ហ៊ឹម...លឺហើយអាសូរណាស់ ស៊ិន ឧត្តមផល្លា និយាយខ្សាវៗ ៖ ខ្ញុំមិនដឹងរស់បានប៉ុន្មានថ្ងៃទៀតទេ!

2021-04-27 03:15:25
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងច្រើនភាសា ស៊ិន ឧត្តមផល្លា បាន និងកំពុងធ្វើឲ្យមិត្តរួមអាជីពជាច្រើន បារម្ភ និងអាណិតអាសូរ ក្រោយមានដំណឹងថា តារាស្រីរូបនេះ បាន និងកំពុងធ្លាក់ខ្លួនឈឺជាមួយនឹងជំងឺមហារីកដំណាក់កាលចុងក្រោយ ស្របពេលសាមីខ្លួនពោលថា ខ្លួនមិនដឹងថាគង់វង្សបានយូរប៉ុណ្ណានោះទេ។

“ដឹងយ៉ាងម៉េចទេ ខ្ញុំមិនដឹងរស់បានប៉ុន្មានថ្ងៃទៀតទេ...!” ស៊ិន ឧត្តមផល្លា បានប្រឹងឆ្លើយតប ក្នុងសំឡេងខ្សាវៗស្ទើរស្ដាប់មិនលឺ។

ស៊ិន ឧត្តមផល្លា ទើបនឹងបើកទំលាយពីស្ថានភាពសុខភាពរបស់ខ្លួននាប៉ុន្មានថ្ងៃមុននេះ ក្រោយពីនាងបានព្យាយាមលាក់បាំងអស់រយៈពេលយ៉ាងយូរ។ ដើមឡើយ តារាចម្រៀងរូបនេះ បានបាត់មុខពីសិល្បៈចាប់តាំងពីពាក់កណ្ដាលឆ្នាំ ២០២០ ដោយមិនមានមូលហេតុច្បាស់លាស់។ ក្រោយមក នាងបានចេញមុខម្ដងតាមរយៈរូបភាពសន្លឹក ដែលបង្ហាញថា នាងកោរសក់បួសសងគុណម្ដាយ។

កាលនោះ ផល្លា ដែលមិនសក់មួយសរសៃលើក្បាល មិនមានបំណងបង្ហាញមុខនោះទេ ប៉ុន្តែនាងបង្ខំចិត្តចេញមកទាត់ចោលចចាមអារ៉ាមថា នាងត្រូវគេបណ្ដេញចេញពីក្រុម Dara Entertainment។ លុះមកដល់ដើមឆ្នាំ ២០២១ នាងបានចេញមុខម្ដងទៀត ជាមួយរូបប៉ុន្មានសន្លឹកទៀត ដែលគេមើលឃើញថា មុខមាត់របស់ ផល្លា មានសភាពខ្មៅខុសពីធម្មតា រហូតដល់សាមីខ្លួនចេញមុខមកអះអាងទៀតថា ដោយសារតែនាងថតនៅទីខ្វះពន្លឺ ទើបឃើញមុខខ្មៅដូច្នេះ។

ប៉ុន្តែប៉ុន្មានថ្ងៃមុននេះ ផល្លា បានធ្វើឲ្យប្រិយមិត្ត និងមិត្តរួមអាជីពមួយចំនួនតក់ស្លុត ក្រោយពីនាងបានបើកទំលាយថា នាងមានជំងឺមហារីកដំណាក់កាលចុងក្រោយទៅហើយ។ មិត្តរួមអាជីពជាច្រើន បង្ហាញនូវការអាណិតអាសូរ និងបានចូលមកជួយលើកទឹកចិត្តតារាស្រីគ្រប់ៗគ្នា ក្នុងនោះគេឃើញមានលោក យ៉ែម សំអូន មេក្រុមរបស់នាង និងអតីតតារាចម្រៀង ឌីកាន សុភនាថ ជាដើម។

