ក្រឡេកមកនេះ ព្រឹទ្ធាចារ្យចាប៉ីដងវែង២រូប កំពុងជួបការប្រឈមខ្លាំង ឥឡូវយុវជនមួយក្រុម រៀបចំបង្កើតកម្មវិធីតន្ត្រីមនុស្សធម៌ដើម្បីរកមូលនិធិ

2021-04-27 03:04:55
ចំនួនមតិ 0 | ចំនួនចែករំលែក 0

ចន្លោះមិនឃើញ

សិល្បករ-សិល្បការិនីខ្មែរវ័យក្មេងមួយក្រុម បានផ្ដួចផ្ដើមឲ្យមានការប្រគំតន្ត្រីចាប៉ីដងវែងដែលនឹងផ្សាយផ្ទាល់តាមបណ្ដាញសង្គមFacebookនៅថ្ងៃទី៣០ ខែមេសា ឆ្នាំ២០២១។ កម្មវិធីនេះ ធ្វើឡើងក្នុងគោលបំណងសុំជំនួយពីសប្បុរសជនទៅជួយដល់ព្រឹទ្ធាចារ្យចាប៉ីដងវែងពីររូបដែលបានបាត់បង់ចំណូលទាំងស្រុងជិត២ឆ្នាំមកហើយ។

យុវជនមួយក្រុមនោះមាន លោក យឹង យន ថន សីម៉ា និងលោក នូ សំណាង ជាដើម។ តាមលោក យឹង យន ប្រាប់ Sabay នៅថ្ងៃនេះថា ព្រឹទ្ធាចារ្យចម្រៀងចាប៉ីដងវែងទាំងពីររូបនោះ គឺមានលោក ង៉ាំ ងូ និងលោក សៅ អៀង ដែលពួកគាត់មានវ័យជរា និងមានសុខភាពមួយថ្ងៃកាត់មួយថ្ងៃកោរ។ ពួកគាត់ បានបាត់បង់ចំណូលទាំងស្រុងខ្ទង់ជិត២ឆ្នាំមកនេះ ដោយសារ កូវីដ១៩ ធ្វើឲ្យពួកគាត់លំបាកខ្លាំង។

ដោយមើលឃើញដូច្នេះ ផ្សំនឹងលោកទាំងពីរមានវ័យជរាផង កូនចៅមិនមានជីវភាពធូរធារផង ទើបក្រុមលោកសម្រេចបង្កើតកម្មវិធីនេះឡើងដើម្បីជួយដោះទុក្ខគាត់មួយគ្រាហ៍ មុនពេលឈានទៅជួយសិល្បករចាស់ជរាផ្សេងទៀត។

យឹង យន៖"តាមពិតទៅសិល្បករយើង មានការលំបាកច្រើនគ្នាមិនមែនមានតែលោកតាទាំងពីរទេ! តែដោយសារទី១គាត់ចាស់ សុខភាពមួយថ្ងៃកាត់ មួយថ្ងៃកោរ ហើយកូនចៅក៏ជីវភាពពីបាក ក៏សម្រេចថា ជ្រើសរើសរកវិធីជួយពួកគាត់មុនទៅ!"។

យោងតាមខិត្ដប័ណ្ណផ្សព្វផ្សាយមួយបង្ហោះដោយក្រុមតារាចម្រៀង យឹង យន កម្មវិធីនឹងចាប់ផ្ដើមពីម៉ោង៧ ដល់ម៉ោង៨យប់ ថ្ងៃទី៣០ ខែមេសា។ កម្មវិធីនេះ នឹងផ្សាយតាមPage Facebook លោក យឹង យន តែម្ដង។ ដើម្បីចូលរួមក្នុងសកម្មភាពមនុស្សធម៌នេះ ក្រុមលោក យ៉ឹង យន បានដាក់លេខទូរស័ព្ទ និងកុងធនាគារដើម្បីឲ្យសប្បុរសជនចូលរួម គឺលេខ០១៧ ៧៧២ ៥៤៩ និង០១៦ ៦៧៨ ៣៧០៕

អត្ថបទ៖ ជិន សុភ័ក្ដ្រ