អ្នកជំនាញពន្លឿនការជួសជុលខឿនជ្រុងនិរតី នៅរួតទី៣ នៃប្រាសាទបាយ័ន្តឱ្យរួចរាល់ មុនខែវស្សាមកដល់

2021-04-12 04:49:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ការងារជួសជុលនៅប្រាសាទបាយ័ន្ត មាន៤គម្រោងធំៗ ក្នុងនោះរួមមាន ទី១ ជួសជុលជ្រុង និរតី រួតទី៣នៃប្រាសាទបាយ័ន្តបាន៣០ភាគរយ។ ទី ២ទល់ទ្រផ្តែរហោរជាងដែលពុំមាន សរសរពេជ្រសម្រាប់ទ្រលំនឹង ដំបូល និងធ្នឹមរលុះធ្លាក់បាន៩០ ភាគរយ។ ទី៣ រៀបចំបិទភ្ជិត តាមប្រហោងថ្ម និងសម្រួលថ្ម រដិបរដុប មិនរាបស្មើ បាន ៨០ ភាគរយ និងទី៤ តម្លើងជណ្តើរ គ្រោងដែក ដើម្បីសម្រួលដល់សៀគ្វី ទស្សនាប្រាសាទ សម្រេចបាន ១០០% ហើយ។ នេះបើតាមការបញ្ជាក់ពី កញ្ញា ម៉េង សុវណ្ណលីលីន ស្ថាបត្យករ នៃនាយកដ្ឋានអភិរក្សប្រាសាទ ក្នុងឧទ្យានអង្គរ និងបុរាណវិទ្យាបង្ការ។

ដោយកៀកនឹងខែវស្សា ខិតចូលជិតមកដល់ ដូចនេះ ក្រុមការងារ នឹងខិតខំពន្លឿនការរើថ្ម និងរៀបទៅវិញ យ៉ាងយូរឱ្យរួចរាល់ នៅខែមិថុនា ខាងមុខ។ ដោយឡែក ការជួសជុលកម្រាល អាចបន្ត ក្នុងរយៈពេលប្រមាណ ៣ ខែបន្តទៀត នឹងបញ្ចប់ទាំងស្រុង។ ផលលំបាកចំពោះ ការងារជួសជុលនេះ គឺទីធ្លាមានភាពតូច ចង្អៀត ពិបាកក្នុងការរើថ្ម និងត្រូវការប្រើ កម្លាំងពលកម្មមនុស្សទាំង ស្រុង ក្នុងការរើថ្ម។ ដូច្នេះ ក្រុមការងារ បានប្រើបន្ទះកៅស៊ូក្រាល លើកម្រាលថ្ម ដើម្បីធ្វើដាក់ថ្មដែលរើ ចៀស វាងការប៉ះថ្មនឹងថ្មដោយផ្ទាល់ អាចបណ្តាល ឱ្យខូចផ្ទៃថ្ម។ ម្យ៉ាងទៀតបើមានភ្លៀងធ្លាក់ ឬរដូវវស្សាមកដល់ គឺពិបាកក្នុងការជួសជុល។

រចនាសម្ព័ន្ធខឿន នៅរួតទី៣ នៃប្រាសាទបាយ័ន្តនេះ រងការខូចខាត ដោយសារកត្តាអាកាស ធាតុ ដើមឈើ ជាពិសេសកត្តាទឹក បានហូរច្រោះ ចូលរចនាសម្ព័ន្ធ ដែលនាំយកល្បាយខ្សាច់ ចេញ នាំអោយមានបញ្ហា នៅតាមជ្រុងកែង ក្រៀកចេញពីគ្នា ដែលអាចប៉ះពាល់ដល់ ខឿនរួតទី៣ និងសំណង់ប្រាសាទ ទាំងមូលផងដែរ។ គម្រោងជួសជុលនេះ ជាការអនុវត្តផ្ទាល់ ដោយអ្នកជំនាញអាជ្ញាធរជាតិអប្សរា ដោយមានការសហការ លើបច្ចេកទេស រវាងអាជ្ញាធរជាតិអប្សរា និងស្ថាប័ន JASA ប្រទេស ជប៉ុន៕