ជុំវិញស្ថានភាពសុខភាពរបស់នាង ផល្លា បានប្រាប់ថា ដើមឡើយនាងមានជំងឺមហារីកកូនកណ្ដុរនៅម្ដុំគល់ក ហើយនាងបានចូលទៅទទួលការព្យាបាលគ្រប់ដំណាក់កាល មានទាំងការចាក់បញ្ចូលសារធាតុគីមីផង ដែលក្រោយការព្យាបាលនាងបានធូរស្រាលហើយ ហើយជាមួយនឹងក្ដីសង្ឃឹមថា អ្វីៗនឹងវិលមករកសភាពធម្មតារបស់នាងដូចកាលពីមុនវិញ។ ប៉ុន្តែគួរសោកស្ដាយ មេរោគដ៏សាហាវនេះ បានរត់ទៅកន្លែងផ្សេងទៀតនៃរាងកាយទៅហើយ។

“និយាយទៅ ខ្ញុំបានព្យាបាលតាមគ្រប់ដំណាក់កាលរបស់គ្រូពេទ្យហើយ ហើយក៏បានទៅស្កេនមើលនៅដងខ្លួនទៀត ខ្លាចវាទៅនៅកន្លែងណាទៀត តែអត់ឃើញមានទេ។ ប៉ុន្តែចុងក្រោយនេះ វាស្រាប់តែពឺតក្បាលខ្លាំងឡើងៗ លុះទៅពេទ្យស្កេនមើល គេថា វាជ្រៀតចូលដល់ខួរក្បាលទៅហើយ!”។

ផល្លា ប្រាប់បន្តថា គ្រូពេទ្យនឹងធ្វើការព្យាបាលតាមដំណាក់កាលជាច្រើនទៀត តែសម្រាប់នាងខ្លួនឯងមិនដឹងថា នឹងមានលទ្ធផលបែបណា ហើយនាងអាចរស់បានប៉ុន្មានថ្ងៃទៀតនោះទេ។ "ខ្ញុំគ្រាន់តែចង់ឃើញកូនៗខ្ញុំមានប្ដីមានប្រពន្ធរួចហើយ ចាំយកខ្ញុំទៅពេលណាក៏បានដែរ"។ ផល្លា ថ្លែង។

ស៊ិន ឧត្តមផល្លា បច្ចុប្បន្នកំពុងមានបន្ទុកចិញ្ចឹមកូនចំនួន ៣នាក់។ ក្រៅពីអាជីពសិល្បៈ នាងក៏ជាម្ចាស់អាជីវកម្មលក់គ្រឿងបុណ្យ យីហោ "ឧត្តម ឧត្តម" នៅខាងជើងវត្តព្រះពុទ្ធ។ កាលនៅសុខភាពរឹងមាំ គេមើលឃើញថា ផល្លា ជាសិល្បការិនីដែលមានឆន្ទៈខ្លាំងចំពោះសិល្បៈ ក្នុងនោះនាងរមែងខិតខំស្រាវជ្រាវរកសិល្បករចាស់ៗ មកបង្ហាញជូនប្រិយមិត្តដោយមិនខ្លាចនឿយហត់ និងមិនដែលបានចំណូលអ្វីពីការងារនេះសូម្បី១០០រៀល។

រូបភាព៖ ហ្វេសប៊ុក ផល្លា

តាមរយៈការខិតខំរបស់ តារាចម្រៀងស្រី គេបានដឹងថា សិល្បករជើងចាស់ៗជាច្រើន ខ្លះមានជីវភាពធូរធារ ខ្លះទៀត ជួបការលំបាកហួសស្មានទាំងផ្នែកជីវភាព និងសុខភាព ហើយខ្លះក្នុងចំណោមនោះ ក៏បានផ្លាស់ប្ដូរជីវភាព បន្ទាប់ពីការចែកចាយរបស់ ផល្លា ហើយមានសប្បុរសជនជាច្រើនបានជួយ។ ប៉ុន្តែបន្ទាប់ពីជួយគេឯងជាច្រើននាក់ មិននឹកស្មានថា រឿងដ៏អាក្រក់មួយ បែរជាមកកើតលើអ្នកស្រាវជ្រាវពីសិល្បៈរូបនេះទៅវិញ។ ប្រិយមិត្ត និងមិត្តភ័ក្តិជាច្រើន បានបន់ស្រន់ឲ្យ តារាចម្រៀងស្រី មានសំណាងល្អ ឆ្លងផុតដំណាក់កាលដ៏ផុយស្រួយនេះកុំខាន៕

អត្ថបទ៖ ទារិកា