កូនប្រុស ណយ សំណាង ប្រាប់ពីអាការក្នុងខ្លួន ខណៈម្ដាយមិនទាន់ត្រូវបានបញ្ចេញនូវស្ថានភាពសុខភាព

2021-05-21 02:58:05
ចំនួនមតិ 0 | ចំនួនចែករំលែក 0

ចន្លោះមិនឃើញ

កូនប្រុសបង្កើតរបស់តារាចម្រៀង និងសម្ដែងជើងចាស់ ណយ សំណាង គឺលោក វណ្ណា ស័ក្ដិ ប្រាប់ពីអាការក្នុងខ្លួនបន្ទាប់ពីលោកបានសម្រាក និងព្យាបាលជំងឺកូវីដ-១៩ ជាមួយម្ដាយនៅមន្ទីរពេទ្យមិត្តភាពខ្មែរ-សូវៀត បានជាងមួយសប្ដាហ៍រួចមក។

លោក វណ្ណា សក្ដិ ដែលកំពុងសម្រាកព្យាបាលខ្លួនឯងផង និងមើលថែម្ដាយដែលកំពុងព្យាបាលជំងឺកូវីដ-១៩ ផង តែងតែប្រាប់ពីស្ថានភាពរបស់ខ្លួន និងម្ដាយជាប្រចាំដល់មហាជនតាមបណ្ដាញសង្គមផ្ទាល់ខ្លួន។ ល្ងាចមិញនេះលោក និយាយថា ពេលនេះរូបលោកបានធូរស្បើយច្រើនហើយ។

វណ្ណា ស័ក្ដិ៖"ខ្ញុំសង្ឃឹមថាអាចឆាប់បានត្រឡប់ទៅផ្ទះវិញផងចុះ...ខ្ញុំគ្រាន់តែនៅមានអាការឈឺកបន្ដិច គេងមិនសូវលក់បន្តិច ក្ដៅខ្លួនបន្តិច ចុករោយឆ្អឹងឆ្អែងបន្តិច អស់កម្លាំងក្នុងខ្លួនបន្តិច...និយាយរួមទៅសុទ្ធតែបន្តិចៗទាំងអស់ មិនអីទេជិតជាហើយ"។

ត្បិតថាលោក វណ្ណា សក្ដិ មិនបានបង្ហាញពីអាការម្ដាយនៅពេលនេះ ប៉ុន្ដែមុនពេលចូលមកសម្រាក និងព្យាបាលជំងឺកូវីដ-១៩ នៅមន្ទីរពេទ្យមិត្តភាពខ្មែរ-សូវៀត គឺលោកស្រី ណយ សំណាង មានសភាពធ្ងន់ធ្ងរខ្លាំង។ ដោយស្ថានភាពធ្ងន់ធ្ងរនេះហើយ ទើបគ្រូពេទ្យជំនាញបានផ្លាស់ប្ដូរកន្លែងព្យាបាលដោយគ្រូពេទ្យបានបញ្ជូនអ្នកជំងឺទាំងម្ដាយ និងកូនតាមឡានសង្គ្រោះបន្ទាន់មកសម្រាក ព្យាបាលនៅមន្ទីរពេទ្យខ្មែរ-សូវៀតកាលពីថ្ងៃទី១៥ ខែឧសភា ឆ្នាំ២០២១៕

អត្ថបទ៖ ជិន សុភ័ក្ដ្រ