ក្ដុកក្ដួលណាស់! ពិធីការិនី ស៊ិន ឧត្ដមផល្លា ទទួលមរណភាពហើយនៅព្រឹកនេះ

2021-05-28 03:39:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំណឹងដ៏ក្ដុកក្ដួល និងសោកសៅបំផុតមួយបានកើតឡើងចំពោះអ្នកសិល្បៈខ្មែរ ដោយតារាចម្រៀង និងជាពិធីការិនីល្បីឈ្មោះ ស៊ីន ឧត្ដមផល្លា បានទទួលមរណភាពនៅព្រឹកថ្ងៃទី២៨ ខែឧសភា ឆ្នាំ២០២១ ដោយជំងឺមហារីកកូនកណ្ដុរ។

តារាសម្ដែងជើងចាស់លោក សាវិន ហ្វីលីប បានបញ្ចេញដំណឹងមរណភាពនេះតាមបណ្ដាញសង្គមFacebook នៅមុននេះបន្ដិចថា សូមចូលរួមរំលែកទុកដ៏ក្រៀមក្រំចំពោះមរណភាពរបស់តារាចម្រៀងល្បីឈ្មោះ ស៊ីន ឧត្ដមផល្លា នៅម៉ោង៧ និង៣០នាទី ព្រឹកនេះ។ សាវិន ហ្វីលីប៖"សង្ខារមិនទៀងមែន ព្រោះខ្ញុំទើបតែនិយាយជាមួយគាត់តាមឆាតប៉ុន្មានថ្ងៃមុនសោះ...ប្អូនស្រីថាគាត់មិនអីទេ អ្វីៗនឹងប្រសើរឡើង តែពេលនេះប្អូនបានទៅសុខហើយ"។

តារាចម្រៀង និងជាពិធីការិនី ស៊ិន ឧត្ដមផល្លា បានធ្លាក់ខ្លួនឈឺជាច្រើនខែហើយ ប៉ុន្ដែនាងទើបទម្លាយឲ្យគេឯងបានដឹងនូវស្ថានភាពរបស់ប្រហែល២ខែមុន គឺចំពេលដែលស្ថានភាពជំងឺមហារីកកូនកណ្ដុររបស់នាងបានស្ថិតនៅដំណាក់កាលចុងក្រោយហើយ។

ស្ថិតនៅក្នុងដំណាក់កាលធ្ងន់ធ្ងរ និងកំពុងសម្រាកព្យាបាលនៅមន្ទីរពេទ្យ ស៊ិន ឧត្ដមផល្លា ធ្លាប់និយាយថា នាងមានបំណងមួយគឺចង់រស់នៅបានរហូតដល់កូនៗរបស់នាងរៀបការរួច ប៉ុន្ដែនៅព្រឹកនេះស្រាប់តែគេទទួលដំណឹងថានាងបានទទួលមរណភាពបាត់ទៅហើយ៕

អត្ថបទ៖ ជិន សុភ័ក្ដ្រ