំងនៅរោងភាពយន្ត ឬតាមPageផ្លូវការរបស់ផលិត អិល ឌី ឬយ៉ាងណានោះ លោកមិនទាន់បញ្ជាក់បាននៅឡើយ។

លៀក លីដា៖"រឿងខ្នាតធំទាំងអស់ តែឥឡូវសុំទោសអាចប្រើប្រាស់បានមួយសិនទេ គឺរឿង"តណ្ហា"...ពួកយើងនឹងប្រាប់ឆាប់ៗ ហើយជួបគ្នានៅថ្ងៃសម្ពោធ"។

ទាក់ទងនឹងវិស័យភាពយន្ដនេះដែរ ក្រសួងវប្បធម៌ និងវិចិត្រសិល្បៈ សម្រេចផ្អាកដំណើរការជាបណ្ដោះអាសន្នរោងភាពយន្ដ រោងសំម្ដែងសិល្បៈ និងសារមន្ទីរនៅទូទាំងប្រទេសជាថ្មី កាលពីថ្ងៃទី២១ ខែមីនា ឆ្នាំ២០២១ ដោយសារបញ្ហាជំងឺកូវីដ-១៩ កំពុងឆ្លងរាតត្បាតជាសកល។

ប៉ុន្ដែលោក លៀក លីដា ដែលជាផលិតករក្នុងចំណោមផលិតករភាពយន្ដខ្មែរមួយចំនួនដែលមានរឿងនៅក្នុងដៃ បានព្យាយាមបញ្ចេញវាតាមគ្រប់រូបភាព ដោយអ្នកខ្លះចេញតាមផេកផ្លូវការរបស់ខ្លួន និងបណ្ដាញសង្គមដទៃទៀត។ ប៉ុន្ដែគេមិនទាន់ដឹងថានៅខែឧសភា ខាងមុខ លោក លៀក លីដា នឹងបញ្ចេញរឿងទាំងនេះតាមវិធីណានៅឡើយទេ។

ទោះជាយ៉ាងណាក្រោយពីការប្រកាសរបស់ផលិតកររូបនេះ មានប្រិយមិត្តមិនតិចឡើយបានស្ងើចសរសើរ ហើយចាត់ទុកថាលោកក្លាហានចេញរឿងខ្នាតធំដល់ទៅ៤ក្នុងរយៈពេលតែមួយខែ ខណៈដែលស្ថានភាពឆ្លងរាតត្បាត នៃជំងឺកូវីដ-១៩ មិនទាន់ធូរស្រាលផងនោះ៕

អត្ថបទ៖ ជិន សុភ័ក្ដ្រ