សម្ដេចតេជោ ហ៊ុន សែន លើក​ចំ​ៗ រឿង​អ្នក​ឧកញ៉ា ឡេងណាវ៉ាត្រា ហ៊ាន​លក់​អង្ករ​ខាត​ដើម​ជូន​ពលរដ្ឋ​

  • 2021-04-17 03:17:27
  • ចំនួនមតិ 7 | ចំនួនចែករំលែក 39

ចន្លោះមិនឃើញ

សម្ដេច​តេជោ លោក បាន លើក​សរសើរ​ចំៗ ដល់ផ្សារកសិផលធម្មជាតិរបស់ អ្នកឧកញ៉ា ឡេង ណាវ៉ាត្រា ដែល​ម្សិលមិញ​នេះ បាន​ប្រកាស​សម្រេច​លក់​អង្ករ​ក្នុង​តម្លៃ​ខាត​ដើម ដើម្បីទប់តម្លៃអង្ករឡើងថ្លៃខ្លាំងលើទីផ្សារ។

ការ​លើក​ឡើង​របស់​ថ្នាក់​ដឹកនាំ​រាជរដ្ឋាភិបាល គឺ​នៅ​ក្នុងសារពិសេស​បន្ទាន់​មួយ​របស់ សម្ដេចតេជោ ហ៊ុន សែន កាលពីល្ងាចថ្ងៃទី១៦ ខែមេសា ២០២១ វេលា​ដែល​សម្ដេច​នាយករដ្ឋមន្ត្រី បាន​ចេញបទបញ្ជាជាថ្មីទៀត ជុំវិញការហាមផ្តាច់ការ​ចរាចររបស់​ប្រជាពលរដ្ឋរយៈ​ពេល១៤ថ្ងៃ មិនឲ្យចាកចេញពីផ្ទះ ឬភូមិ និងឆ្លងខេត្ត។ សម្ដេច​លើក​ឡើង​ថា សកម្មភាព​របស់​ផ្សារ​កសិផល​ធម្មជាតិ ឡេង ណាវ៉ាត្រា ក៏​ដូច​ជា​អ្នក​ឧកញ៉ា​ផ្ទាល់ ជា​ការ​រួម​ចំណែក​ជាមួយ​រាជរដ្ឋាភិបាល​ដើម្បី​ជួយ​បង​ប្អូន​ប្រជាពលរដ្ឋ។

«ក្រុមហ៊ុនរបស់ ឡេង ណាវ៉ាត្រា បានលក់អង្ករខាតដល់ជាង ៤០ដុល្លារសហរដ្ឋអាមេរិច ក្នុងមួយតោន សំដៅរួមចំណែកជាមួយរាជរដ្ឋាភិបាល និងជួយសម្រួលដល់ប្រជាពលរដ្ឋខ្មែរ ដែលមានតម្រូវការស្បៀងពិតប្រាកដ»។ ប្រមុខរាជរដ្ឋាភិបាល សម្ដេចតេជោ ហ៊ុន សែន ថ្លែងក្នុងសារសំឡេងពិសេស ល្ងាចថ្ងៃទី១៦ មេសា នេះ។

គួរបញ្ជាក់ថា ផ្សារកសិផលធម្មជាតិ របស់អ្នកឧកញ៉ា ឡេង ណាវ៉ាត្រា ជាទីផ្សារដ៏គំរូមួយ ក្នុង​ចំណោមអ្នកលក់ទំនិញជាច្រើនផ្សេងៗទៀត ដែលមិនត្រឹមតែ មិន​ឆ្លៀត​ឱកាស​ដំឡើងថ្លៃទំនិញសព្វមុខរបស់ខ្លួនទេ ថែមទាំងហ៊ានលះបង់ ទម្លាក់លុយ ស្វែងរកដៃគូផ្គត់ផ្គង់អង្ករ ដល់រាប់ពាន់តោន ហើយលក់ចេញវិញខាងដើមថែមទៀតផង។

តាម អ្នក​ឧកញ៉ា ប្រកាស​ម្សិលមិញ ក្នុង១តោន ផ្សារកសិផលធម្មជាតិឡេងណាវ៉ាត្រា លក់ខាត​ដើម ដល់ទៅ ៤០ដុល្លារអាមេរិច ដោយតម្លៃមួយប៉ាវ ទម្ងន់ ៥០ គីឡូក្រាម ប្រភេទអង្ករផ្កាម្លិះលេខ២ លក់ជូនអតិថិជនត្រឹមតែ ៧៦,០០០រៀលតែប៉ុណ្ណោះ។

តម្លៃនេះ បើធៀបទៅនឹងតម្លៃអង្ករទាំង លក់រាយ និងលក់បោះដុំ គឺគ្មានឡើយ ព្រោះតម្លៃអង្ករនៅលើទីផ្សារ មួយចំនួនត្រូវឈ្មួញឱកាសនិយម ដំឡើងថ្លៃតាមតែមាត់ខ្លួន ដែល​កន្លែង​ខ្លះ​ឡើង​ថ្លៃ​ដល់ មួយបាវជាង ១០ម៉ឺនរៀល ឬចូលជិត ២០ម៉ឺនរៀល ក៏មានដែរ។

ដូច្នេះ ឃើញ​ស្ថានភាព​នេះ អ្នក​ឧកញ៉ា ឡេង ណាវ៉ាត្រា បាន​ធ្វើ​កិច្ច​មួយ​ថ្មី​ទៀត ដោយ​ស្វែង​រក​រោង​ម៉ាស៊ីន​កិន​ស្រូវ​ជា​ដៃគូដែល​អាច​លក់​អង្ករ​ជូន​តម្លៃ​ពិសេស ហើយ​យក​មក​លក់​វិញ ក្នុង​តម្លៃ​ខាត​ដើម​ជូន​បង​ប្អូន​ប្រជាពលរដ្ឋ។ អ្នក​ឧកញ៉ា លើក​ឡើង ដោយ​សូម​បងប្អូនអតិថិជនទាំងអស់ ឈប់បារម្ភពីបញ្ហានេះទៀតទៅ! អតិថិជនអាចកុម្ម៉ង់ទិញអង្ករ បន្លែ ត្រី សាច់ និងគ្រឿងឧបភោគបរិភោគសព្វមុខដទៃទៀត នៅតាមគ្រប់សាខា ផ្សារកសិផលធម្មជាតិឡេងណាវ៉ាត្រា ដោយគ្រាន់តែបញ្ជាទិញតាមអនឡាញ ដោយគ្រាន់តែចូលទៅបញ្ជាក់លេខទូរស័ព្ទ និងទីតាំង លើហ្វេសប៊ុកផេក ផ្សារ ឡេង ណាវ៉ាត្រា ខាងបុគ្គលិកផ្សារនឹងទាក់ទងទៅអតិថិជនវិញមិនខាន៕

អត្ថបទ៖ ទារិកា